6-æм июны, куыд æппæт Уæрæсейы Федерацийы, афтæ Цхинвалы дæр банысан кодтой «Уырыссаг æвзаджы бон». Уыимæ ма иумæ зынгæ уырыссаг поэт Александр Пушкины райгуырдыл 220 азы кæй сæххæст, уый цытæн арæзт æрцыд цытджын мадзал поэты цыртдзæвæны раз. Бацæттæ йæ кодтой Хуссар Ирыстоны уырыссаг æвзаг æмæ литературæйы Ассоциаци æмæ Россотрудничествойы кусджытæ.
Цытджын мадзалмæ фæуазæг сты бæстæйы Президент Бибылты Анатоли, Хуссар Ирыстоны Уæрæсейы Федерацийы Уæлвæткон æмæ Æххæстбарджын минæвар Марат Кулахметов, Ахуырад æмæ зонады министр Гасситы Натали, Тыбылты Алыксандры номыл Хуссар Ирыстоны паддзахадон университеты ректор Тедеты Вадим, горæт Цхинвалы администрацийы сæргълæууæг Коцты Алан, уырыссаг æвзаджы ахуыргæнджытæ, ахуырдзау фæсивæд.
Мадзалы ныхас кæнгæйæ, Хуссар Ирыстоны уырыссаг æвзаг æмæ литературæйы Ассоциацийы президент Тедеты Залинæ банысан кодта, зæгъгæ, Пушкин у уырыссаг æвзаг æмæ литературæйы символ æмæ йын æдзух хъæуы кад кæнын.
«Пушкин ахæм хайбавæрд бахаста уырыссаг æвзаджы рæзтмæ æмæ йæ абарæн никæимæ ис. Йе сфæлдыстад стыр бынат ахсы канд уырыссаг адæмы царды нæ, фæлæ ма нын схъæздыг кодта не ‘хсæнадон цард дæр. Николай Гоголь дæр ма афтæ фыста, зæгъгæ, уырыссаг поэттæй Пушкины бæрзæндтæм никæй бон ссис схизын æмæ Пушкины йеддæмæ национ хæзна никæй ис схонæн», – загъта Тедеты Залинæ.
Бибылты Анатоли дæр йæ раныхасы бафиппайдта, зæгъгæ, цæмæдæр гæсгæ Пушкины æмдзæвгæтæ æнцондæр ахуыргæнæн уыдысты скъолайы.
«Хорз æй хъуыды кæнын, скъолайы ма куы ахуыр кодтон, уæд-иу Пушкины фыст æмдзæвгæтæ уайтагъд бахъуыды кодтон. Уый та, æвæццæгæн, уымæн, æмæ Пушкины бон уыдис хуымæтæг дзырдтæй арф хъуыды радæдтын, адæймаджы æнкъарæнтæ ирдæй равдисын, райгуырæн бæстæмæ патриотизм æмæ уарзондзинад равдисын. Абоны бон уырыссаг æвзаджы фæрцы исæм зонындзинæдтæ æмæ размæ цæуæм. Стыр ахадындзинад ис Пушкины сфæлдыстадæн æмæ мæ фидарæй уырны, сæдæ азы фæстæ дæр кæй уыдзæн нымад стыр курдиатджын гоймагыл, уымæн æмæ у адæмы уарзондæр поэт», – банысан кодта бæстæйы Президент.
Марат Кулахметов та йæ раныхасы банысан кодта, зæгъгæ, æппæт Советон Цæдисы иу адæймаг дæр нæ уыдис ахæм, кæцы нæ зыдта Пушкины. Загъта, зæгъгæ, нæ ныййарджытæ хорз зонгæ кæй уыдысты Пушкины сфæлдыстадимæ, уый фæстиуæгæн махмæ дæр радæдтой Пушкины уарзондзинад адæммæ æмæ райгуырæн бæстæмæ, йæ арф мидисджын хъуыдытæ, базонгæ нæ кодтой йæ рæсугъд поэзиимæ.
Гасситы Натали дæр йæ раныхасы бафиппайдта, зæгъгæ, кæд уырыссаг æвзаг тынг хъæздыг у, кæд ыл 150 милуан адæймаджы дзургæ кæнынц æмæ 100 милуан адæймагæн та дыккаг мадæлон æвзаг у, уæддæр у вазыгджын. Ӕмæ уырыссаг æвзагыл дзургæйæ, адæймаджы хъуыдымæ фыццаг æрцæуы Пушкин, кæцы у уырыссаг литературон æвзаджы бындурæвæрæг, уырыссаг культурæйы символ.
Россотрудничествойы къухдариуæггæнæг Сергей Скворцов та æрдзырдта æппæтадæмон конкурс «Ай да Пушкин!»-ы тыххæй, кæцы уагъд цæуы Александр Пушкины райгуырдыл 220 азы сæххæсты цытæн. Хайад дзы райстой иу мин адæймагæй фылдæр 54 фæсарæйнаг бæстæйæ. Хуссар Ирыстонæй дзы финалмæ ахызтысты æртæйæ – Зассеты Максим, Тедеты Аннæ æмæ Беппиты Алинæ. Сергей Скворцов куыд фехъусын кодта, афтæмæй Хуссар Ирыстон, Китай æмæ Индийы минæвæрттæ систы конкурсы уæлахиздзаутæ.
Уырыссаг æвзаг æмæ литературæйы хуыздæр ахуыргæнджытыл нымад æрцыдысты Бедойты Элеонорæ æмæ Цхуырбаты Наирæ. Сергей Скворцов сæ сæ профессионалон хъарудзинады тыххæй схорзæхджын кодта грамотæтæй.
Бæрæгбонон мадзалы ма æмдзæвгæтæ бакастысты скъоладзаутæ æмæ стæй æрæмбырдуæвджытæ Пушкины цыртдзæвæны раз сæвæрдтой дидинджытæ.
Джиоты Александр
Comments are closed, but trackbacks and pingbacks are open.