Горæт Сочæйы 1-æм марты федералон ахуырадон центр «Сириус»-ы уæрæх фæзуаты фæсивæдон дунеон фестивалы хайадисджытыл æмбæлдысты уырыссаг традицимæ гæсгæ – фысымтæ национ дарæсы, афтæмæй мидбылхудгæ æмæ «æгас цу»-йы ныхæстимæ æмбæлдысты алкæцы делегацийыл дæр цæхх æмæ кæрдзынимæ. Уазджытæй бирæтæ, уæлдайдæр Африкæйы бæстæты фæсивæд ацы традици зонгæ дæр нæ кодтой, фæлæ уырыссаг мæнæуæй фых кæрдзыны ад тынг хорз зонынц. Уæрæсейы Федераци Африкæмæ цы базайрæгтæ æрвиты, уыдонæй мæнæу у иууыл сæйрагдæр. Африкæйæгтæн стыр æхсызгон у, фестивалы хайад райсынæн сын фадат кæй ис æмæ уырыссаг культурæимæ æввахсдæр кæй базонгæ уыдзысты, уый.
Фæсивæды дунеон фестиваль цытджын æгъдауæй байгом 2-æм марты Уæрæсейы Федерацийы гимны зæлтимæ. Гом та йæ бакодта бæстæйы сæргълæууæг Владимир Путин. Уый йæ раныхасы банысан кодта фестивалы нысаниуæг æмæ раарфæ кодта фестивалы æппæт хайадисджытæн. «Уæрæсейы Федерацийæн сæйрагдæр уыд æмæ у дунейы бæстæты адæмты хæлардзинад æмæ уый тыххæй æппæт дæр арæзт цæудзæнис», – банысан кодта бæстæйы сæргълæууæг. Владимир Путин ма фæсивæдæн ныфс бавæрдта фестиваль сæ зæрдæмæ тынг кæй фæцæудзæн, позитивон эмоцитæ дзы кæй райсдзысты æмæ сæ хæдзæрттæм куы аздæхой, уæд сæ зæрдæты цæрæнбонтæм кæй баззайдзæн Уæрæсемæ уарзондзинад.
Фестиваль байгом кæныны цытджын церемони уыд цымыдисон æмæ хъæлдзæг. Уыцы уæрæх залы æппæт хайадисджытæ иумæ зарыдысты «Калинка», бирæтæ та йын йæ музыкæмæ кафгæ дæр кодтой. Æндæр æмæ æндæр бæстæты фæсивæды минæвæрттæ-иу сæрыстыр æмæ хъæлдзæгæй схæцыдысты сæ тырысатыл. Ирон тырысатыл бæрзонд хæцыдысты хуссарирыстойнаг æмæ цæгатирыстойнаг фæсивæд дæр. Галуаны иууыл зынгæдæр бынаты конд уыдис егъау уырыссаг триколор.
Фæсивæды дунеон фестиваль байгом кæныны цытджын церемонийы программæ уыдис хъæздыг æмæ мидисджын, фылдæр дзы уыдис музыкалон номыртæ. Ам хайад райстой зындгонд гоймæгтæ, – спортсментæ, эстрадон зарæггæнджытæ, театр æмæ кинойы артисттæ æмæ режиссертæ, куыд, зæгъæм, Константин Хабенский, Владимир Машков, Полина Гагарина, Алина Загитова, Леонид Агутин æмæ бирæ æндæртæ.
Хуссарирыстойнаг делегаци дæр стыр æхсызгонæй æмæ хъæлдзæгæй сæмбæлдысты фестивалыл. Делегацийы разамынад фембæлдысты зындгонд уæрæсейаг артист Иван Охлобыстинимæ. Уый Сылгоймæгты дунеон боны цытæн арфæ ракодта сæрмагонд æфсæддон операцийы хайад чи исы, уыцы хæстонты бинонтæн æмæ сын йæ цæст бауарзта фидар æнæниздзинад æмæ царды хæрзиуджытæ. «Мæ сæрæй ныллæг кувын Хуссар Ирыстоны сылгоймæгтæн. Уыдон схъомыл кодтой аккаг фырттæ æмæ уырыссаг салдаттимæ иумæ тох кæнынц фашизмы ныхмæ. Мах иумæ æнæмæнг фæуæлахиз уыдзыстæм знагыл», – банысан кодта уый.
Артистæн не ‘мзæххонтæ балæвар кодтой зæрдылдарæн монетæ «1100 лет крещения Алании», кæцыйы рауагъта Хуссар Ирыстоны банг.
Фестивалы нæ делегацийы уæнгтæм æнхъæлмæ кæсынц алыхуызон фембæлдтытæ æмæ мадзæлттæ.
Нæ уацх.
