Ленингоры районы хицæн зæхкусджытæ сæ фадæттæм гæсгæ архайынц, цæмæй рæза нæмыгон культурæты æрконд æмæ сын уыцы хъуыддаджы ис фæстиуджытæ дæр. Ацы хъуыддаджы се ‘нцой æдзухдæр лæууынц тракторон бригадæйы механизатортæ, уыдон æнæзивæгæй балæууынц, æххуысмæ сæм чи бахаты, уыцы зæхкусджыты уæлхъус æмæ сын цыбыр æмгъуыдмæ сæххæст кæнынц сæ æнæаргъæвгæ хъæууонхæдзарадон куыстытæ. Зæгъын хъæуы, тракторон бригадæйы бригадир Габиты Хвича йæ бригадæйы уæнгтимæ кæй æххæст кæны æндæр æмæ æндæр куыстытæ æмæ уымæй кæй у цæвиттойнаг, кæй сæ разæнгард кæны хуым кæнын, тауын æмæ тыллæг æфснайыны куыстытæ банысангонд æмгъуыдтæм ахицæн кæнынмæ. Механизатортæ Дриаты Звиад, æвзонг лæппу Хуриты Сослан, Хуыбылты Тамаз æмæ бригадир Габийы фырт йæхæдæг а-фæззæджы фæззыгон мæнæу æмæ хъæбæрхоры культурæтæ æдæппæт байтыдтой 200 гектары бæрц Цъинагар, Орчъосан, Абреу æмæ Гъдулеты зæххыты. Таугæ та бакодтой Дриаты Юри, Хуыбылты Илья, Зураб æмæ æндæртæн. Кæд хъæбæрхоры культурæ уалдзæджы тыд æрцæуы, уæддæр хицæн зæхкусджытæ ивгъуыд азты ацафон дæр байтыдтой ацы культурæ, æрзайын дзы кодтой хорз тыллæг æмæ уымæ гæсгæ нæ базивæг кодтой йæ тауыныл ацы фæззæг дæр.
Кæд фæззыгон тауыны куыст нал кæнынц, уæддæр механизатортæ иу ран нæ бадынц æмæ архайынц мæр фидæн азæн бацæттæ кæныныл. Раст у, æййафынц цух æртагæй, фæлæ дзы уæддæр иуæй-иутæ сфæсауæрц кодтой æмæ хуым кæныныл ацы бонты кусынц ДТ-75 маркæйы æртæ тракторы, иу Т-150 æмæ уымæй зæхкусджытæн рог кæнынц сæ къух.
Хуыбиаты Никъала
