Тохы быдыры дæр ис газет «Хурзæрин»-ы иузæрдион кæсджытæ. Хотыхты богъ-богъ куы банцайы æмæ сын улæфты рæстæг куы фæвæййы, уæд Ирыстоны хъæбатыртæ, нæхи бынæттон лæппутæ, æрæджыдæр ма Хуссар Ирыстоны сæрыл чи хæцыд гуырдзиаг агрессортимæ, уыдон зыдæй бацагурынц нæ газеты Телеграм-каналы. Æвæццæгæн, мах арæх кæй фыссæм сæрмагонд æфсæддон операцийы тыххæй, уымæн фæагурынц газеты радон номыр. Ома, ацы хатт та дзы кæй тыххæй ныффыстой, зæгъгæ.
Ирон дзыллон информацийы фæрæзты Паддзахадон бæрæгбоны хæдразмæ нæм уыцы лæппутæ æрæрвыстой цымыдисон арфæтæ. Джихæй аззадыстæм иу цъусдуг.
Бавдæлдысты æмæ егъау минæзгъа-лæг нæмыгыл ныффыстой нæ газеты ном. Йæ къам нын раппæрстой æмæ ныффыстой, зæгъгæ, ацы нæмыгæй газеты коллектив æмæ ирон лæппуты номæй знæгтæм арвитдзыстæм нæ хæстон «лæвар». «Нæхи номæй уын арфæ кæнæм уæ профессионалон бæрæгбоны сæраппонд. Бузныг, нæ алы хъуыддагмæ дæр зæрдиагæй кæй цымыдис кæнут æмæ мингай километртæй уæ зæрдæты хъарм кæй æнкъарæм», – фыссынц нæ хæстонтæ. Ацы цымыдисон хъуыды æрцыд Уæрæсейаг 4-æм æфсæддон базæйы службæгæнæг Джиоты Сæрмæт-мæ.
Æнæхъæн редакцийæн сæ зæрдæтæ суынгæг сты, лæппутæ. Дунесфæлдисæг Иунæг Кадджын Хуыцауы хорзæхтæй хайджын ут! Уастырджийы фæдзæхст кæддæриддæр ут! Æнæрхъæцæй уæм æнхъæлмæ кæсæм, нæ уæлахиздзаутæ.
Уæ хæстон «лæвар»-ы къам баззайдзæн сæрмагонд æфсæддон операцийы историйы дæр æмæ нæ газеткæсджыты мысынады дæр.
Газет «Хурзæрин»-ы
коллектив
