Иумæйаг информацион-координацион центры кусджытæн уыд рæнхъон ралæуд, йæ сырæзтыл аст азы кæй сæххæст, уый цытæн. 2016 азы ацы Центр йæ куыст райдыдта, Уæрæсейы Федераци æмæ Республикæ Хуссар Ирыстон развæлгъау цы бадзырд бафыстой мидхъуыддæгты органты æмгуыстады фæдыл, уый фæлгæтты.

Мадзалмæ фæуазæг сты бæстæйы Президент Гаглойты Алан, Хицауады Сæрдар Джуссойты Константин, Республикæ Хуссар Ирыстоны Уæрæсейы Федерацийы Уæлвæткон æмæ æххæстбарджын минæвар Марат Кулахметов, Мидхъуыдæгты министр Гуыцмæзты Алан, Генералон прокурор Собаты Григорий, Хъахъхъæнынады министр Сабанты Инал  æмæ ма æндæр министрадтæ æмæ ведомствоты минæвæрттæ.

ИКЦ-йы директор пъæлицæйы булкъон Василий Шепелев æрдзырдта Центры сырæзты сæйраг этаптыл, йæ структурæйыл æмæ оперативон-службæйон архайды фæстиуджытыл.

“Ацы иумæйаг Центрæн йæ сæйраг хæс у дыууæ бæстæйы барадхъахъхъæнæг органты æмгуыстад координаци кæнын фыдгæнджыты ныхмæ эффективонæй тох кæныны нысанæн. Æмæ, рæстæг куыд æвдисы, афтæмæй Центр йæ функцитæ иттæг хорз æххæст кæны, стыр æххуыс у Уæрæсейы Федерацийы æмæ Хуссар Ирыстоны барадхъахъхъæнæг системæйæн.

Комкоммæ зæгъгæйæ, Центр у уникалон уагдон, практикон æгъдауæй ахъаз у оперативон-æнæмæнгхъæуæг информаци амал кæнынæн, фыдгæнджыты агурынæн æмæ экстрадици кæнынæн, оперативон æмæ криминалистикон хыгъдтæ аразыæн. Мах фæрцы бастдзинад ис фæсарæйнаг бæстæтимæ, паддзахадон æмæ æндæр ахæм организацитимæ фæсарæнты, æппæтдунеон пъæлицæйы организацитимæ.

Центры архайд дих кæны æртæ къабазыл – информацион-аналитикон ифтонгад, фыдгæнджыты ныхмæ тох кæныны рæстæджы координацийы функцитæ æххæст кæнын æмæ криминалистикон хыгъдтæ æмæ экспертизæтæ аразын. 2023 азы нæ хайбавæрд бахастам фондз фыдгæнæджы æрцахсыны хъуыддагмæ, кæцытæ æмбæхстысты Уæрæсейы территорийыл æмæ фæстæдæр экстрадици æрцыдысты Хуссар Ирыстонмæ уголовон бæрндзинадмæ æркæныны нысанæн. Дыууæ хуссарирыстойнаг æмбæстагæн та экстрадици сарæзтам Уæрæсемæ горæт Иркутскмæ уголовон бæрндзинадмæ æркæныны тыххæй. Ацы фыдгæнджытæ фынддæс азæй фылдæр æмбæхстысты барадхъахъхъæнæг органтæй, дыууæ чызгыл тыхæй кæй ныххæцыдысты æмæ сæ стæй кæй амард-той, уый фæдыл. Уымæй уæлдай ма, Цæгат Ирыстон-Аланийы барадхъахъхъæнджытæ агуырдтой æхсæз фыдгæнæджы, кæцытæ æмбæхстысты Хуссар Ирыстоны территорийыл æмæ сæ милицийы кусджытæ æрцахстой.

2023 азы ма баурæдтой æртæ автомашинæйы, кæцытæн сæ номыртæ уыдысты хафт. Центры эксперттæ экспертизæ саразыны фæстиуæгæн сбæлвырд кодтой, ацы автомашинæтæ кæй æрцыдысты давд Уæрæсейы территорийæ æмæ сæ радтой сæ хицæуттæн.

ИКЦ-йы архайды фæрцы ма раргом сты экономикон фыдракæндтæ дæр. Центры кусджытæ цы оперативон информаци æртымбыл кодтой, уый бындурыл Цæгат Ирыстон-Аланийы баконд æрцыдысты 13 уголовон хъуыддаджы. Цæстфæлдахджытæ сæ æнæзакъонон архайды фæстиуæгæн разиан кодтой 17 милуан сомæй фылдæр», – банысан кодта Центры директор.

