Тыбылты Алыксандры номыл паддзахадон университеты 50 гиды бæрц рацыдысты аттестаци. Уыдонæн ректор Тедеты Вадим сæ профессионалон ахуырады тыххæй радта дипломтæ.
Аивгъуыйгæ азы сентябры мæйы уæлдæр ахуыргæнæндоны уагъд цыдысты æнæаргъ ахуыртæ нæ республикæйы фидæны гидтæэкскурсиамонджытæн. Ахуыртæ æххæст цыдысты авд актуалон модулæй. Курсы уыдысты клуб «Апполон»-ы минæвæрттæ æмæ республикæйы цæрджытæй ацы здæхты архайын кæй бафæндыд, ахæмтæ. Уыдонæй алчидæр хъуамæ радтаид авд модулæй бахыгъд. Курсы фæудмæ 50 адæймагæй фылдæр æнтысджынæй рацыдысты хатдзæгон аттестаци.
Хуссар Ирыстоны туризмы рæзты къабазæн ис егъау потенциал. «Первый и основной модуль – “Нормативно-правовые основы туристической деятельности»-йы фæдыл лекцитæ каст Цæгат-Кавказы Федералон университетæй æрхонгæ специалист Оксана Белозерова. Иннæ лекцитæ та сын кастысты Хуссар Ирыстоны паддзахадон университеты ахуыргæнджытæ. ХИПУ-йы уырыссаг æмæ фæсарæйнаг литературæйы кафедрæйы хистæр ахуыргæнæг Пухаты Аллæ уагъта «Экскурсийы методикæ»-йæ лекцитæ. Уый цалдæр азы размæ йæхæдæг куыста экскурси амонæгæй æмæ иттæг хорз зоны ацы къабазы куыст. Райдайгæ экскурсиамонджытæн æрмæст теори нæ бацамыдта, фæлæ ма сын радзырдта йæ фæлтæрддзинады тыххæй дæр.
Æмткæй ахуыр цы æмвæзадыл ацыд, уый тыххæй нын йæ тæлмæнтæ загъта ацы уæлæмхас ахуыры тыххæй курсытæ чи рацыд, уыдонæй сæ иу – Багаты Марат.
«Тынг æхсызгон мын у ацы курсытæ кæй фæдæн, уый. Стыр тæлмæнтæ мыл ныууагътой ахуыртæ. Туризмы æппæт сусæгдзинæдтæ дæр нын лæмбынæгæй бацамыдтой нæ ахуыргæнджытæ æмæ сæ уый тыххæй дæн æнæкæрон бузныг. Раст у, рох кæнын нæ хъæуы уый дæр æмæ экскурсиамонæг кæй у республикæйы цæсгом. Хуссар Ирыстонмæ чи æрцæуа, уымæн бакæны республикæмæ дуæрттæ. Æмæ хъуамæ зонай, туристæн цы информаци радтай, уый. Уæлдай тынгдæр мæ зæрдæмæ фæцыдысты цæугæ лекцитæ нæ республикæйы территорийыл. Æппæт дæр нæхи цæстæй уыдтам. Афтæмæй æнцондæр у экскурсиамонæгæн дæр», – банысан кодта Багаты Марат.
Курсыты сæйраг нысан уыд туристты хъусдард, цымыдисдзинад раздахын, æмæ сæ афтæмæй Ирыстоны истори, культурæимæ зонгæ кæнын. Цæмæй уыдон зоной Хуссар Ирыстон кæй у фæразон, зæгъгæ мах аргъ кæнæм нæ райгуырæн къуымæн, нæ адæмæн, не ‘гъдæуттæн æмæ сæрыстыр стæм иу кæнæ иннæ объектæй.
Туристты æрмæст цыртдзæвæнтимæ, культурон æмæ историон бынтимæ зонгæ кæнын нæ хъæуы, фæлæ ма ахсджиаг у ахæм объектты бахъахъхъæнын сæ раздæры хуызы.
КОКАЙТЫ Заринæ