12 июны бæрæгбонон мадзæлттыл афæлгæст
Цхинвалы ацы сæрдыгон рæсугъд бон Уæрæсейы боны цытæн уагъд æрцыдис бæрæгбонон мадзæлттæ. Уыдонæй сæ иу ацыдис Уырыссаг хæдзары раз. Ам цытджын æгъдауæй бæрзонд систой уырыссаг тырыса æмæ уый фæстæ айзæлдис гимн дæр.
Уырыссаг хæдзары сæргълæууæг Сергей Комиссаров, фыццаджыдæр, йæ раныхасы бæрæгбоны сæраппонд арфæ ракодта адæмæн æмæ банысан кодта ахæм мадзал Хуссар Ирыстоны кæй суыдзæн «Россотрудничество»-йæн традицион. Уырыссаг дипломат æрдзырдта Уæрæсе æмæ уырыссаг æвзаг хъомысджын æмæ тыхджын кæй сты, уый фæдыл. «Абон уырыссаг æвзагыл дзурджытæ сты тынг бирæ, уыдонæн сæ нымæц æгас дунейы хизы 250 милуанмæ», – загъта уый.
Уæрæсейы боны цытæн Сергей Комиссаров схорзæхджын кодта æндæр æмæ æндæр конкурсты активистты æмæ уæлахиздзауты æмæ уый фæстæ сывæллæттæ равдыстой концерт.
«Мæ уарзон Уæрæсе»
Ахæм темæимæ адарддæр ис Уæрæсейы бæрæгбон нæ горæты Анахарсисы номыл Национ библиотекæйы. Ам уыдис уырыссаг культурæйы XII фестиваль «Моя любимая Россия». Фестивалы хайадисджытæн уыд хæслæвæрд, цæмæй Уæрæсейы куыд æмбарынц æмæ йын куыд аргъ кæнынц, уый ахорæнты руаджы равдыстаиккой – сæ хъуыдытæ æмæ сæ фантази равдыстой нывгæнæн гæххæттытыл.
Фестивалы хайадисджытыл хъæлдзæгæй сæмбæлдис Сергей Комиссаров. Уый æппæтæн дæр раарфæ кодта Уæрæсейы боны цытæн æмæ йæ цæст алкæмæн дæр бауарзта сфæлдыстадон æнтыстытæ.
Сергей Комиссаров куыд банысан кодта, афтæмæй сывæллæтты куыстытæн аргъ кæндзысты Уырыссаг хæдзары æмæ иууыл хуыздæр нывты автортæн организаци æрцæудзæн балц Уæрæсемæ.
Фестивалы кæрон номинацитæ «хуызфыссынад», «декоративон-прикладон аивад» æмæ «аивадон дзырд»-ы уæлахиздзаутæ хорзæхджын æрцыдысты цытджын æгъдауæй, сывæллæттæ фæцин кодтой сæ куыстытыл æмæ бæрæгбоны хорзæхтыл дæр.
«Гжель» – Цхинвалы уазæг
Хъæлдзæг æмæ рæсугъдæй бæрæгбон балхынцъ кодта Мæскуыйы кафты паддзахадон академион ансамбль «Гжель». Уыдон Хуссар Ирыстоны концерт равдыстой нæ республикæ æмæ Уæрæсейы Федерацийы культурæты министрадты бадзырдмæ гæсгæ, Росконцерты æххуысæй, программæ «Обменные культурные мероприятия России и Южной Осетии»-йы фæлгæтты.
Мæскуыйаг ансамблы концертмæ æрбацыдысты Республикæ Хуссар Ирыстоны Хицауады Сæрдар Джуссойты Константин, Хуссар Ирыстоны Уæрæсейы Федерацийы æххæстбарджын минæвар Марат Кулахметов, РХИ-йы Культурæйы министр Зæгъойты Рада æмæ нæ хицауады æндæр бæрнон адæймæгтæ.
Æппæт адæмæн Уæрæсейы боны цытæн арфæ ракодта Марат Кулахметов æмæ банысан кодта бæрæгбоны нысаниуæг, кæцыйæн ис арф хъуыды æмæ хъæздыг истори.
«Зынаргъ адæм, мах кæддæриддæр хъуамæ буц æмæ сæрыстыр уæм нæ тыхджын æмæ хъомысджын Райгуырæн бæстæйæ æмæ йæ хъуамæ фидар уарзтæй уарзæм. Ацы ныхæстæ хуымæтæджы нæ зæгъын. Абон мах æвзарæм зындзинæдтæ, баиугонд Ныгуылæн бæстæтæ архайынц, цæмæй нын нæ ныфс асæдтой æмæ нæ скуынæг кæной, уымæ гæсгæ нæ хъæуы консолидаци. Сæрмагонд æфсæддон операци дæр æвдисæг у, Уæрæсейы Федераци æмæ Хуссар Ирыстоны хæстонтæ кæй æрбалæууыдысты кæрæдзи фарсмæ æмæ кæй тох кæнынц нæ кæстæрты хорз фидæныл», – загъта Марат Кулахметов.
Культурæйы министр Зæгъойты Рада дæр Уæрæсейы боны цытæн арфæ ракодта залы адæмæн æмæ банысан кодта Хуссар Ирыстон æмæ Уæрæсейы Федерацийы æфсымæрдзинад, æнустæм фидар тæгтæй баст кæй стæм, уый.
«Мах кæддæриддæр стыр аргъ æмæ кад кæнæм Уæрæсейы адæмæн, йæ хъæздыг культурæ æмæ историйæн. Абон мах Хуссар Ирыстоны уырыссаг адæмимæ иумæ нысан кæнæм Уæрæсейы бон. Нæ иумæйаг бæрæгбон банысан кæныны тыххæй нæм фæуазæг ис мæскуыйаг сфæлдыстадон коллектив «Гжель». Фыццаг хатт ис Цхинвалы æмæ нын срæсугъд кæндзæн нæ изæр», – загъта министр.
Ансамбль «Гжель» паддзахадон театры сценæйыл равдыста йæ репертуарæй иууыл цымыдисондæр номыртæ. Ирон аивадуарзджыты раз артисттæ сæххæст кодтой ахæм хореографион номыртæ куыд «Сирень», «Яблочко», «Барыня», «Виртуозы», «Костромская скань», «Зимушка» æмæ æндæртæ. Уырыссаг ансамблы артисттыл хъæлдзæг зæрдæты равгимæ æмбæлдысты хуссарирыстойнаг сценæмæкæсджытæ, уыдон федтой æцæг уырыссаг аивад.
Нæ уацх.
