Ацы къуыри 1-æм июны нысан цæудзæн иууыл ахсджиагдæр бæрæгбонтæй сæ иу – Сывæллæтты хъахъхъæныны дунеон бон.
Нæ хæзна, нæ сомбон, нæ ныфс сты сабитæ æмæ мах нæ сабитæн нæ тыхтæ ма хъуамæ æвгъау кæнæм, цæмæй нæ сывæллæттæ рæзой уарзондзинады атмасферæйы, хъахъхъæд цæуой æгъатырдзинадæй негативæй.
Махæн ис курдиатджын сывæллæттæ сæ-рыстыр вæййæм уыдон æнтыстытæй спорты, сфæлдыстады, ахуыры.
Сабитæн аразын хъæуы уавæртæ, цæмæй сæхи среализаци кæной, се ‘нæниздзинад хъахъхъæд цæуа, хъомыл кæной фæрнджын æхсæнады. Уыцы фыццаг къахдзæфтæ райдайынц рæвдауæндæттæй æмæ мах бабæрæг кодтам, цы уавæртæ сæм ис. Инвестпрограммæйы фæлгæтты цы рæвдауæндæттæ сырæзт, уыдонæй бацыдыстæм «Фæрдыг» æмæ «Æфсир»-мæ
Автостанцы дæллаг фарс цы сабиты рæвдауæндон ис, уый дæр арæзт æрцыд 2014 азы. Уый размæ чи уыд, уый ныппырх 2008 азы хæсты азарæй. Уыцы районы цæрæг ныййарджытæ цалдæр азы сæ сывæллæтты кодтой дæрддзæф рæвдауæндæттæм.
Сабиты рæвдауæндон арæзт æрцыд цыбыр æмгъуыдмæ Инвестицион программæйы фæрæзтæй. Аразгæ та йæ скодта бынæттон арæзтадон организаци «Бадо»
«Фæрдыг» – афтæ хуыйны ныр №17-æм сабиты рæвдауæндон. Ног бæстыхайы чысыл экскурси сарæзтам æмæ нæхи цæстытæй федтам, ныртæккæ ам ис 100 сабийы бæрц. Сывæллæттæ дих сты фондз къордыл: дыууæ кæстæр кары къорды, астæуккаг æмæ хистæр кары сывæллæтты къордтæ. Ис дзы музыкалон æмæ спортивон залтæ. Компьютерон кълæсты сабиты цайдагъ кæнынц сæ асмæ гæсгæ хъæзтыты методикæйыл.
Раздæр сабиты рæвдауæндæтты нæ уыд психолог æмæ логопедтæ, фæлæ фæстаг азты ахæм лæггæдтæ бирæ сабиты хъæуы, хъыгагæн. Ныртæккæ нæ горæты цы сабидæттæ ис, уыдонæй алкæйы дæр ис психологтæ.
Сабитæ кæм хъазынц æмæ кæм фынæй кæнынц, уыцы хатæнты ис кондиционертæ. Кæрты та арæзтады рæстæджы æвæрд æрцыд генератор, цæмæй рухс куы ахуысса, уæд дæр рæвдауæндоны уа электроифтонгад. Ам цы фондз хатæны ис, уыдон ифтонг сты телевизортæ æмæ аудиосистемæтæй. Алы къорды дæр сывæллæттæн ис бирæ хъазæнтæ, тренажертæ, дидактикон æмæ цæстуынгæ æрмæджытæ.
Кæрт дæр у хорз арæзт. Алы къордæн дæр йæхи беседкæ. Иудзырдæй, ам сабитæ æнкъард нæ кæндзысты, арæзт сын æрцыд комфортон уавæртæ. Банысан кæнын хъæуы уый, æмæ зынгсирвæзты системæ дæр арæзт кæй æрцыд æмбæлонæй. Зынгсирвæзты рæстæджы скусдзæн сæрмагонд системæ æмæ фыдбылыз не ‘рцæудзæн.
Фæстæдæр цы сабидæттæ сырæзт Хъайтарты уынджы кæрон, Кимы уынгыл æмæ ма Цхинвалы районы иууыл стырдæр хъæу – Дменисы, уым дæр раст ахæм комфортон уавæртæ ис. Ацы сабидоны сæргълæуджытæ куыд зæгъынц, афтæмæй сæ уагдæттæ горæты иннæ рæвдауæндонтæй уæлдай, кæд нырыккон домæнтæм гæсгæ арæзт сты, уæддæр алы ран дæр хъомыладон куыст цæуы иумæйаг ахуырадон планмæ гæсгæ. Алы рæвдауæндоны хъомылгæнджытæ дæр тырнынц, цæмæй сабиты фæцайдагъ кæной куыстыл.
Цæстуынгæ æрмæджытæ сабитæ саразынц сæхи къухтæй. Кæртыты алы къордтæн дæр ис сæхи зæххы фадыг. Уым сывæллæтты цайдагъ кæнынц физикон куыстытыл. Мæхи цæстæй федтон, сабидон «Фæрдыг»-ы хистæр кары сабитæ дидинджытыл дон куыд кодтой. Хъомылгæнджытæ куыд загътой, афтæмæй сын хорз æххуыс кæнынц ныййарджытæ дæр. Уагдоны кæрты цы алыгъуызон дидинджытæ зайы, уыдон æрбахастой ный-йарджытæ. Сабитæ сыл аудынц, кæрдæджытæй сæ ссыгъдæг кæнынц, дон сыл æркæнынц æмæ афтæмæй цайдагъ кæнынц эстетикæ æмæ æрдзы рæсугъддзинæдтæ уарзыныл.
Сабиты рæвдауæндæттæй раздæхтæн хорз тæлмæнтимæ. Агъуыстыты аив арæз-тæй барухс мæ зæрдæ. Уæлдайдæр та сабитæм цы ахаст федтон, уымæй.
УАЗÆГТЫ Марфа
