Ацы бонты Знауыры райцентры скуыста кабелон интернет «Юг-Телеком». Ацы бастдзинад нæ горæты куы фæзынд, уæдæй нырмæ Знауыры районы цæрджытæ цалдæр хатты бахатыдысты «Юг-Телеком»-мæ, цæмæй уыдоны дæр баиу кæной ацы бастдзинадмæ. «Ныр знауырæгтæн сæ бон у нæ компаниимæ бадзырдтæ саразын. Æрæгмæ сæм кæй бахæццæ стæм, уымæн дæр ис йæхи аххосæгтæ. Проектон-тестон куыстытæ компани аразы йæхи сæрмагонд инвестицитæй, уымæ гæсгæ къуылымпытæ вæййы махмæ дæр. Цæмæй æххæстбæрцæй скуыстаид кабелон интернет Знауыры районы, уый тыххæй хъуыд бынæттон кусджытæ бацæттæ æмæ сахуыр кæнын. Интернет-бастдзинады хахх бауадзыны тыххæй æргътæ уыдзысты, горæты куыд у, афтæ. Бирæуæладзыгон фатертæм йæ бау-адзын лæууы 3900 сомы. Сæрмагонд хæдзæрттæм бауадзыны куыстытæ уыдзысты 1 мин сомы фылдæр. «Юг-Телеком» кусы ахæм тарифтæм гæсгæ: 800, 900, 1200 æмæ 1500 сомы»,- радзырдта нын ацы бастдзинады коммерцион директор Джиоты Эрна.
Уый ма куыд загъта, афтæмæй Знауыры районы хъæутæй дæр сæм цæуы куырдиæттæ, фæлæ уый тыххæй бацæттæ кæнын хъæуы базæйон станцы ног объекттæ. «Бастдзинад æмæ интернеты куыст домынц æппынæдзух ногдзинæдтæ. «Юг-Телеком» Хуссар Ирыстоны территорийыл цы архайд кæны, уымæн та æрмæст экономикон бындур нæй. Фæнды нæ æмткæй республикæйы цæрджыты бастдзинады лæггæдтæ хуыздæр кæнын. Цхинвалы районы Чысыл Леуахийы æрдыгæй цы хъæутæ ис, æмæ ма æмткæй Ленингоры районы дæр, уыдон, сæйраджыдæр, Гуырдзыстоны бастдзинад «Макти»-йæ пайда кæнынц. Компани ивгъуыд аз фæнд кодта Цхинвалы районы стырдæр хъæу Дменисы цæрджыты дæр кабелон интернетæй сифтонг кæнын, фæлæ уыцы куыстытæ хаст æрцыдысты фæстæдæр рæстæгмæ», – загъта ма уый.
УАЗÆГТЫ Марфæ