Не ‘мбæстæгтæ Гатыгкоты Павел æмæ Ляна Мебурнутова сæ цард куы баиу кодтой, уæд куыд бирæ æндæр æвзонг цардæмбæлттæн, афтæ уыдонæн дæр дардыл æмæ алыгъуызæттæ уыдысты сæ хорз фæндтæ æмæ хъуыдытæ, фæлæ сæ сæйраг тырнындзинад уыд кæстæртæ фенын, уыдон хъомыл кæнын. Бæллыдысты лæппуйы гуырд фенынмæ,фæлæ рауад афтæ, æмæ баисты цыппар чызджы хицау.
Мад æмæ фыды фæндыд, цæмæй сæ кæстæртæ ныллæуой сæ фæндагыл, суой хъæууон хæдзарады специалисттæ. Сæхæдæг къорд азты, фæрстæй-фæрстæм куыстой Хуссар Ирыстоны хъæууонхæдзарады министрады. Фæлæ ам дæр сæ бæллиц нæ сæххæст. Нæ ныхасы сæр кæуыл у, уыцы чызг Нинæ дæр бынтон æндæр професси равзæрста. Цæвиттон, уый хорз арæхст зарынмæ. Афтæ дæр дзырдтой, зæгъгæ, цæуын æмæ дзурынæй зарын раздæр базыдта. Куыд стырдæр кодта, афтæ Нинæйæн æцæгæйдæр, хуыздæр зынын райдыдтой, зарын æмæ кафынмæ йе ‘взыгъддзинæдтæ æмæ уымæй хицæн кодта йе ‘мцахъ-хъæнтæй.
Нинæ ахуыр кæнынмæ бацыд Колыты Аксойы номыл лицеймæ. Уым ноджы тынгдæр фæбæрæг сты йе ‘взыгъд-дзинæдтæ, йæ ахуыргæнджытæ йæ бауарзтой, фæлæ бæрæг аххосæгтæм гæсгæ чызджы цæуын бахъуыд Санкт Петербургмæ æмæ уым ссис музыкæмæ æвзыгъд сывæллæтты скъолайы ахуыргæнинаг. Мад æмæ фыд арæх бæрæг кодтой сæ чызджы, арæх-иу фæдзырдтой йæ ахуыргæнджытæм дæр сæ фарсмæ кæй нæ уыд, æрвылбон дæр æй кæй нæ уыдтой, уый сын æнцойад нæ лæвæрдта. Уыимæ ма Нинæ йæхæдæг дæр мысын райдыдта мад æмæ фыды, хотæ æмæ æмгæртты æмæ фæстæмæ æрыздæхт. Бацыд Цхинвалы дыккæгæм астæуккаг скъоламæ æмæ фараст кълас каст фæуыны фæстæ йæ йæ ахуыр адарддæр кодта Æлборты Феликсы номыл Цхинвалы музыкалон ахуыргæнæндоны. Ам дæр Нинæ йæхи ахæм хорз æмæ æвзыгъд ахуыргæнинагæй равдыста æмæ йæ куыддæр каст фæцис, афтæ йæм йæ разамынд бахатыд, цæмæй баззайа æмæ йæ райсгæ зонындзиæдтæ амона, йæ фæстæ чи цыд, уыцы ахуыргæнинæгтæн. Фæлæ Нинæйы хъуыдытæ дардылдæр уыдысты. Фæндыд æй фæбæрзонддæр кæнын йæ музыкалон зонындзинæдтæ. Æмæ 2005 азы балæууыд Краснодары паддзахадон университеты исæн къамисы уæнгты раз. Æнтысгæйæ радта бацæуæн фæлварæнтæ æмæ ссис университеты культурæ æмæ аивады факультеты студент, кæцыйы иттæг хорз нысæнттыл каст фæцис 2010 азы. Дарддæр та университеты цы зонындзинæдтæ райста, бафæндыд æй уыдон бафидар кæнын æмæ ссис ацы университеты культуралогийы аспиранткæ.
Краснодары уæвгæйæ, Нинæ иу æмæ дыууæ хатты сценæйыл нæ ралæууыд цæрджыты раз, йæ зарджытæй иу æмæ дыууæ хатт нæ барухс кодта концертмæ кæсджыты зæрдæтæ, æмæ аспирæнтурæ каст нæма фæцис афтæмæй йæ куыстмæ айстой Краснодары филормонийы эстрадон-симфонион оркестры солистæй, цыран фæкуыста авд азы.
Нинæйæн Краснодары йæ хъуыддæгтæ цыдысты хорз, æппæтæй дæр уыд райгонд, фæлæ та ам дæр йæ хъуыдытæ баст уыдысты Ирыстонимæ æмæ æрыздæхт Цхинвалмæ. Кусынмæ бацыд, йæхæдæг каст цы музыкалон ахуыргæнæндон фæцис уырдæм.
Нинæ ныр ацы ахуыргæнæндоны кусы дæс азы. Уыцы азты йæ дæсныйад цъус æвзонг лæппутæ æмæ чызджытæн нæ бацамыдта.
Ирон музыкæ æмæ зарджытæ æндæр адæмты музыкæ æмæ зарджыты ‘хсæн цахæм бынат ахсынц, уый тыххæй та Нинæ банысан кодта, зæгъгæ, «нæй æвзæр æмæ мæгуырау музыкæ, фæлæ алы адæмтæ дæр фылдæр уарзынц сæхи музыкæ, æмбæлгæ дæр кæны афтæ. Ирон музыкæ æмæ зарджытыл куы дзурæм, уæд сæ гъæд мæнмæ кæсы хуыздæр. Уымæн æмæ ирон адæмы музыкалон уацмыстæ арæхдæр фыст сты ахсджиагдæр темæтыл, нæ зарджыты ‘хсæн хæрз цъус ис уæлæнгай цаутыл дзурæг зарджытæ, хуымæтæг темæтыл фыст зарджытæ та нæм, зæгъгæ, бынтондæр нæй.
Ацы бонты Нинæйы хъуыдытæ æмæ фæндтæ баст сты ног 2023-2024 ахуыры азы райдианимæ. Æмæ уырнинаг у, ацæугæ ахуыры азы йæ фæндтæ æмæ хъуыдытæй æххæст цы не ‘рцыдис, уыдон ног ахуыры азы йæм цы ног фæндтæ ис, уыдон ын æххæст кæй æрцæудзысты.
Банысан ма хъæуы уый дæр æмæ нæ горæт æмæ республикæйы цы алыгъуызон бæрæгбонон мадзæлттæ уагъд æрцыдысты, уыдоны Нинæ кæд се ‘ппæты нæ, уæддæр сæ фылдæры кæй райсы хайад. Æмæ æрмæст хайад нæ, фæлæ йæ зарджытæй фæрухс кæны концертмæ-кæсджыты зæрдæтæ. Афтæ кæй у, уый ма бæрæг у уымæй дæр æмæ йын цалдæр азы размæ лæвæрд кæй æрцыдис Республикæ Хуссар Ирыстоны сгуыхт артисты кадджын ном.
ГÆЗЗАТЫ Иван
