Донецкæй нæм æхсæнадæмон æхсæнад «Землячество Алании»-йы сæрдар Бæззаты Еленæ куыд хъусын кæны, афтæмæй Донбассы сæрмæ ссыгъдысты фантастикæйы фæндзæм фестивалы стъалытæ «Звезды над Донбассом», зæгъгæ.
Ахæм Стъалытæй иу у быдзæу (клоун) Афоня – РЦИ-Аланийы горæт Дзæуджыхъæуы театр «Саби»-йы артист. Афоня у архайгæ реабилитолог-артист. Сывæллæтты реабилитацийы фæдыл йæ куыст райдыдта 2004 азы Беслæны теракты хъыгдардбаййафæг сывæллæттимæ.
Ацы бонты Гæпузты Григори (быдзæу Афоня) Донецкы Адæмон Республикæйы бабæрæг кодта цалдæр госпиталы сæрмагонд программæимæ, уагъта сын реабилитацион тренингтæ æмæ сын уыд хорз фæстиуджытæ.
«Землячество Алании»-йы минæвæрттæн дæр фадат уыд фантастикæйы фестиваль «Звезды над Донбассом»-ы программæйы хайад райсын волонтерты хуызы æмæ сын æххуыс кодтой Донбассы хæстон архайдтыты рæстæджы фæцæфуæвæг сывæллæттимæ куысты. Сывæллæттæн анимацион программæ равдыста Сывæллæтты республикон клиникон рынчындоны дæр, афтæ ма сын бакодта пайдайы гуманитарон æххуыс дæр. Фæцæфуæвæг сывæллæттæ аныгъуылдысты сфæлдыстадон дунейы æмæ хъæлдзæгдзинады атмосферæйы æмæ сæ худын хъуыст. Куыд зонæм, афтæмæй худын та у иууыл хуыздæр хос куыд хистæр кары адæмæн, афтæ сывæллæттæн дæр.
Бузныг зæгъæм фестивалы къухдариуæгад æмæ организатортæн, кæцытæ лæвæрттæ радтой госпиталты уæвæг сывæллæттæн. Сабырдзинад æмæ Уæрæсейы фæрныгадæн æмархайды куысты фадаты тыххæй. Фантастикæйы фестиваль йæ куыст кодта цалдæр боны дæргъы», – банысан кодта Бæззаты Еленæ.
2023 азы 5-æм дунеон фантастикон фестиваль «Звезды над Донбассом» реализаци кæны Донецкы Адæмон Республикæйы Æхсæнадон палатæ культурон инициативæты президентон фонды æххуысæй.
Фестивалы мадзæлтты фылдæр хай уагъд æрцыд Мариуполы, ацы горæты паддзахадон университеты æххуысæй. Фестивалы фæлгæтты уагъд æрцæудзæн 100 мадзалæй фылдæр. Фестивалы иууыл ирддæр хайадисджытæй иу уыд Гапузты Григори. Уый чысыл пациенттæн хуыздæр кодта сæ зæрдæйыуаг. Æндыгъд уавæрмæ гæсгæ-иу сæ бон куынæ ссис сывæллæттимæ аныхас кæнын, сæ рыст сын фæкъаддæр кæнын (афтæ уыд Донецкы, уымæн æмæ рынчындоны цур æрхауд снаряд æмæ йын йæ территоримæ никæ-йы уагътой), уæд та-иу сæ аивадмæ кæсджытæ систы, Мариуполы парчы чи тезгъо кодта, уыцы сы-вæллæттæ.
Фестиваль хæстæфхæрд Мариуполæн æрхаста ног царды æмæ уырыссаг культурæ æндидзынады ныфс. Æмæ Донбасс та дарддæр дæр ахæм стъалыты фæрцы рухс кæндзæн йæ цæрджыты æмæ уазджыты зæрдæтæ.
ДЖИОТЫ Екатеринæ
