Боны фæткы – 2019 азæн инвестицион программæ реализаци кæныны фарстатæ

РХИ-йы Президент Бибылты Анатоли æмбырд ауагъта 2019 азæн Хуссар Ирыстоны социалон-экономикон рæзтæн ахъазгæнæг Инвестицион программæ реализаци кæныны фарстыты фæдыл.

Æмбырды куысты хайад райстой Хицауады Сæрдар Пухаты Эрик, йæ хæдивæг, экономикон рæзты министр Бекъойты Геннади, Арæзтад, архитектурæ æмæ цæрæнуатон-коммуналон хæдзарады министр Зæгъойты Эдуард, подрядон организациты къухдариуæггæнджытæ.

Президент бахатыд æмбырды хайадисджытæм, цæмæй йын уыдон фехъусын кæной Инвестицион программæйы алы объекты уавæры тыххæй дæр.

«Фактон æгъдауæй программæйы реализаци райдыдта. Фæнды мæ, цæмæй информаци райсон объектты тыххæй æмæ иууыл сæйрагдæр та – саразгæ графиктæм гæсгæ æмгъуыдты тыххæй», – загъта Бибылты Анатоли.

Арæзтад, архитектурæ æмæ цæрæнуатон-коммуналон хæдзарады министр Зæгъойты Эдуард радзырдта, зæгъгæ, «Инвестпрограммæйы 36 объектæй абоны бон кусынц 23 объектыл, 12 объекты куыстытæ нæма райдыдтой  æмæ иу объекты – Вагзалгæрон уынджы сабидоны арæзтад та кæронмæ фæцис».

Зæгъойты Эдуард банысан кодта, зæгъгæ, 12 объекты куыстытæ фæстиат кæнынц, сæйраджыдæр, проектон-сметæйон документацийыл ногæй бакусыны æнæмæнгхъæуындзинады æмæ боныгъæды уавæртæм гæсгæ.

Æмбырды хайадисджытæ уæлдай хъусдард аздæхтой Хуссар Ирыстоны районты электрохызæгты модернизацимæ. Инвестпрограммæйы ацы пункты фæдыл куыст æххæст кæны паддзахадон унитарон куыстуат «Энергоресурс – Хуссар Ирыстон». Бибылты Анатоли бацымыдис кодта, зæгъгæ, арæзтадон æрмæджыты заводы хъомысæй пайда цæуы электрохызæгты цæджындзтæаразыны тыххæй  æмæ бынæттон куыстуатæн йæ бон у закъазтæ сæххæст кæнын.

Хицауады Сæрдары хæдивæг – экономикæйы рæзты министр Бекъойты Геннади банысан кодта, зæгъгæ, ног электрохызæгты 2 мин цæджындзы саразын йæ бон у заводæн. Бибылты Анатоли æрдомдта иуæй-иу объектты куыстытæ фæтагъддæр кæнын, афтæ ма Республикæ Хуссар Ирыстон æмæ Уæрæсейы Федерацийы ‘хсæн социалон-экономикон æмгуыстады фæдыл Æхсæнхицауадон къамисы рабадтмæ цæттæгæнæн куыстытæ сæххæст кæнын, кæцы уагъд æрцæудзæн ацы аз апрелы мæйы.

2019 азæн Инвестицион программæйы объектты ‘хсæн сты бирæфатерон цæрæн хæдзæрттæ, донуадзæн Уанат-Цхинвал, Республикон гуырæн  хæдзар,  скъолайы кары агъоммæйы уагдæттæ, Цхинвал  æмæ Хуссар Ирыстоны районон центрты уынгты хæрзарæзтад, горæты парчы хæрзарæзтад æмæ афтæ дарддæр.

РХИ-йы Президент æмæ  Хицауады пресс-службæ