Ацы бонты Хуссар Ирыстоны паддзахадон университеты уагъд æрцыд Уæрæсейаг историон æхсæнады минæварад байгом кæныны тыххæй бындураразæн æмбырд. Йæ хайадисджытæ уыдысты Уæрæсейаг историон æхсæнады правленийы сæрдар Гагкуты Руслан, Уæрæсейы Федерацийы Хуссар Ирыстоны Æххæстбарджын минæвар, Уæрæсейаг историон æхсæнады уæнг Гасситы Знауыр, Пушкины номыл уырыссаг æвзаджы паддзахадон институты зонады фæдыл проректор Туаты Бертæ, Цæгат Ирыстон-Аланийы Уæрæсейаг историон æхсæнады хайады советы сæрдар Плиты Залинæ, Хуссар Ирыстоны Уæрæсейы Федерацийы Æххæстбарджын минæвар Марат Кулахметов æмæ æндæртæ.

Паддзахадон университеты ректор Тедеты Вадим йæ раныхасы банысан кодта Хуссар Ирыстоны историон æхсæнады минæварад байгом кæныны ахсджиагдзинад. Уымæн æмæ, зæгъгæ, Хуссар Ирыстон дæр хайад хъуамæ иса зындгонд уæрæсейаг историктæ æмæ раздæры советон цæдисы республикæты минæвæртты хайадистæй алыгъуызон конференцитæ æмæ тымбыл фынгты.

Хуссар Ирыстоны минæварад байгом кæныны хъуыддаг ахсджиаг цауыл банымадта Хицауады Сæрдары фыццаг хæдивæг Джиоты Алан. Мах, зæгъгæ, стæм уыцы цауы æвдисæнтæ абон. Историон æхсæнады архайды фæлгæтты ног форматтæ хорз импульс ратдзысты нæ æмахастытæн.

Хуссар Ирыстоны Уæрæсейы Федерацийы минæвар Марат Кулахметов куыд банысан кодта, уымæ гæсгæ минæварад саразыны сæйраг нысан у, истори чи уарзы, уыдон æрбангом кæнын. Уыдон сты историктæ, ахуыргæнджытæ, сфæлдыстадон интеллигенци, архивы кусджытæ.

«Хуссар Ирыстоны Уæрæсейаг историон æхсæнады архайды ахсджиагдæр здæхт у историимæ зонгæ кæнын, йæ амонын. Ацы куыст бакæнын æнæмæнгхъæуæг у, уæлдайдæр ныртæккæ, ныгуылæн истори зыгъуыммæ кæнынмæ куы хъавы, нæ фыдæлтæ цы æвзарæнты сæрты рацыдысты, махæн зынаргъ цы у, уыдæттæ хынцгæйæ», – банысан кодта уый.

Горæт Цхинвалы Россотрудничествойы сæргълæууæг Сергей Комиссаровы ныхæстæм гæсгæ Уæрæсейаг историон æхсæнад активонæй архайы историон мысынад бахъахъхъæныныл æмæ у æхсæнадон дипломатийы змæлдтытæй сæ иу.

Мæн, зæгъгæ, уырны æмæ абоны цау дæр кæй уыдзæн нæ бæстæты æхсæн ахастытæ рæзын кæнынæн нысаниуæгджын цау. Æрмæст историон фæткыл бакусыны тыххæй нæ хъарутæ бангом кæнын нæ, фæлæ дарддæр мысынад бахъахъхъæныл æвзонг фæлтæрты фæцалх кæнын æмæ Хуссар Ирыстон, куыд паддзахад, афтæ йæ рæзын кæнынæн ахсджиаг къахдзæф», – дзырдта Комиссаров.

Уæрæсейаг историон æхсæнады правленийы сæрдар Гагкуты Руслан банысан кодта, историон æхсæнадæн фæсарæнты кæй уæвынад кæны дыууæ минæварады – Республикæ Абхаз æмæ Сербаг Республикæйы. Ныр æртыккаг абон байгом Хуссар Ирыстоны.

«Уæрæсейаг историон æхсæнадæн коллективон юридикон уæнгты хуызы йе сконды ис 170 организацийы æмæ иу мины бæрц та æмбæстæгтæ. Æхсæнадæн хайадтæ ис Уæрæсейы Федерацийы 68 субъекты.

