Республикæ Хуссар Ирыс-тоны паддзахадон хæдбардзинады тыххæй Акт райсыны цы-тæн спортивон галуан «Олимп»-ы уагъд æрцыд чемпионат армрестлингæй.
Спортсментæ равдыстой цæттæдзинады бæзонд æмвæзад. Уыдон призон бынæттыл тох кодтой 50, 55, 60, 65, 70, 75, 80 æмæ 85 кг уæзты категориты.
Уæлахиздзауты схорзæхджын кодта Фæсивæдон политикæ æмæ спорты фæдыл комитеты сæрдары хæдивæг Гасситы Сослан. Уый зæрдæбын арфæтæ ракодта чемпионаты уæлахиздзаутæ æмæ хайадисджытæн.
БАГАТЫ АРСЛАН: «ИРÆТТÆ РАЗМÆ»
Уæгъдибар хъæбысхæстæй Бакуйы уагъдцæуæг Европæйы чемпионаты 23 азы онг спортсменты ‘хсæн сыгъзæрин майдан рамбылдта Багаты Арслан. Журналисттæн йæ интервьюйы рæстæджы уый банысан кодта, зæгъгæ, йын Азербайджаны турниры сыгъзæрин майдан уæлдай зынаргъдæр у, йæхи йæм рагæй цæттæ кодта.
«Æз Бакумæ æрцыдтæн æрмæстдæр сыгъзæрин майдан рамбулынмæ. Тынг мæ фæндыд рамбулын. Бирæ тренировкæтæ кодтон Уæрæсейы чемпионаты фæстæ. Мæ уæлахиз лæвар кæнын мæ мад æмæ мæ фыдæн, афтæ ма мæ тренер Наниты Зурабæн. Ныр иу чысыл аулæфдзынæн æмæ та уый фæстæ мæхи цæттæ кæнын райдайдзынæн ног уæлахизтæм. Ирæттæ, размæ!», – загъта Багаты Арслан.
Хуриты Батрадз
