Хуссар Ирыстоны бирæпрофилон колледж ацы аз бацæттæ кодта 11 студенты агрономы дæсныйадимæ. Сæ дипломон куыстыты арæхстджынæй равдыстой хъæууон хæдзарады тыллæг æфснайыны ног технологитæ. Паддзахадон фæлварæн къамисæн разамынд лæвæрдта Хъæууон хæдзарады министрады тыллæджы куыст æмæ механизацийы хайады сæргълæууæг Мулдарты Игорь.

Ивгъуыд аз та бирæпрофилон колледж бацæттæ кодта 17 механизаторы. Цæмæй студенттæ нырыккон трактортæ, комбаинтæ æмæ машинæтыл скъæрын сахуыр уыдаиккой. «Уыдон мæй æмæ æрдæг цыдысты практикæйы, уый фæстæ сын лæвæрд æрцыд сертификат, цæмæй сæ бон уа официалонæй кусын. Ныртæккæ цы техникæ уагъд цæуы, уыдон иууылдæр сты компьютеризацигонд. Комбаин цы функцитæ кæны, уыдон се ‘ппæт дæр зонын хъæуы. Афтæ ма фæндагон арæзтадты цы сæрмагонд техникæйæ пайда цæуы, уыдон дæр. Тракторист-машинисттæ байхъуыстой теоретикон курсмæ, ома лæмбынæг бафарстой теори. Уый фæстæ практикон æгъдауæй бафидар кодтой сæ зонæнтæ æмæ æдæрсгæ кусынц ныр», – радзырдта Бирæпрофилон колледжы ахуырады хайады методист Джиголаты Мадинæ.

Механизатортæн курсытæ уагъта хъæууон хæдзарады фадыджы инженер-механизатор Козаты Мурат. Курсыты чи ахуыр кодта, уыдон æхсæн уыд спецтехникæйыл чи куыста ахæмтæ дæр, фæлæ сæ кæронмæ базонын фæндыд æппæт сусæгдзинæдтæ. Бынтон æвзонг лæппутæ та уыдысты республикæйы алы районтæй.

Колледжы механизаторы профессийы дарддæр ис æндæр дæсныйæдтæ райсæн дæр. Уыдонæй бирæтæ абон приоритетон сты нæ æрыгон республикæйæн. Цы арæзтадтæ нæм цæуы Инвестицион программæйы фæлгæтты, уым хъæуы квалификациджын специалист-тæ.

Колледжы цæттæ кæнынц, хæринагаразджыты, кондитерты, слесарты, электрикты, токарты, автомашинæтæ цалцæггæнджыты, хуыйджыты, æхсæнадон хæлцы продукцийы технологты æмæ æндæрты. Ивгъуыд азы ма байгом цифрæйон информациты дæсныйады факультет дæр.

2016 азы колледжæн арæзт æрцыд йæхи сæрмагонд æрмадзтæ. Раздæр та студенттæ кондадон практикæйы цыдысты республикæйы арæзтадон объектты. Хайад-иу райстой Цæгат Ирыстоны кондитерты, слесарты æмæ хуыйджыты конкурсты. Фæлæ ныр ам ис алыгъуызон дæсныйæдты æрмадзтæ ифтонг сты нырыккон ифтонггæрзтæй. Практикæйы цæуынæн дзы ис æппæт уавæртæ.

Колледжы ахуырады хайады методист Джиголаты Мадинæ ма куыд зæгъы, афтæмæй æрвылаз дæр бирæпрофилон колледжмæ ахуыр кæнынмæ æрбацæуы 90-100 студенты.

Кæмæндæрты сæ зонындзинæдтæ æвзæр вæййынц æмæ ахуырмæ бирæ цухтимæ чи цыд, уыдон æрвыст æрцыдысты колледжæй. Иууыл фылдæр студенттæ  вæййы хæринагаразæг æмæ кафелæвæрджыты хайады .

Колледжы разамынд архайы, цæмæй сæ ахуыргæнæндонмæ бацæуынмæ æрыгон фæлтæр тынгдæр тырной. Уый нысанæн сæм æрвылаз дæр уагъд æрцæуы «Гом дуæртты бон». Фæхонынц горæты скъолаты ахуыргæнинæгты, афтæ ма республикæйы районты æрыгон фæсивæды дæр. Базонгæ сæ кæнынц, цы дæсныйæдтæ сæм ис, уыдонимæ, саразынц сын экскурси куыд æрмадзтæм, афтæ ахуырадон корпусмæ дæр, цæмæй фидæны абитуриенттæн фадат уа дæсныйæдтæ равзарынæн.

Ацы аз бирæпрофилон колледжы цы алы рауагъдонтæ ныффыстой дипломон куыстытæ æмæ сæ зонындзинæдтæ та æрфидар кодтой паддзахадон фæлварæнтæй.

Июлы æмбисы райдайдзысты абитуриенттæй гæххæттытæ исын. Исæн къамис кусдзæн суанг августы мæймæ. Вæййы афтæ дæр, студент иу аз райсы иу дæсныйад, дыккаг аз та – æндæр. Колледж ифтонг у æмдзæрæндонæй дæр. Боны иу хайы студенттæн вæййы ахуыр, иннæ хайы та – практикæ. Ифтонг цæуынц хъарм сихорæй. Дæсныйад райсыны фæстæ студенттæ æнцонтæй ссарынц куыст, уымæн æмæ ам цы дæсныйадтæн  райсæн ис, уыдон се ‘ппæт дæр сты, ныртæккæ нæ республикæйы зæрдиагæй чи хъæ­уы, ахæмтæ.

УАЗÆГТЫ Марфа

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.