«Сыгъдæг бриллиант», «Хуыцауæй лæвæрд курдиат», «оперон дивæ», – ахæм эпитеттæй фырцин æмæ фырбуцæй хонынц нæ газеты уазæджы. Не ‘мзæххон, УФ-йы сгуыхт артисткæ, РЦИ-Алани æмæ Республикæ Хуссар Ирыстоны адæмон артисткæ Джиоты Вероникæ дунейыл хъуыстгонд у йæ алæмæттаг курдиатæй.
Зындгонд зарæггæнæг, Вероникæ бирæ азты кусы Уæрæсе æмæ дунейы раззагдæр оперон театрты. Азарыд, алы зарæггæнæг дæр кæмæ бæллы, уыцы сылгоймаджы аритæ зындгонд оперæты «Тоска», «Турандот», «Иоланта», «Фигаройы чындзæхсæв», «Евгений Онегин»-ы Татьянæ, «Атилла» æмæ бирæ æндæрты. Кусы дунейы хуыздæр дирижертимæ, се ‘хсæн – не ‘мзæххон Гергиты Валери. Вероникæ йæ хъуытаз хъæлæсы зæлтæй циндзинад хæссы алы бæстæты оперæуарзджытæн.
Зарæггæнæгимæ нæ фембæлд уыд дæрддзæф бастдзинады фæрцы, Вероникæ Италийы куы уыд, уыцы рæстæг. Артисткæ нæ газеткæсджытæн радзырдта йе сфæлдыстадон нысанты тыххæй, нæ басусæг кодта йæхи царды хабæрттæ дæр.
Вероникæ кæд афæдзæй фылдæр цæры Цæгат Ирыстоны, уæддæр фылдæр рæстæг вæййы гастролты. Ацы бонты дæр Италийы Сардинийы оперон театры азарыд «Тоска»-йы парти фондз спектаклы фæд-фæдыл, æмæ йыл италиаг театрдзаутæ тынг æхсызгонæй сæмбæлдысты. Спектаклы фæстæ, кæимæ зарыд, уыцы карджын артист æмæ стыр профессионал Вероникæйæ тынг раппæлыд, рахуыдта йæ зындгонд зарæггæнæг Ева Мартоны хуызæн. «Фондз спектаклы дæр æнтыстджынæй кæй ацыдысты, уый мæ цины бафтыдта. Ам мæ хъæлæс дæр цыма æндæрхуызон хъуысы, – зæгъы Вероникæ. – Алы артистæн дæр йæ курдиат æмæ йæ фæлтæрддзинадæн стыр кады нысаниуæг сты, йе ‘мкусджытæ æмæ адæм æй сæхимæ хæстæг куы айсой, уæд, уæлдайдæр – Италийы».
«Тоска»-йы ари у тынг рæсугъд, зарынмæ та – тынг зын, хъæлæсы авналæнтæ æмæ йæ тыхмæ гæсгæ уайы стæм зарæггæнæгæн. Вероникæйы та аивады зындзинæдтæ никуы урæдтой. Уымæй йæ æмбарын кæны йæхæдæг дæр, музыкæйы йын цы бантыст, уый – йæ тых æмæ хъаруйы руаджы.
Дарддæр Джиоты Вероникæйæн йæ фæндаг уыдзæн Италийæ Аргентинæмæ. Уым æм æхсызгонæй æнхъæлмæ кæсынц дунейы зындгонддæр Буэнос-Айресы оперон театр «Колон»-ы. Семæ афæдзмæ цы контракт бафыста, уымæ гæсгæ Вероникæ хъуамæ азара оперæ «Турандот»-ы премьерæйы.
Рох дзы не сты уæдæ, Ирыстоны йын цы аивадуарзджытæ ис, уыдон дæр. 12 июны нысангонд у йæ архайд, Сæрибары фæзы Уæрæсейы боны кадæн цы мадзал уыдзæн, уым. Ноджы ма иу концерт ратдзæн сусæны мæйы райдайæны.
