Нæ республикæйы карантин кæй ис, уыцы хъуыддаг цасдæрбæрцæй бандæвта арæзтадыл дæр. Рæстæгмæ æрлæууыд, Дзауы районы цы ног бирæфатерон хæдзæрттæ райдыдтой аразын, уыдон арæзтад дæр. Фæлæ та знон аразджытæ æрæвнæлдтой сæ куыстмæ.
Куыд ма хъусын кодтам, уымæ гæсгæ 2020-2022 азтæн Инвестпрограммæмæ цы объекттæ хаст æрцыдысты, уыдонæй дыууæ бирæфатерон хæдзары арæзтадмæ зымæджы кæрæтты æрæв-нæлдтой Дзауы районы, фæлæ ныр сæвзæргæ уавæры тыххæй рæстæгмæ æрлæууыдысты арæзтадон куыстытæ. Уый тыххæй нын къуырийы райдианы фехъусын кодта Дзауы районы администрацийы сæргълæууæг Джиоты Андрей. Уый куыд загъта, уымæ гæсгæ районы дæр коронавирусы тыххæй баконд æрцыдис карантин æмæ æххæст кæнынц Хицауады уынаффæйы домæнтæ. «Цалдæр боны размæ мæхæдæг бабæрæг кодтон, скъола-интернаты фарсмæ цы ног хæдзæртты райдыдтам аразын, уыдон. Ам нырма арæзтадон куыстытæ цæуынц иу хæдза-рæн. Æрдæгарæзт у йæ бындур. Хæдзæрттæ дыууæ дæр уыдзысты 18-фатеронтæ. Аразгæ та сæ кæны арæзтадон фирмæ ООО «Монах», кæцыйы подрядон у Зæгъойты Феликс», – банысан кодта районы администрацийы сæргълæууæг.
«Ацы аз скъола-интернаты фарсмæ цы дыууæ 18-фатерон цæрæн корпусы аразæм, уыдоны проектмæ гæсгæ уыдзæнис дыууæ æмæ æртæхатæнон фатертæ. Районы 30 азæй фылдæр социалон хæдзæрттæ арæзт нæ цыдис æмæ ныр районы æвæрæз бинонтæй 36 бæрц сæ цæрæнуатон уавæртæ фæхуыздæр кæндзысты хицауады æххуысæй. Бузныг нæ Президент Бибылты Анатоли æмæ Хицауадæн, афтæ ма æппынæдзух нæ фарсмæ чи ис, уыцы Стыр Уæрæсейæн се ‘ххуыс æмæ сæ хъусдарды тыххæй», – загъта Джиоты Андрей.
Цалынмæ уац мыхуырмæ цæттæ кодта, уæдмæ нын фехъусын кодтой райадминистрацийæ, зæгъгæ, та аразджытæ æрæвнæлдтой сæ куыстмæ æмæ уæд нæ уацхæссæг фембæлдис арæзтадон фирмæ ООО «Монах»-ы генподрядон Зæгъойты Феликсимæ, цæмæй уавæры тыххæй базыдтаид бæстондæрæй. Æцæгæйдæр, майрæмбоны скъола-интернаты кæрты баййæфтам кусджыты сæ куысты уæлхъус, генподрядон Зæгъойты Феликсы разамындæй. Уыдон дарддæр кусынц хæдзары бындуры арæзтадон куыстытæ бакæныныл. Зæгъойты Феликс нын куыд радзырдта, афтæмæй уыдон сæ куыст рæстæгмæ æрурæдтой карантины аххосæй. Фæлæ бæстыхай рæстæгыл – азы кæронмæ аразын кæй хъæуы, уый тыххæй рахызтысты сæ арæзтадон объектмæ.
«Мах нæ куыстмæ рахызтыстæм абонæй. Куыстытæ нырма разæй сты æмæ сæм æнхъæлмæ кæсын нæ хъæуы. Дзауы районы, горæтмæ абаргæйæ, вæййы уазалдæр æмæ нæ боныгъæдтæ дæр кæй къуылымпы кодтой, уый тыххæй уал нырма аразæм хæдзæрттæй сæ иуы бындур. Уæдмæ та нæ карантин æрæййæфта æмæ рæстæгмæ æрурæдтам нæ куыст. Уымæн æмæ æххæст кæнын хъæуы Хицауады уынаффæ. Уыдон дæр адæмы тыххæй рахастой уыцы уынаффæ. Ныр та, куыд уынут, афтæмæй райдыдтам кусын. Нæ куысты æппындæр ницы проблемæтæ ис. Æрмæст нæ хъыгдары иу хъуыддаг – нæ бон нæу æрласын цемент, фæндæгтæ æхгæд кæй сты, уый аххосæй. Цемент нын кæй нæй, уый тыххæй нæ куыст размæ нæ цæуы. Бындуры арæзтад нын афонмæ фæуыдаид, иу 30 – тоннæйы бæрц нæм цемент куы уыдаид, уæд. Монолит Хуссар Ирыстоны кæй ничи аразы, уымæ гæсгæ æз æрхуыдтон бригадæ Цæгат Ирыстонæй æмæ сын æххуыс та кæнынц нæхи бынæттон кусджытæ. Цы дыууæ æртæуæладзыгон хæдзары хъуамæ саразæм, уыдон уыдзысты 18-фатеронтæ. Проектмæ гæсгæ сын уыдзæнис, æртæ метры бæрзæндæн чи уа, ахæм ныккæндтæ дæр. Фатертæ уыдзысты дыууæ æмæ æртæхатæнонтæ. Хæдзæрттæн арæзт хъуамæ æрцæуа кæрт æмæ машинæтæ уромæн бынат. Корпусæй корпусы æхсæн уыдзæнис 15 метры бæрц», – зæгъы арæзтады разамонæг.
Зæгъойты Феликс ма нын куыд загъта, афтæмæй сæ арæзтадон фирмæ ООО «Монах» баконд æрцыдис 2005-æм азы æмæ уæдæй абонмæ сæ куыст æххæст кæнынц нæ республикæйы хæрзæбонæн.
«Фылдæр мах арæзтам, 2008-æм азы хæсты рæстæджы чи ныппырх сты, уыцы хисæрмагонд хæдзæрттæ, цалцæг кодтам скъолаты, Дзауы районы сывæллæтты цæхæрадон дæр у мах арæзт», – загъта Зæгъойты Феликс.
Цхуырбатты Ларисæ
Comments are closed, but trackbacks and pingbacks are open.