Хуссарирыстойнаг спортсментæ хайад исынц Казаны уагъдцæуæг БРИКС-ы бæстæты Спортивон хъæзтыты спорты ахæм хуызтæй, куыд уæгъдибар хъæбысхæст, бокс, фиджитал – футбол, спортивон гимнастикæ, шахматтæ æмæ стъолы теннисæй. Командæйы ис 34 адæймаджы. Хуссар Ирыстонæй фыццаг ралæууыд гимнаст Бæззаты Александр. Уый финал­мæ ахызт дыууæ дисциплинæйæ. Иуæй дзы бацахста 7-æм бынат æмæ иннæ дисциплинæйæ та – 8-æм бынат. Иумиагæй гимнастикон центры ерыс кодтой 200 хайадисæджы дунейы 90 бæстæйæ. Бæззайы фыртæн уый у хорз æнтыст, уымæн æмæ ерыс кодта тыхджын спортсментимæ.

 

Самбо

Дзауы самбойы скъолайы хъомылгæнинæгтæ дыууæ къуыримæ æртæ хатты хайад райстой Дзæуджыхъæуы уагъдцæуæг ерысты. Нырма уал сæ тыхтæ фæлвæрдтой Цæгат Ирыстоны гом командон ерысты. Уым йæхи уæлдай хуыздæр равдыста Бежанты Сæрмæт. Уый йæ тохтæ иууылдæр рамбылдта. Фæстæдæр тренер Хъоцыты Та­мерланы хъомылгæнинæгтæ хайад райстой, 14 азы онг кæуыл цæуы, уыцы богалты ‘хсæн Цæгат Ирыстон-Аланийы гом чемпионаты. Уым æртыккаг бынат бацахста Хъоцыты Марат, фæлæ дзауаг самбисттæн уæлдай хуыздæр бæрæггæнæнтæ уыд, 1­6 азы онг кæуыл цæуы, уыцы спортсменты ‘хсæн Цæгат Ирыстон-Аланийы чемпионаты. Уым ма майдантыл тох кодтой Кæсæг-Балхъар, Цæцæн æмæ Стъараполы крайы минæвæрттæ. Ацы ерысты Хъоцыты Тамерланы хъомылгæнинæгтæй ерысты уæлахиздзау ссис Тедеты Хетæг. Дыккаг бынæттæ  бацахстой Бежанты Сæрмæт æмæ Карсанты Олег. Ерысты  æртыккаг ссис Гаглойты Аслан. Уымæн та йæ тренер  у Беджызаты Гия.

Футбол

Цхуырбаты Гурамы номыл республикон стадионы уагъд æрцыдысты президенты призтæ рамбулыны сæраппонд Республикæ Хуссар Ирыстоны чемпионаты 3-æм туры хъæзтытæ. Турнир райдыдта 1-æм июны. Уæд уагъд æрцыдысты фыццаг хъæзтытæ. Чемпионаты хайад  исынц 8 командæйы. Уыдоны ‘хсæн ис цхинвайлаг микрорайон «Массив»-ы командæ дæр. Ацы командæ февралы мæйы ссис мини-футболæй æнæпрофессионалон футболон къорды уæлахиздзау. Уым хъазынц иууыл кардзыддæр футболисттæ. Фæлæ, уымæ æнæкæсгæйæ, командæ нымад у чемпионаты сæйрагдæр фавориттæй сæ иуыл. Фæлтæрдджын футболистты ныхæстæм гæсгæ сæ фæнды рæзгæ фæлтæрæн цæвиттон равдисын, адæймагæн спорт куыд пайда у, уый сын бамбарын кæнын.

Æртыккæгæм туры спортуарзджыты стыр хъусдард сæхимæ аздæхтой дыууæ хъазты. Сæ иуы Милицийы сæрмагонд нысаниуæджы къорды командæ 3:2 хыгъдæй фæ­уæлахиз «Дыргвис»-ыл. Дыккаг нысаниуæгджын хъазты та фембæлдысты «Массив» æмæ турниры иууыл цырддæр æмæ цымыдисондæр командæтæй сæ иу «Борз». Хъазты райдианы хыгъд байгом кæнын бантыст массивæгтæн. Фæлæ «Борз»-ы хъазджытæн кодтой хыгъд сæмхуызон. Дарддæр дыууæ командæ дæр кæрæдзи кулдуæртты раз сæвзæрын кодтой бирæ хорз гæнæнтæ пурти кулдуары бакъуырыны тыххæй, фæлæ сæ не спайда кодтой. Спортуарзджытæ æнхъæл уыдысты æмæ хъазт фæуыдзæн æмдыхæй. Фæлæ ма фембæлды кæронмæ цалдæр минуты куыд хъуыд, афтæ «Массив»-æн бантыст фæстиуæгджын цырд контратакæ саразын. Афтæмæй 2:1 хыгъдæй уæлахаиз бафтыд «Массив»-ы къухты.

Ныр «Массив» æмæ ОМОН-ы командæтæ æрæмбырд кодтой фæйнæ 9 очкойы æмæ турнирон таблицæйы дих кæнынц фыццаг æмæ дыккаг бынæттæ.

Ноджы ма иу хъазты та «Фæсивæд» фæуæлахиз «Æфсати»-йыл.

Чемпионаты регламентмæ гæсгæ æрдæгфиналмæ хизынц фыццаг цыппар бынат бацахсæг командæтæ.

Турниры уæлахиздзау Президенты номæй хорзæхджын æрцæудзæн æхцайы преми – 100 мин сомæй. Дыккаг бынат æрцахсæг командæ ахæсдзæн 50 мин со­мы æмæ æр­тыккаг бынатыл ацæуæг командæйæн та лæвæрд æрцæудзæн 30 мин сомы.

Афтæ ма фыццаг дыууæ бынат æрцахсæг командæтæн фадат уыдзæн Ирыстоны Кубокы хайад райсынæн.

 

ХУРИТЫ Батрадз

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.