Вероникæ æртæ боны дæргъы камерон концерттæ лæвæрдта Вахтанговы номыл музейы арт-кафейы. Тынг бузныгæй баззад директор Атайты Мæдинæйæ. Йæ аивадуарзджытæй уæд се ‘ппæтæн концертмæ æрбацæуыны фадат нæ фæци. Уымæ гæсгæ зарæггæнæг снысан кодта радтын стыр концерт сентябры, ЦИПУ-йы залы, кæд ын рауайа, уæд азардзæн «а капелла» дæр, ома, æнæ микрофон æмæ оркестрæй.
Фыццаг къахдзæфтæ музыкалон аивады Вероникæ акодта Цхинвалы йæ фыццаг педагог Хъуылымбегты Луизæйы амындæй. Ацы горæтимæ артисткæйæн баст сты йæ æвзонг бонты адджындæр мысинæгтæ. Кæд арæх не ‘фты, уый та у йе стырдæр сагъæс, уæддæр бастдзинæдтæ нæ сафы. Тагъд рæстæджы нысан кæны фембæлд Хуссар Ирыстоны паддзахадон университеты ректор Тедеты Ботазы фырт Вадимимæ.
Вероникæ, æргомдзырд адæймаг, ракуырдта, тынг-иу мын феппæл Вадимæй, мæ уарзон æмбæстаг æмæ сыхагæй, зæгъгæ. «Бузныг ын, æцæг ирон лæгæй кæй баззад! Фæнды йæ, цæмæй æрцæуон Хуссар Ирыстонмæ, æмæ æрцæудзынæн, зæрдиагæй бакæсдзынæн, разамынд цы университетæн дæтты, уымæ», – зæгъы йæ хъуыды Вероникæ. Артистæн йæ цард у иу гастролæй иннæмæ. Вероникæ дæр хæдзары кæд мæйгæйттæ нæ вæййы, уæддæр æм æнхъæлмæ кæсынц йæ уарзон адæм, йæ гыццыл чызг Адрианæ æмæ йæ хистæр лæппу Раман. Чысыл Адрианæ ныридæгæн дæр йæ мады зæрдæ рухс кæны йæ фыццаг уæлахизтæй дунеон музыкалон конкурсты.
«Ирыстоны куы вæййын, уæд мæ, бæргæ, фæфæнды мæ хиуæттæ æмæ ме ‘мбæлттимæ фылдæр рæстæг æрвитын, фæлæ мæ куысты график уый нæ амоны, стæй мæ бинонтæ дæр алы бæстæты цæрынц. Фæнды мæ, цæмæй Ирыстоны се ‘ргом раздахой курдиатджын адæммæ, саразой сын цæрын æмæ кусынæн æм-бæлгæ уавæртæ. Æз мæхи хорз æнкъарын, æрмæстдæр Уæрæсейы цæргæйæ!», – дарддæр йæ ныхас кæны Вероникæ.
Куыд нæ бæстæйы культурæйы минæвар дунейы музыкалон æхсæнады, Европæйы уырыссаг культурæ аивын кæй бафæлвæрдтой, уыимæ Вероникæ разы нæу. Бирæ концерттæ Финлянди æмæ Чехийы йæ къухы нал бафтыдысты. Фæлæ артисткæйы ныфс ис, ных-мæлæуд бирæ кæй нæ ахæсдзæн, уымæй. Хорз зæрдæ дары, сценæйы кæимæ кусы, уыцы фæсарæйнаг артисттæм, кæрæдзийæн сты ныфс.
Джиоты Вероникæйæн алкæмæй зынаргъдæр сты йе ‘мтуг, æмбæстаг адæм. Дыууæ Ирыстоны цæрджытæн æрвиты зæрдиаг саламтæ сабырдзинад, æнæниздзинад æмæ уарзондзинады арфæтимæ. Йæ бæллицтæ дæр баст сты ирон адæмы фидæнимæ, цыфæнды зынæй дæр, нымайут, æххуыс æмæ лæггад кæнут уæ кæрæдзийæн, æфсымæрдзинадæн аргъ нæй, зæгъгæ.
МАМИАТЫ Лолитæ,
газ. «Рæстдзинад»
