Марты мæйы райдианы горæт Сочийы федералон ахуырадон центр «Сириус»-ы базæйыл уыдзæн Фæсивæды дунеон фестиваль. («Сириус»-ы 2014-æм азы уыд зымæгон Олимпиадæ, ныр уыцы территорийыл бакодтой ахуырадон центр Владимир Путины бахæсмæ гæсгæ). Уым хайад райсдзысты Хуссар Ирыстоны фæсивæды минæвæрттæ.
Фестивалмæ куыд цæттæ кæны нæ республикæ æмæ дзы хайад чи райсдзæн, уый тыххæй информацион агентад «Спутник Хуссар Ирыстон»-ы пресс-центры радзырдтой Национ цæттæгæнæн комитеты сæрдар Тедеты Азæмæт æмæ йæ коллегæ Джуссойты Дианæ.
Тедеты Азæмæт журналисттæн куыд фехъусын кодта, уымæ гæсгæ ацы фестивалы хайад райсын нæ республикæйы фæсивæдæй бирæты фæнды, фæлæ алкæй арвитынæн фадат нæй. «Сочийы фестиваль йæ программæмæ гæсгæ у хъæздыг æмæ цымыдисон. Хуссарирыстойнаг фæсивæдæй ам бирæты бафæндыд хайад райсын. 18 азæй уæлæмæ кæуыл цæуы, ахæм фæсивæдæй нæм æрбацыд 380 куырдиаты. Фæлæ, стыр хъыгагæн, нæ республикæйæн фестивалмæ цы квотæтæ рахицæн кодтой, уыдон къаддæр сты. Уымæ гæсгæ конкурс рацыдысты уыцы фæсивæды минæвæрттæ, кæцытæ уымæй размæ дæр уыдысты активон. Фыццаг нæ квотæтæ уыдысты 120 адæймагæн, фæлæ мах активонæй бакуыстам æмæ сæ фæфылдæр кодтам. Ныр фестивалы хайад райсдзæнис 135 адæймаджы», – загъта Тедеты Азæмæт.
Джуссойты Дианæ дæр банысан кодта фестивалы нысаниуæг, афтæ ма стыр хъусдард здæхт кæй цæудзæн хайадисджыты цæттæдзинад æмæ организацион хъуыддагмæ, æмæ ранымадта, нæ республикæйæ уырдæм кæй ацæудзысты культурæ, ахуырад, спорт, медиа, дипломати, IT-технологиты æмæ амалиуæгады къабазы æрыгон лидертæ.
«1-æм мартæй 7-æм мартмæ Сочийы ацæудзæн цымыдисон фестиваль æмæ уым архайдзысты æндæр æмæ æндæр бæстæты фæсивæды минæвæрттæ. Æдæппæтæй уым хайад райсдзæн 20 мин адæймаджы бæрц. Фæсивæды Дунеон фестивалы хайад райсыны тыххæй хуссарирыстойнаг фæсивæд се ‘ргом аздæхтой 13 фæдыздæхты. Уыдон нымæцы, зæгъæм, ис ахæм цымыдисон фæдыздæхт куыд «Æрыгон экологи» (ам хайад исдзæн æрмæст иу адæймаг). Волонтерты хъуыддаджы номæй чи цæуы, уыдонæн ис сæхи проекттæ æмæ сæ среализаци кæндзысты фестивалы мадзæлтты фæлгæтты. Мæ хъуыдымæ гæсгæ, ахсджиаг у нæ республикæйы алы фæдыздæхæны дæр равдисын куыд æмбæлы, афтæ», – банысан кодта уый.
Джуссойты Дианæ ма куыд фехъусын кодта, афтæмæй Фæсивæды дунеон фестивалы фæлгæтты Хуссар Ирыстон адæмы базонгæ кæндзæн национ культурæимæ. «Ахсджиаг у фестивалы хайадисджыты ирон национ культурæимæ базонгæ кæнын æмæ уый тыххæй «Сириус»-мæ æрвитæм зарæггæнджыты, кафджыты æмæ æндæр сфæлдыстадон адæймæгты. Национ культурææвдисæг адæймæгтæ уыдзысты дыууын артисты. Уымæй дарддæр ма фестивалы байгом уыдзæн равдыст-армукъа «Арт. Молодость»-ы проекты фæлгæтты. Уым нæ республикæйы нывгæнджытæй дыууæйæ байгом кæндзысты сæ куыстыты равдыст, нæ фæсивæды минæвæрттæй сæ иу та хайад райсдзæн армукъайы», – банысан кодта уый.
КОЦТЫ Еленæ
