Инвестпрограммæйы фæлгæтты нæ горæты цы уынгтæ арæзт æрцыдысты æмæ абон цæстæнгас сæхимæ чи здахынц сæ аив арæзтæй, уыцы уынгтæм та ацы аз дæр бафтдзæнис аст.
Уыдонæй фыццаг æрывнæлдтой Кимы уынджы арæзтадмæ. Æххæст кæны сæ бæллиц ацы уынджы цæрджытæн. Тынг тыхстысты, уымæн æмæ куыд иннæ уынгты, афтæ ам дæр коммуникацион хæххытæ базæронд сты æмæ-иу куы кæм атыдтой, куы та кæм. Къæвда рæстæджы-иу азмæлæнтæ нал уыд цæрæн хæдзæртты рæзты. Ныр уынджы арæзтады фæдыл куыстытæ сты сæ тæмæны æмæ цæрджыты цинæн кæрон нæй. Куыд æндæр уынгты, афтæ ам дæр куыстытæм фыццаг æрывнæлдтой «Водоканал»-ы кусджытæ. Кусынц ыл 4 адæймаджы, иууылдæр сты бынæттон цæрджытæ æмæ архайынц æппæт куыстытæ дæр цæсгомджынæй бакæныныл. Кусы дзы техникæйы 2 иуæджы. Ныртæккæ ам куыст цæуы канализацион æмæ донуадзæн хæххытæ ивыныл, стæй та сæ баиу кæндзысты хæдзæрттæм. Ацы куыстытæ æххæст куы æрцæуой, уæд æрывналдзысты газуадзæн куыстытæм, баивдзысты телцæджындзтæ. Ацы куыстытæ куы фæуой, уæд та уынджы арæзтадон куыстытæ райдайдзысты «Дорэкспострой»-йы кусджытæ.
Банысан кæнын хъæуы уый, æмæ Водоканалы кусджытæ Коцты Сæрмæт, Рудольф, Æлборты Вячеслав æмæ тракторист Жажиты Вадим æппæт куыстытæ дæр кæй кæнынц æнæаиппæй, уымæн æмæ æмбарынц, цы аразынц, уый кæй аразынц сæ адæмæн.
Кусынц улæфт бонты дæр. Райсомæй раджы æрлæууынц сæ куысты уæлхъус æмæ цалынмæ нæ баизæр вæййы, уæдмæ не ‘рнымæг вæййы сæ техникæйы уынæр.
Уынджы арæзтады прораб Коцты Сæрмæт куыд банысан кодта, афтæмæй иннæ уынгтыдæр куыст цæудзæнис планмæ гæсгæ. Йæ хъуыдымæ гæсгæ арæзтцæуæг аст уынджы эксплуатацимæ лæвæрд æрцæудзысты рæстæгыл. Уыдон та сты Революцийы, Белинскийы, Плиты Ароны, Нæузæххонты, Базарадон, Табуйы фырты æмæ Хъайтарты уынджы 18-æм рæвдауæндонæй микрорайон Шанхаймæ.
Бестауты Валя
Comments are closed, but trackbacks and pingbacks are open.