Кæронбæттæны Шепелев бузныджы ныхæстæ загъта бæстæйы разамынадæн, Уæрæсейы минæварадæн æмæ Мидхъуыддæгты министрадæн сæ алыварсон æххуысы тыххæй.

Гаглойты Алан раарфæ кодта ИКЦ-йы рæнхъон скондæн се ‘рвылбонон æнæмæнгхъæуæг куысты фæдыл æмæ банысан кодта, Центры кусджытæ се службæйон хæстæ æххæстгæнгæйæ кæй хъахъхъæнынц закъон, кæй кад кæнынц адæймагæн æмæ æмбæстагæн, сæ бартæ сын кæй хъахъхъæнынц æмæ ма Хуссар Ирыстоны мидæггагон хъуыддæгты архайынæй сæхи кæй хизынц.

«8 азы йеддæмæ нæ рацыд ИКЦ-йы сырæзтæй, фæлæ йын ныридæгæн дзæвгар æнтыстытæ ис. Абоны бон йæ функцитæ æххæст кæны йæ службæйон-оперативон архайды æппæт къабæзты, равдыста йæ эффективондзинад æмæ нын ирдæй фенын кодта, йæ куыст кæй у ахадгæ.

Центр егъау хайбавæрд хæссы нæ республикæйы æдасдзинад æмæ стабилондзинадмæ, эффективон у фыдгæнджыты ныхмæ тох кæныны хъуыддаджы, хорзæрдæм æндавы дыууæ паддзахады барадхъахъхъæнæг органты æмгуыстадыл. ИКЦ у хорз цæвиттон дыууæ бæстæйы ‘хсæн барадхъахъхъæнæг структурæты æмгуыстад нывылæй уадзынæн, цæдисон пад-дзахадты интерестæ хъахъхъæнынæн, оперативон хъæугæ информаци кæрæдзимæ дæттынæй. Мæн фидарæй уырны, ацы Центры кусджытæ дарддæр дæр цæсгомджынæй кæй æххæст кæндзысты сæ разылæууæг хæстæ, алчидæр сæ кæй хæсдзæн аккаг кусæджы ном, фыдгæнджыты ныхмæ тохы кæй æвдисдзысты сæ фæлтæрддзинад æмæ арæхстджынæй кæй пайда кæндзысты сæ зонындзинæдтæй», – загъта кæронбæттæны Президент.

Марат Кулахметовы схонæн ис ИКЦ-йы бындурæвæрджытæй сæ иу. Ацы уагдоны арæзтады райста активон хайад – цыдис инспекцион басгæрстытæм Центры бæстыхæйтты арæзтады рæстæджы, хайад иста æппæт æмбырдты, йæ комкоммæ архайды фæрцы скъуыддзаг цыдысты дзæвгар проблемон фарстатæ. Йæ раныхасы та Марат Кулахметов радон хатт зæрдæбынæй раарфæ кодта Центры кусджытæн æмæ банысан кодта, кæй сæм æрхаудта уæззау, фæлæ ахсджиаг куыст.

Центры службæхæсджытæн ма арфæйы ныхæстæ загъта милицийы инæлар-лейтенат Гуыцмæзты Алан дæр.

«Сымах æрвылбон дæр тымбыл кæнут информаци æмæ йын анализ аразут. Уæ архайды фæрцы къаддæр кæнынц фыдракæндтæ, фыдгæнджытæ бæрндзинадмæ конд цæуынц, ахъаз стут фæткхалæн цауты профилактикæйæн, æгæрон æх-кхуыс кæнут нæ республикæйы слестгæнæн æмæ тæрхондоны органтæн криминалистикон экспертизæтæ уадзыны рæстæджы.

Ныры дуджы уæ сæйраг хæс у, цæмæй анализ аразат информацион технологиты къабазы, информацион-телеком-муникацион тыгъдады экстремизмы ныхмæ лæууат, æхсæнады хъахъхъæнат интернеты зианхæссæг æндæвдадæй æмæ ма ахъаз уат уæрæсейаг æмæ ирон адæмты хъарм ахастытæн. Уырны мæ, Центр дарддæр дæр размæ кæй цæудзæн, йæ профессионалондзинад кæй бæрзонддæр кæндзæн, уæ разы лæууæг хæстæ æххæст кæнгæйæ кæй хуыздæр кæндзыстут уæ методтæ», – загъта Мидхъуыддæгты министр.

Се службæйон хæстæ цæсгомджынæй кæй æххæст кæнынц, уый фæдыл цалдæр кусæджы хорзæхджын æрцыдысты ведомствойон хорзæхтæй.

ДЖИОТЫ Алыксандр

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.