Ацы бонты Хуссар Ирыстон æмæ Гуырдзыстоны ‘хсæн арæнгæрон хъæу Эргнетмæ хæстæг уагъд æрцыд Инциденттæ ма æруадзын æмæ сæм хъусдард здахыны фæдыл механизмты форматы радон фембæлд. Механизмты форматы фæмбæлдтыты хайад исынц Хуссар Ирыстон, Уæрæсе, Гуырдзыстон, Евроцæдис æмæ ЕÆÆО-йы минæвæрттæ.
Сæйраджыдæр дзы уынаффæ цæуы æдасдзинады фарстатыл, паддзахадон арæнтæ халыны цаутыл, æнæпилотон тæхæн аппараттæ кæй халынц нæ бæс-тæйы уæлдæфон тыгъдад æмæ æндæр ахсджиаг хъуыддæгтыл.
Уисты хъæуы æнæзакъонон пост иуварс хъуамæ æрцæуа
Хуссарирыстойнаг делегацийы сæргълæууæг, Фæсконфликтон фарстатæ бæстон кæныны фæдыл Президенты æххæстбарджын минæвары хæдивæг Коцты Егор фембæлдæн хатдзæгтæ аразгæйæ, информацион фæрæзтæн радзырдта, зæгъгæ, фылдæр хъусдард здæхт æрцыд, цалдæр азы размæ гуырдзиаг полициæгтæ Знауыры районы Уисты хъæуы цы æнæзакъонон пост сæвæрдтой, уымæ.
Хуссарирыстойнаг фарс ныр цалдæр азы хæссы уыцы проблемон фарст. Йæ рæстæджы, йæ фæдыл уагъд æрцыд авд техникон фембæлды.
Делегацийы разамонæджы ныхæстæм гæсгæ, абоны онг дæр иу хъуыдымæ не ‘рцыдысты æмæ уымæ гæсгæ скъуыддзаг нæ цæуы фарст. Фæлæ Хуссар Ирыстон араздзæн æппæтдæр, цæмæй ист æрцæуа, алыварсонæй пайда чи æрхæсса, ахæм уынаффæ.
«Гуырдзиаг æнæзакъонон полициаг пост ист æмæ иуварсгонд хъуамæ æрцæуа Хуссар Ирыстоны территорийæ», – банысан кодта уый.
Фембæлды рæстæджы Гуырдзыстоны минæвар банысан кодта, зæгъгæ, пост ницы бар дары æмæ ницы хъыгдары Хуссар Ирыстоны.
«Уый æппынæдзух дзуры гуырдзиаг фарс. Фæлæ мах алы хатт дæр нысан кæнæм, кæд æмæ Хуссар Ирыстонмæ ницы бар дары, уæд йæ сæвæрыны дæр æппындæр ницы мидис ис.
Цæмæй уыцы бынаты уавæр стабилон уа, уый тыххæй хорз уаид, уыцы полицæйæгты пост Хуссар Ирыстоны территорийæ аиуварс кæнын», – раргом кодта йæ фæнд ныхасгæнæг. Коцты Егор фидарæй загъта, ацы пост кæй у Гуырдзыстоны хицауады политикон уынаффæ.
Гуырдзиаг фарсимæ абаргæйæ, Хуссар Ирыстоны разамынад аразы хæрзиуæгон къахдзæфтæ. Уыдонæй иу у Ленингор æмæ Дзауы районты цæрджытæн рæстæгмæ хизæн пункттæ байгом кæныны хъуыддаг. Æрвылмæй дæр дæс боны дæргъы ацы районты цæрджытæн фадат ис сæрмагонд уадзæн гæххæттыты руаджы Гуырдзыстонмæ ацæуынæн.
Ацы фарстыл дæр уынаффæ цыд фембæлды. Хуссар Ирыстоны фарс йæ коллегæты зæрдыл æрлæууын кодта, уадзæн пункттæ кæй байгом сты, уый кæй у Хуссар Ирыстоны æрдыгæй арæзт гуманитарон къахдзæф. Ныртæккæ ахæм æнгæс къахдзæфтæм æнхъæлмæ кæсы Хуссар Ирыстон дæр, уыцы нымæцы Знауыры районы Уисты хъæуы сæвзæргæ уавæры тыххæй дæр.
Æнæпилотон тæхæн аппараттæ халынц уæлдæфон тыгъдад
Механизмты фæлгæтты фæстаг фембæлдæй фæстæмæ Хуссар Ирыстоны паддзахадон арæнты фæтк Гуырдзыстоны ‘рдыгæй хæлд æрцыд æхсæз хатты. Арæнхалджытæ се ‘ппæт дæр æрвыст æрцыдысты Гуырдзыстоны территоримæ. Уæлдæфон тыгъдады æнæпилотон тæхæн аппараттæ кæй тæхынц, уый делегацийы сæргълæууæг банымадта проблемон фарстыл. Куыд банысан кодта, уымæ гæсгæ сæ тыхы нæй сбæлвырд кæной, уыцы æнæпилотон аппараттæ кæй сты, уый. Уымæн æмæ гуырдзиаг фарс нæ сæтты тæхæн аппараттæ уыдон кæй сты, ууыл.
Хуссар Ирыстон цæттæ у информаци дих кæнынмæ
Хуссарирыстойнаг информацион фæрæзты минæвæрттæн фадат нæ фæцис механизмты форматы гуырдзиаг делегацийы разамонæгмæ цымыдисгæнæг фарстатæ радтынæн. Кæд уыцы нысанæн минæвæрттæ бацыдысты, фембæлд уагъд кæм фæцæуы, уыцы бынатмæ, уæддæр – дзæлгъæды.
Ацы уавæрæн хатдзæгтæ аразгæйæ, Коцты Егор банысан кодта, зæгъгæ, уымæн æхсызгон у, куыд Хуссар Ирыстоны, афтæ Гуырдзыстоны журналисттимæ ныхас кæнын, уымæн æмæ йын уымæй фадат фæуыдзæн Хуссар Ирыстоны къухдариуæгады хъуыды гуырдзиаг аудиторимæ хæссынæн.
Егор куыд радзырдта, афтæмæй фæстаг раунды гуырдзиаг журналистты фæндыд йемæ аныхас кæнын, фæлæ сæ механизмты фембæлды бынатмæ кæй бауадздзысты, уый развæлгъау кæй нæ фехъусын кодтой, уымæ гæсгæ хуссарирыстойнаг информацион фæрæзтæ рæстæгыл фæдзæхст не ‘рцыдысты. Ныртæккæ та фæндон бахастæуыд, цæмæй журналистты фæхоной дыууæ фарсæрдыгæй дæр, цæмæй фембæлды фæстиуджыты тыххæй комментаритæ лæвæрд цæуа гуыдзиаг æмæ хуссарирыстойнаг информацион фæрæзтæн дæр.
Коцты Егоры ныхæстæм гæсгæ, фембæлды модератортæ ЕÆÆО æмæ Евроцæдис хъуамæ æрбæстон кæной ацы фарст.
Банысан кæнын хъæуы уый, æмæ механизмы фæлгæтты радон фембæлд уагъд кæй æрцæудзæн фидæн азы, 17 январы.
КЪÆБУЛТЫ Маринæ
Comments are closed, but trackbacks and pingbacks are open.