Уæлвæткон уавæрты министрады кусджытæ кæстæр фæлтæримæ уадзынц тематикон ахуыртæ. Ивгъуыд аз уыдон бакуыстой Цхинвалы скъолатæ æмæ сывæллæтты цæхæрадæтты хъомылгæнинæгтæ æмæ кусджытимæ. Ныр та сæ планмæ хаст сты районтæ æмæ дæрддаг хъæуты ахуыргæнинæгтæн ахуыртæ ауадзын. Уый тыххæй хъусын кæны министрады прессслужбæ.
«Æртыццæджы министрады бæрнон кусджытæ ацыдысты Дзауы районы Синагуры астæуккаг скъоламæ æмæ сын бакастысты лекцитæ, рæмудзæн æрмæджытæ, кæнæ æндæр тæссаг дзаумæттæ куы ссарой, уæд цы мадзæлттæ райсын хъæуы фыццаг рады, уыдæтты тыххæй. Ахастой алыгъуызон рæмудзæн æрмæджытæ, æхсæнгæрзтæ æмæ сывæллæтты цæстуынгæйæ базонгæ кодтой семæ», – загъта министрады пресс-секретарь Икъаты Александр.
Йæ ныхæстæм гæсгæ, Къуайсайы астæуккаг скъоламæ та фæуазæг сты дыккаг бон æмæ уыдонæн дæр ауагътой ахæм тематикон ахуыртæ. Æмбæстæгты æдасдзинады хайады гæс булкъон Хъуылымбегты Барис æмæ ирвæзынгæнæн отряды хайады кусджытæ Биганаты Таймураз æмæ Беройты Дауыт сывæллæттæн бацамыдтой, тæссаг æмæ зæрдæхсайгæ æрмæджытыл куы сæмбæлой, уæд, фыццаджыдæр, хи бахъахъхъæнын куыд хъæуы. Нæй сæм æввахс бацæуæн, бавналæн. Æвæстиатæй хъæуы уæлвæткон уавæрты министрадмæ, кæнæ милицимæ адзурын.
Синагуры астæуккаг скъолайы директор Бестауты Аркади куыд загъта, афтæмæй ахæм ахуыртæ сты ахсджиаг. «Мæнмæ гæсгæ, рæзгæ фæлтæр хъуамæ зоной сæ цардæн тæссаг уавæрты сæхи бахъахъхъæнын. Уый сæ бон бауыдзæнис, ахæм æрмæджытæ куыд гранат, топпы хос, гилзытæ æмæ æндæр ахæмтæ цæстуынгæйæ куы зоной. Арæх фыдбылыз æрцæуы, сæ къухты цы бафты, уый кæй нæ фæзонынц æмæ йемæ куы фæархайынц, уæд. Уымæ гæсгæ министрад цы куыст кæны кæстæртимæ, уый у ахсджиаг», – загъта уый.
Икъаты лæппу ма куыд фехъусын кодта, афтæмæй уыдон ацы къуыри дарддæр кæндзысты сæ куыст æмæ тематикон ахуыртæ ауадздзысты Дзауы райцентры ахуыргæнæн уагдæтты.
ХУЫГАТЫ Миленæ
