26 ноябры Цхинвалы зæрæдты æмæ инвалидты хæдзар «Забота»-йы уагъд æрцыд бæрæгбонон концерт Мады боны цытæн.
Бæрæгбонон мадзал сорганизаци кодта РХИ-йы Парламенты депутат Уалыты Розæ парти «Иууон Ирыстон»-ы номæй. Концерты ралæууыд Цхинвалы районы культурæйы управленийы вокалон къорд «Арвырон» – аивадон къухдариуæггæнæг Сапиты Залинæ. Мадзал ауадзыны хъуыддаджы сын баххуыс кодта парти «Иууон Ирыстон»-ы сæрдар Тадтаты Алан æмæ Цхинвалы дзулфыцæн комбинаты директор Цхуырбаты Вадим.
Мадзалы райдианы Уалыты Розæ раарфæ кодта æрæмбырдуæвджытæн Мады боны цытæн æмæ зæрæдты хæдзары цæрджытæн йæ цæст бауарзта æнæниздзинад.
«Мæнæн тынг æхсзыгон у, абон сымах бæрæгбонæй хайджын кæй стут, уый. Мад у иууыл зынаргъдæр адæймагæн æмæ йын иу лæгъз ныхас дæр бирæ циндзинад æрхæссы. Абон уын арфæ кæнын Мады боны цытæн æмæ уын мæ цæст уарзы хъæддыхдзинад, æнæниз-дзинад æмæ бирæ азты цæрæнбон», – загъта уый.
Парламентари ма бузныджы ныхæстæ загъта, ацы мадзал ауадзынæн сын чи баххуыс кодта, æппæт уыдонæн.
Концерты хайад райстой Мамиты Григорий, Саппиты Залинæ, Кристина Гогинова, Задыты Олеся æмæ Плиты Нодар.
Мадзалы кæрон Уалыты Розæ æмæ партийы минæвæрттæ зæрæдтæн бакодтой зæрдылдарæн лæвæрттæ æмæ сын байуæрстой адджинæгтæ.
Зæрæдты æмæ инвалидты хæдзар «Забота»-йы директор Теблойты Чермен бузныджы ныхæстæ загъта мадзалы организатортæ æмæ йæ хайадисджытæн, æмæ банысан кодта, тынг æхсызгон ын кæй у, зæрæдтæ æнæхъусдардæй кæй нæ зайынц, уый.
Comments are closed, but trackbacks and pingbacks are open.