Фæндагыл цæуыны фæткойтæ хъахъхъæнын абон нæ горæты хуыздæрхъуаг у. Уый хауы куыд машинæскъæрджытæм, афтæ фистæгæй цæуджытæм дæр. Хъыгагæн, нæ горæты, афтæ ма респубикæйы фæндæгтыл дæр арæх æрцæуы фæндагон-транспортон цаутæ. Ныртæккæ ахæм дуг æрцыд æмæ адæм æппынæдзух кæдæмдæр тагъд кæнынц: чи куыстмæ, чи – скъоламæ, чи та фæндагыл цæуыны фæткойтæ рæстмæ нæ зоны æмæ афтæмæй æрцæуы æнамонд цаутæ дæр. Уым ма ахъаз кæны ахæм уавæр дæр æмæ бирæтæ машинæ скъæрыны бары гæххæт райсынц, фæлæ горæты уынгты æдæрсгæйæ машинæ нæма скъæрынц, фæлтæрддзинад дæр сæм нæма вæййы æмæ афтæмæй аварион уавæртæ æвзæрын кæнынц.
Фистæгæй цæуджытæ та, иу стæмтæй дарддæр, не ‘ххæст кæнынц уынджы иу фарсæй иннæ фарсмæ ахизыны фæткойтæ. Фыццаджыдæр, уынгты кæм не ‘мбæлы, ууылты ахизынц. Ахизынц ма, светофоры цахæм рухс судзы, уымæ не скæсгæйæ дæр. Афтæмæй та светофортæ сты куыд машинæтæн, афтæ фистæгæй цæуджытæн дæр.
Иннæрдыгæй та, тротуарæй машинæйы фæндагмæ хизгæйæ хъæуы фæйнæрдæм акæсын, бирæтæ та комкоммæ араст вæййынц, машинæйы фæндагыл сырх судзы æви нæ, машинæ рацæуы æви нæ, уыдæттæм нæкæсгæйæ. Афтæмæй æрцæуы фыдбылыз.
Горæты уынгты цæуыны æндыгъд уавæр уæлдайдæр тынгдæр вæййы райсомæй, куыстмæ æмæ скъоламæ цæуыны рæстæджы. Фæндæгтыл фистæгæйцæуджытæн ахизæн нал вæййы, нал вæййы машинæтæн дæр ахизæн.
Проблемон ма нæм у уый дæр æмæ нæ горæты бирæ шофыртæ сæ машинæты, кæм не ‘мбæлы, ахæм рæтты кæй бауромынц. Сæ машинæты кæм бауромой, ууыл батыхсынц, фæлæ сæм уыййас хъуыды не ‘рцæуы, алæма, искæй бахъыгдардзынæн æви нæ. Куы акæсай, уæд горæты уынгтæ кæм иу кæнынц (перекресток) тæккæ уыцы фæзилæнты бауромынц сæ машинæты æмæ дзы уымæ гæсгæ фылдæр хатт æрцæуы аваритæ, уымæн æмæ шофырмæ нæ фæзыны, машинæ кæцырдыгæй рацæуы, уый.
Фæндагыл цæугæйæ æнамонд цаутæ ма ‘руадзын, фыццаджыдæр, баст у шофырты æрхъуыдыдзинадыл, ома, фæндагыл цæуыны фæткойтæ куыд æххæст кæной, ууыл. Хъыгагæн, алы шофыр не ‘ххæст кæны уыцы фæткойтæ.
Уæдæ алы фистæгæй цæуæг дæр, алы шофыр дæр хæсджын у æмæ йæ хъус дара, цæмæй уый аххосæй фæндагыл мацы фыдбылыз æрцæуа. Науæд исты бæллæх куы ‘рцæуа, уæд дзы алчидæр у дзуаппдæттæг. Ӕнæмæтдзинады фыдæй иу æмæ дыууæ хатты не ‘рцыд фыдбылызы цаутæ. Цæ-мæй нæ фæндаг æдас уа, уый тыххæй нæ хъæуы кæрæдзийæ аргъуц кæнын шофыртæ æмæ фистæгæйцæуджытæ.
Æлборты Агуындæ
