Ацы аз нæ республикæйы дæс раны сæвæрдзысты сывæллæттæн хъазæн фæзтæ. Уый тыххæй фехъусын кодта политикон парти «Ныхас»-ы сæргълæууæг Бесаты Зитæ.
Уыдонæй иу æвæрд æрцæудзæнис БАМ-ы районмæ хæстæг, фæсвæд фæндаджы былыл. «Ацы район стыр у, бирæ дзы ис сывæллæттæ. Территори йæхæдæг дæр бар дæтты, цæмæй дзы сывæллæттæн хиирхæфсæн хъазæнтæй дарддæр арæзт æрцæуой велофæндаг, бассейн æмæ роликтыл кæм хъазой ахæм фæзуат. Ацы территори лæвæрд уыд Гæбæраты Эдуардмæ æмæ йæм хорз идейæтæ ис. Мах цæттæ стæм уыдон реализаци кæнынмæ. Ацы бонты уал бавналдзыстæм сывæллæттæн хъазæн фæз аразынмæ. Уый фæстæ арæзт æрцæудзысты, уæлдæр цы загътам, уыдон дæр», – загъта Бесаты чызг.
Цæрджыты куырдиатмæ гæсгæ хъазæн фæз арæзт æрцæудзæн Исахъы уынджы дæр, бирæуæладзыгон хæдзæртты ‘хсæн. Алыгъуызон ирд хуызтæй ахуырст ифтонггæрзтæ æхсызгондзинад хæсдзысты чысыл сабитæн æмæ скъоладзаутæн.
Æртыккаг фæз та арæзт æрцæудзæн горæтгæрон, Шанхайы районы. Ам дæр уыдзæн хъелаугæнæнтæ, чысыл скалодром æмæ æндæр хиирхæфсæнтæ.
Иннæ авд хъазæн фæзы та лæвæрд æрцæудзысты районтæн. «Сабитæ нæ рæсугъд фидæн сты. Уыдон сæ рæзгæ бонтæ хъуамæ хъæлдзæгæй æрвитой. Канд районты центрты нæ, фæлæ ма дæрддзæф хъæуты дæр хъуамæ уа сывæллæттæн хъазæн фæзтæ. Стæй хицæнæй та тренажертæ, волейбол æмæ футболы фæзтæ дæр», – загъта ма Бесаты Зитæ.
Ацы проекты реализацийæн Парламентон парти «Ныхас»-æн баххуыс кæндзæн Президенты Администрацийы управлени дæр. Арæзтадон куыстытæ ма хъуамæ ныддаргъ уой. Æппæт куыстытæн лæвæрд цæуы иу мæйы æмгъуыд.
УАЗÆГТЫ Марфа
