Ирон режиссер æмæ сценарист Колыты Анатолийæн прокаты мадæлон æвзагыл рацыд æфсæддон драмæ «Авд сау гæххæтты». Ныридæгæн æм бакастысты Уæрæсейы бирæ горæтты æмæ йын адæм аккаг аргъ скодтой. Ног киноныв равдисдзысты Хуссар Ирыстоны адæмæн дæр 7-æм июны кино-концертон зал «Чермен»-ы.
Ацы кинонывы премьерæ уыдис 46-æм Мæскуыйы дунеон кинофестивалы конкурсон программæ «Русские премьеры»-йы фæлгæтты æмæ йæ фыццаг хатт адæмы тæрхонмæ рахастой 23-æм апрелы кинотеатр «Художественный»-йы.
Премьерон кинонывы æвдыст цæуы 1942 азы Цæгат Ирыстоны иу хæххон хъæуы царды истори. Ам бирæ бинонтæ афæндараст кодтой Стыр Фыдыбæстæйон хæстмæ сæ нæлгоймæгты. Хъæуы ма баззадысты зæрæдтæ, сылгоймæгтæ æмæ сывæллæттæ. Райгуырæн бæстæ немыцаг фашисттæй бахъахъхъæныны тыххæй дыууæ æфсымæры Бечыр æмæ Дзамбол дæр сæ мад Дзерассæимæ афæндараст кодтой сæ хæдзардарæг фыды æмæ йын йе ‘рцыдмæ æнхъæлмæ кæсынц æнæрхъæцæй. Сæ хæстон сыл сæрæгасæй сæмбæлдзæнис, уый ныфсæй сæ уæззау царды бонтæ æрвыстой, афтæ ма æндæр рыстзæрдæ бинонтæн дæр сæ ныфс сæттын нæ уагътой.
Хæст нырма йæ райдианы ис, зæгъгæ, фæлæ постхæссæг хæххон хъæумæ фæхæццæ кодта фыццаг æртæкъуымон сау гæххæтт æмæ афтæмæй кæйдæр бинонтыл сау бон акодта. Райхъуыст ирон сылгоймаджы хъарæг æмæ хъæу бамыр. Дыууæ æфсымæры зæрдæтæ афтæ фæрыстысты сæ сыхаг сылгоймаджы стыр рисæй, стæй тæрсгæ дæр кодтой сæ фыды ном дæр, мыййаг, сау гæххæттыты ‘хсæн куы феной æмæ уæд Бечыр йе ‘мцахъхъæн постхæссæджы сразы кодта, цæмæй ма йæм ахæм сау гæххæтт куы радтой, уæд æй сæ хъæумæ мауал схæсса, цалынмæ хæст фæуа, уæдмæ. Бечыр ын бамбарын кодта, зæгъгæ, уыцы сидзæртæ æмæ идæдз сылгоймæгтæн сæ фæстаг ныфсытæ ма байс, уадз, æмæ, зæгъгæ, фæлтау æнхъæлмæ кæсæт сæ хæстонты æрцыдмæ. Афтæмæй дыууæ æфсымæры æмæ постхæссæг Илас хъæуы иу мæсыджы æмбæхстой сау æртæкъуымон гæххæттыты.
Иу рæстæджы Бечыр æмæ Дзамболат базондзысты, сæ фыд фронты кæй фæмард æмæ уæд Бечыр аскъуыддзаг кæндзæнис хæстмæ ацæуын, цæмæй йæ фыды æмæ райгуырæн бæстæйы маст райса знагæй.
Премьерон драмæ ист цыдис Цæгат Ирыстоны хæххон хъæутæй цалдæры. Кинонывы ролтæ сæххæст кодтой цæгатирыстойнаг артисттæ – Лацойты Зитæ, Хъараты Максим, Абойты Зауырбег, Дзуццаты Дзамболат, Гуыбеты Хъазбег, Кокойты Андрей æмæ æндæртæ.
Коцты Еленæ
