Боны фæткы – Инвестпрограммæ реализаци кæныны, æхсæнхицауадон къамисы рабадтмæ бацæттæ кæныны фарстатæ

31 октябры нæ республикæмæ кусæгон балцы æрцыд Цæгат Кавказы хъуыддæгты фæдыл УФ-йы министры хæдивæг Игорь Кошин. Йæ хайадистæй РХИ-йы Президент Бибылты Анатоли ауагъта æмбырд Республикæ Хуссар Ирыстон æмæ Уæрæсейы Федерацийы æхсæн социалон-экономикон æмгуыстады фарстаты фæдыл.

Æмбырды ма хайад райстой Хицауады Сæрдар Пухаты Эрик, Президенты Администрацийы къухдариуæггæнæг Козаты Игорь æмæ республикæйы министрадты сæргълæуджытæ. Æмбырды хайадисджытæ уынаффæ кодтой 2018-2019 азты республикæйы социалон-экономикон рæзтæн ахъазгæнæг Инвестицион программæ реализаци кæныны, афтæ ма РХИ æмæ УФ-йы æхсæн социалон-экономикон рæзты Æхсæнхицауадон къамисы радон рабадтмæ бацæттæ кæныны фарстаты фæдыл. Къамисы рабадт уагъд цæудзæн ацы аз 15 ноябры Мæскуыйы.

Бибылты Анатоли банысан кодта Инвестицион программæйы ахсджиагдзинад, зæгъгæ, республикæйы цы æвæрццаг ивындзинæдтæ цæуы, уыдон баст сты йæ реализаци кæнынимæ.

«Абоны бонмæ Инвестицион программæйæн сæххæст йæ 70 проценты. Уый хорз фæстиуæг у. Афæдзы кæронмæ уыдзысты ног хыгъдтæ, 15 ноябрмæ нырма фаг рæстæг ис, цæмæй куыстытæ кæронмæ бахæццæ уой. Æхсæнхицауадон къамисы рабадты хъуамæ бæрæг æрцæуой ног хæстæ, фæстиуджытæ арæзт æрцæуа бакæнгæ куыстытæн æмæ æруынаффæ чындæуа 2020-2022 азтæн Инвестицион программæйыл», – загъта паддзахады сæргълæууæг.

Уый ма банысан кодта Хуссар Ирыстоны газификацийы ахсджиагдзинад дæр. Йæ ныхæстæм гæсгæ ацы проект здæхт у Хуссар Ирыстоны цæрджытæн царды хæрзвадат уавæртæ саразынмæ.

Йæ рады Игорь Кошин банысан кодта, арæзтцæуæг объектты куыстытæ тагъд темптæй кæй цæуынц. Уыдоны нымæцы ис Гуфта-Къуайсайы фæндаджы арæзтад дæр. Фæндаг  куыд арæзт цæуы, уый Игорь Кошин  федта йæхæдæг.

«Абон мах æркæсдзыстæм, Æхсæнхицауадон къамисы уынаффæ кæуыл цæудзæн, уыцы сæйрагдæр фарстатæм. Фæстиуджытæ сараздзыстæм афæдзæн æмæ снысан кæндзыстæм ног плæнттæ 2019 азæн. Уымæй дарддæр ма æрдзурдзыстæм радон Инвестицион программæйыл дæр. Уæрæсейы Федерацийы хицауад æрмæст æргом ныхас нæ кæны, йæ разы лæууы бæлвырд хæс – æппæт тыхтæй дæр республикæйæн æххуыс кæнын», – загъта Игорь Кошин.