Знон нæ горæты Хъайтарты Аллеяйы Æнусон арты раз цытджын уавæрты Æфсæддон ард бахордтой Хуссар Ирыстоны Гарзджын тыхтæм ног æрсиддонтæ.

Цытджын мадзалы хайад райстой нæ Республикæйы Гарзджын тыхтыл Уæлдæр командæгæнæг Президент Гаглойты Алан, Хъахъхъæнынады министры хæстæ æххæстгæнæг булкъон Сабанты Инал, æфсæддон управленийы офицертæ, хицауады бæрнон кусджытæ æмæ æвзонг æрсиддонты хиуæттæ.

Цытджын церемонийы хӕдразмӕ Аллеямæ ӕрбахастой Республикӕ Хуссар Ирыстоны Паддзахадон ӕмӕ Гарзджын тыхты тырысатӕ. Айзæлыдысты паддзахадон гимнты зæлтæ æмæ уый фæстæ Гарзджын тыхтæм æрсиддонтæ цытджын уавæрты ард бахордтой, цæсгомджынæй æмæ намысджынæй кæй æххæст кæндзысты Фыдыбæстæйы раз сæ æвæджиаг хæс. Не ‘взонг фæлтæр сæ царды фæндагыл æрлæугæйæ æмбарынц, сæ разы егъау хæс кæй ис æмæ æппæтдæр кæй хъæуы саразын, цæмæй бæстæйы кад æмæ ном хæссой сæрыстырæй.

Ардбахæрды бон уыдонæй алкæмæндæр ссис ахсджиаг æмæ æхсызгон бон. Уыдонæй алчидæр æмбæрста, Фыдыбæстæйы хъахъхъæнæгæн ардбахæрд, бæстæйы æмæ йæ адæмыл иузæрдиондзинад æрмæст ныхæстæ кæй не сты, фæлæ у ахсджиаг æмæ стыр мидисæй йемыдзаг ритуал.

Æвзонг курсантты цытджын ардбахæрды церемонийы фæстæ бæстæйы Гарзджын тыхтыл сæйрагкомандæгæнæг Гаглойты Алан æрсидт курсанттæ æмæ уыдон ныййарджытæм, зæгъгæ, сымахæн абон у бæрнон æмæ ахсджиаг бон. Банысан кодта, Фыдыбæстæ хъахъхъæнын Хуссар Ирыстоны алы æмбæстаджы æвæджиаг хæс дæр кæй у. Сымахæй алчидæр, зæгъгæ, абонæй фæстæмæ у рæзгæ фæлтæрæн фæзминаг.

«Хъуамæ уат уæ фыдтæ æмæ уыдон фыдты аккаг, кæцытæ хæцæнгарзимæ лæууыдысты знаджы ныхмæ, нæ кæсдæр фæлтæрæн ирд æмæ рухс фидæны сæрвæлтау бахъахъхъæдтой нæ бæстæйы сæрибардзинад æмæ хæдбардзинад.

Арфæ уын кæнын ацы нысаниуæгджын боны тыххæй. Гарзджын тыхты рæнхъыты уын мæ зæрдæ зæгъы аккагæй службæ кæнын», – загъта бæстæйы разамонæг.

Æвзонг æрсиддонты ныййарджыты номæй мадзалы раныхас кодта æмæ бузныджы ныхæстæ загъта Мæргъиты Сослан. Уый æппæт ныййарджыты номæй бæстæйы разамынад æмæ Хъахъхъæнынады министрадæн загъта бузныджы ныхæстæ. Æвзонг æрсиддонтæ, зæгъгæ, Фыдыбæстæйæн абон ныфс бавæрдтой, кæй хъахъхъæндзысты нæ Райгуырæн бæстæ нæ буц фыдæлтæ йæ куыд хъахъхъæдтой, афтæ.

Банысан кодта, æвзонг курсанттæ сæ царды абон кæй сарæзтой ахсджиаг къахдзæф æмæ сын йæ цæст бауарзта, цæмæй йыл æнтыстджынæй цæуой Фыдыбæстæйыл иузæрдион æмæ ныфсхастæй.

Æвзонг æрсиддонты номæй ардбахæрды церемонийы раныхас кодта Дзадтиаты Сергей. Уый банысан кодта æфсæддон ардбахæрд æрмæст ныфсæвæрæн ныхас кæй нæу, фæлæ намысы ныхас. Бахъуыды рæстæджы уыдон се ‘ппæтдæр кæй хъахъхъæндзысты Райгуырæн бæстæ. Хъахъхъæнынады министрады «афицертæ хæлæрттæн ныфс бавæрдта – мах уæ никуы фæхудинаг кæндзыстæм», зæгъгæ.

Ард бахордтой æвзонг æрсиддонтæ

Мадзалы официалон хайы фæстæ Гарзджын тыхты дæлхæйттæ æмæ æвзонг курсанттæ æфсæддон оркестры зæлтæм цытджын маршæй рацыдысты Æнусон арты раз.

Уымæй размæ курсанттæ, æфсæддон хъуыддагыл фæцалх кæныны нысанæн министрады ахуырадон центр «Барс»-ы рацыдысты «Æвзонг хæстоны курс»-ы программæ. Уыцы рæстæджы æвзонг лæппутæ сæххæст кодтой инженерон, æфсæддон-медицинон цæттæдзинад, топографи æмæ æндæр нормативтæ. Цытджын æфсæддон ардбахæрды фæстæ æрсиддонтæ службæ кæндзысты Хъахъхъæнынады министрады дæлхæйтты.

КЪÆБУЛТЫ Маринæ

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.