Нæ паддзахадон театры къухдариуæгадæн Цæгат Ирыстоны театртимæ цы бадзырдтæ ис, уыдон фæлгæтты дыууæ фарс дæр кæнынц æмгуыстад æмæ та нæм гастролон балцы фæуазæг уыдзысты цæгатирыстойнаг театрты труппæтæ. Фыццаграды уал æнхъæлмæ кæсæм Евгени Вахтанговы номыл Цæгат Ирыстоны уырыссаг академион театрмæ.
Рæхджы хуссарирыстойнаг театрдзауты зæрдæтæ барухс уыдзысты Евгени Вахтанговы номыл Цæгат Ирыстоны уырыссаг академион театры спектаклæй. 25-æм марты, Культурæйы кусæджы боны цытæн уыдон нæ театры сценæйыл равдисдзысты зынгæ уырыссаг фыссæг Антон Чеховы пьесæмæ гæсгæ æвæрд спектакль «Æртæ хойы».
Хетæгкаты Къостайы номыл Хуссар Ирыстоны паддзахадон драмон театры пресс-службæйы нын куыд фехъусын кодтой, уымæ гæсгæ ацы спектакльмæ билеттæ уæй нæ кæндзысты, фæлæ сценæмæкæс-джытæ хуынд цæудзысты хонæн билеттæм гæсгæ. «Æртæ хойы» цымыдисон у уымæй, æмæ алы рæстæджы дæр нæ сафы йæ актуалондзинад. Уымæ гæсгæ Уæрæсейы Федерацийы театрты æвæрд цæуы арæх. Фыссæджы уацмыстæ тæлмацгонд æрцыдысты сæдæ æвзагмæ, йæ пьесæтæ 120 азы дæргъы æвæрд цæуынц дунейы иууыл хуыздæр театрты. Уый ныффыста 500 уацмысæй фылдæр. Чехов уарзта сфæлдыстадон куыст, уый уарзта адæмы æхсæн хорздзинад тауын, æххуыс кодта адæмæн æмæ сын хос кодта. Зындгонд фыссæг ма кодта хæрзаудæн куыст дæр. Уымæ гæсгæ ахуыр кæнын хъæуы ахæм зындгонд классикты», – банысан кодтой пресс-службæйы.
Антон Чеховы пьесæмæ гæсгæ æвæрд спектакль «Æртæ хо»-йæн премьерæ уыдис ивгъуыд аз Цæгат Ирыстоны марты мæйы. Спектаклы æвæрæг режиссер у Къарджиаты Изабеллæ, сценограф – Цæгат Ирыстон-Аланийы культурæйы сгуыхт кусæг Светлана Володина, йæ музыкæйыл та йын бакуыста Алексей Деминов.
ЦХУЫРБАТЫ Ларисæ
Comments are closed, but trackbacks and pingbacks are open.