Æрвылаз дæр сæ фадæттæй хæдзардзинæй спайда кæнынц Знауыры районы Уелиты фермерон хæдзарадтæ æмæ афоныл байтауынц æфсирон культурæтæй фæззыгæнд мæнæу æмæ хъæбæрхор. Ацы куыстыты æдзухдæр се ʻнцой балæууынц тракторон бригадæйы механизатортæ æмæ сын цы куыстытæ бахæс кæнынц хæдзарадты разамонджытæ, уыцы зæххытæ бахуым кæнын æмæ тауæн куыстытæ ахицæн кæнынц рæстæгыл. Цæвиттон, механизатортæ хъаруджын фæллой бакодтой ивгъуыд аз фæззæджы æмæ ацы аз уалдзæджы, мæр бахуым кæныны фæстæ хъуыд слæгъз кæнын æмæ йыл æнæзæрдæхудтæй бафыдæбон кодтой фæлтæрд механизатортæ Табуты Радик æмæ Гæззаты Андрей. Уый фæстæ та Пухаты Дзантемыр æмæ Кокойты Эдик æрæвнæлдтой тауыны куыстытæ æххæст кæнынмæ, æмæ развæлгъау бæрæггæнæнтæм гæсгæ, Ионча, Урсдуртæ, Бахъатæ æмæ Зиулеты быдырты æдæппæт фæззыгæнд мæнæу байтыдтой 150 гектары фæзуатыл. Уалдзæджы та хъæбæрхоры культурæ тыд æрцыд 300 гектары. Тракторон бригадæйы бригадир Наниты Толик куыд загъта, афтæмæй уал ацы бонты фермерон хæдзарадтæй иутæ сæ байтыдтæм хæссынц гербицидтæ.
ХУЫБИАТЫ Никъала
