Казаны уагъдцæуæг БРИКС-ы бæстæты спортивон хъæзтыты Хуссар Ирыстоны командæйы минæвæрттæ рамбылдтой фыццаг майдантæ. Расгуыхтысты уæгъдибар хъæбысхæстæй архайæг богалтæ. 125 кг уæзы категорийы дыккаг бынат бацахста Зассеты Азæмæт. Йæ хистæр æфсымæр Зассеты Алан та æртыккаг бынат бацахста 86 кг уæзы категорийы. Ацы хорзæх рамбулыны сæраппонд тохы йæ ныхмæлæууæг уыд Китайы минæвар Цзы­чэнь Ли. Ноджы ма иу бронзæйон хорзæх бафтыд Джиоты Азæмæты къухты. Уый та 79 кг уæзы категорийы æртыккаг бынат бацахсыны сæраппонд тохы рамбылдта Узбекистаны минæвар Асомиддин Хасановы.

Æртыккаг бынат бацахсынмæ æввахс уыд 97 кг уæзы категорийы нæ бæстæйы спортивон кад хъахъхъæнæг Дзеранты Эрик.

Ацы æртæ майдан рамбулыны фæстæ РХИ-йы æмбырдгонд командæ турнирон таблицæйы 90 бæстæйы ‘хсæн ахсы 19-æм бынат.

 

Тедеты Бахва – «Алани»-йы генералон директор

Дзæуджыхъæуы футболон командæ «Алани»-йы къухдариуæгады æрцыд ивындзинæдтæ. Клубы ног генералон директорæй снысан кодтой раздæры легендарон футболист Тедеты Бахвайы. Йæ спортивон карьерæйы рæстæджы уый «Алани»-йы сконды акодта 250 хъазтæй фылдæр æмæ бакъуырдта 82 пуртийы. У Уæрæсейы чемпион æмæ дыууæ хатты æвзист призер. Æртæ хатты уыд «Алани»-йы сæйраг тренер.

Раздæр командæйы генералон директоры бынатæй сæрибар æрцыд Сиукъаты Руслан. «Алани»-йы официалон сайтыл мыхуыр æрцыдысты Тедеты Бахвайы комментаритæ.

«Фыццаджыдæр мæ бузныг зæгъын фæнды клубы президент Гуыриаты Владимирæн æмæ вице-президент Данил Владимиры фыртæн ахæм бынат мыл кæй баууæндыдысты, уый тыххæй. Генералон директоры бынаты æппæтдæр бафæлвардзынæн мæныл баст цы у, цæмæй нæ командæ æнтыстджынæй архайа. Уый у мæ сæйраг хæс. Æххуыс кæндзыстæм тренерон штаб, хъазджытæн æмæ администрацийæн», – загъта Тедеты Бахва.

Банысан кæнын хъæуы уый дæр, æмæ «Алани»-мæ хъазынмæ кæй æрбацыд «Акрон»-ы æрдæгхъахъхъæнæг Сергей Макаров. Футболистимæ контракт арæзт æрцыд дыууæ азы æмгъуыдмæ.

ХУРИТЫ Батрадз 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.