Нæ иумиаг истори хъуамæ парахатæй ахуыр цæуа æмæ йæ хъахъхъæнæм коллективон ныгуылæны ‘рдыгæй нæ ивгъуыд зыгъуыммæ кæнынæй», – банысан кодта Руслан.

Мадзалы рæстæджы мидисджын докладтæ сарæз­той инициативон къорды минæвæрттæ: паддзахадон бюджетон уагдон «Паддзахадон централон архив»-ы директор Уалыты Валентинæ, Анахарсисы номыл республикон Национ библиотекæйы директор Гуыцмæзты Иннæ, горæтон централизацион библиотекæты системæйы директор Прокопенко Иринæ, Националон музейы директор Зассеты Мераб.

Мадзалы рæстæджы инициативон къорды уæнгты уынаффæмæ гæсгæ Уæрæсейаг историон æхсæнады минæварады сæрдарæй æвзæрст æрцыд паддзахадон университеты ректор Тедеты Вадим, йæ хæдивæгæй та – иумиаг историйы кафедрæйы къухдариуæггæнæг, профессор, историон зонæдты кандидат Гатыгкоты Гиви.

Уæрæсейаг историон æхсæнад у уæрæсейаг зонадон æхсæнадон организаци, кæцы арæзт æрцыд 2012 азы. Йæ нысан у, паддзахадон архайджыты, ахуыргæндты, историуарзджыты хъарутæ баиу кæнын, иумиагуæрæсейон историон культурæ саразыны нысанæн объективонæй сахуыр кæнын, ныффыссын æмæ фыдыбæстæйон æмæ дунейы истори популяризаци кæнын. Уымæй дарддæр ма национ мысынад æмæ культурон цыртдзæвæнты объекттæ бахъахъхъæнын.

 

***

Президент Гаглойты Алан йæхимæ райста Уæрæсейаг историон æхсæнады (УИÆ) правленийы сæрдар, фонд «История Отечества»-йы æххæстгæнæг директор Гагкуты Русланы горæт Цхинвалы УИÆ-йы минæварад бакæныны фæлгæтты.

Фембæлды хайад райста УФ-йы РХИ-йы Уæлвæткон æмæ æххæстбарджын минæвар Гасситы Знауыр.

Гаглойты Алан раарфæ кодта республикæйы уазæгæн æмæ банысан кодта проекты реализацийы ахсджиагдзинад – Уæрæсейаг историон æхсæнады минæварад бакæнын.

«Зæрдылдарынад æмæ историон рæстдзинад бахъахъхъæнын у нæ иумæйаг хъуыддаг. Истори ногæй ныффыссын, факттæ зыгъуыммæ кæнын æмæ æргъадтæ фæивыны уæззау рæстæджы цæрæм. Историон мысынад бахъахъхъæныны фæдыл Хуссар Ирыстоны адæм æмæ къухдариуæгад архайынц æппæт тыхтæй. Мах цæттæ стæм алыварсон æххуысмæ», – загъта Президент.

Паддзахады сæргълæууæг ма банысан кодта, зæгъгæ, ирæттæ æмæ уырыссæгтæ фæрсæй фæрстæм тох кодтой Стыр Фыдыбæстæйон хæсты быдыры.

Гагкуты Руслан, йæ рады бузныджы ныхæстæ загъта паддзахады сæргълæууæгæн æмæ банысан кодта, зæгъгæ, уымæн тынг ахсджиаг кæй уыд ацы проекты реализаци кæронмæ бакæнын.

Уыимæ иумæ, уый ныфс бавæрдта, хуссарирыстойнаг историктæн проекты фæлгæтты сæ бон кæй суыдзæн профессионалон æгъдауæй рæзын æмæ райсын ног зонындзинæдтæ.

Уый банысан кодта УФ-йы РХИ-йы минæвард Гасситы Знауыры сæргълæудæй æххуыс организацион фарстаты, кæцытæ хауынц минæварад байгом кæнынмæ.

Гасситы Знауыры Президент схорзхæджын кодта Хæлардзинады орденæй республикæйы æддагполитикон курсы реализацийы сгуыхтдзинæдты тыххæй.

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.