НИДЕРЛАНДТЫ БАЗОНГÆ СТЫ ИРОН АИВАДИМÆ

Нидерландты горæт Еттен-Леуры байгом ирон нывгæнджыты равдыст «Уæлтæмæнад», зæгъгæ, – хъусын кæны Бенилюксы бæстæты (Бельги, Нидерландтæ æмæ Люксембургы æмхæларад) Хуссар Ирыстоны Фæсарæйнаг хъуыддæгты министрады æххæстбарджын минæвар, дунеон æнæкоммерцион ассоциаци “Renaissance Sandidzan”-йы сæргълæууæг Пухаты Радион.

«29-æм июны Нидерландты æрцыд Ирыстоны культурон царды тынг ахсджиаг цау – горæт Еттен-Леуры Ван Гогы музейтæй сæ иуы байгом ирон нывгæнджыты уникалон равдыст. 2020-2021 азты пандемийы аххосæй «Европæйы ирон культурæйы бонты» фæлгæтты юбилейон мадзæлттæ уагъд не ‘рцыдысты, кæд æмæ цалдæр бæстæйы плангонд уыд цымыдисон программæ, уæддæр. Бакондæуыд стыр цæттæгæнæн куыст, рауагъд æрцыд каталог «Б2, 10 азы мадзæлттæн. Æмæ ныр та, ахæм цау», – банысан кодта Пухаты Радион.

Йæ ныхæстæм гæсгæ, равдыст уадзыны бынат у бынтон уникалон, кæддæр ацы музей уыд аргъуан, æмæ ныр хуыйны «Церковь Ван Гога». «Уым бирæ азты дæргъы службæ кодта фыд Ван Гог Теодорус. Растдæр ацы горæты (уæд хуынд Еттен) райдыдта йæ цыбыр сфæлдыстадон фæндаг Винсент Ван Гог. Ацы горæты йæ базыдтой куыд нывгæнæг, афтæ. Музейæ 15 метры æддæдæр уыд йæ фыццаг æрмадз, кæцы йын рахицæн кодта йæ фыд. Символикон аргъ 6.50 евройæ музеймæ бацæуджытæм æнхъæлмæ кæсы диссаджы цымыдисон радзырд Еттены Ван Гогы сфæлдыстад æмæ цардвæндаджы тыххæй. Уыцы цауты тыххæй, кæцытæ фæивтой æмæ бандæвдтой стыр нывгæнæджы цард æмæ хъысмæтыл», – радзырдта Пухаты Радион.

Уый ма банысан кодта, зæгъгæ, равдыст у уникалон, уый баиу кодта алы æмæ алы азты «Европæйы ирон культурæйы бонты» хайадисджыты се ‘ппæты дæр. «Алы фæлтæрты 23 нывгæнæджы æмæ 100 куыстæй фылдæр хаст æрцыдысты равдыстмæ. Символикон у уый дæр, æмæ пандемийы фæстæ мадзæлттæ кæй райдыдтой Ван Гог кæм райдыдта, уырдыгæй. Кæй зæгъын æй хъæуы, уый у ног æмвæзадмæ мадзæлтты рахызт. Хорз момент у фæрстæ афæлдахынæн æмæ ног фæзуæттæ æмæ ног континенттæ базонынæн æмæ сахуыр кæнынæн», – загъта уый.

Йæ ныхæстæм гæсгæ сæм цалдæр фæндоны æрбацыд Латинаг Америкæ æмæ Азийæ Европæйы персоналон равдыстыты æмæ гъæдджын фæзуæтты æмбырд кæнынæн. Пухаты Радионы ныфс ис, зæгъгæ, равдыст суыдзæн цахæмдæр трамплин ног бæрзæндтæ басæттыны тыххæй.