25-æм январы Хуссар Ирыстоны паддзахадон университеты студенттæ традицион æгъдауæй банысан кодтой сæ хъæлдзæг æмæ рæсугъд бæрæгбон – Татьянæйы бон. Сесситы рæстæг у, фæлæ æрбамбырд сты Президент Гаглойты Алан æмæ университеты ректор Тедеты Вадимы арфæтæм байхъусынмæ. Фембæлд ацыд хъарм æмæ кæрæдзи хорз æмбарыны уавæры, адджын фынгты уæлхъус.
Студенттæ радзырдтой брæгбоны историйы тыххæй, цавæр нысаниуæг ын дæттынц æхсæнады, афтæ ма студентыл цы хæстæ ис, æппæт уыдæттыл. Уый фæстæ студентон фæсивæд сæ бæрæгбон хъæлдзæг зæрдæйы равгимæ адарддæр кодтой сæ бацæттæгонд концертон программæйæ, сæххæст кодтой зарджытæ, се студентон цардæй та хъæлдзæг миниатюрæтæ равдыстой.
Бæрæгбонон мадзалы студенттæн фадат уыдис, ахуырад æмæ студентон цардимæ баст, афтæ ма æндæр темæтыл бæстæйы сæргълæууæгимæ сæ цымыдисаг фарстытæ радтын дæр æмæ сын райстой аккаг дзуаппытæ. Зæгъæм, Президенты бафарстой, зæгъгæ, йæ уарзон зарæг æмæ кинонывы тыххæй, афтæ ма йæ куысты иууыл зындæр æмæ æнцондæрыл цы нымайы. «Зынаргъ, студенттæ, ноджыдæр уын арфæ кæнын уæ бæрæгбоны цытæн, фæнды мæ, цæмæй кæддæриддæр æгæрон аргъ кæнат ахуырадæн. Кæддæриддæр тырнут зонындзинæдтæ исынмæ, уымæн æмæ ууыл баст у уæ фидæн.
«Уæ фарстæн дзуаппгæнгæйæ, зæгъдзынæн уый, æмæ æнцон кæй ницы ис мæ куысты. Алы бон дæр хъæуы паддзахадон ахсджиаг фарстатæ скъуыддзаг кæнын, æмæ уымæн та хъæуы рæстæг. Иууыл зындæр та мын вæййы уый, æмæ цавæрдæр проблемæтæ куы фæзынынц, æмæ мæ бон куы ницы вæййы саразын. Зæгъæм, адæймаг у уæззау рынчын æмæ йын дæ бон ницы у баххуыс кæнын. Ахæм ситуацитæ та, хъыгагæн, бирæ вæййы. Фæлæ уын зæгъдзынæн – зындзинæдтæй нæ хъæуы тæрсын», – банысан кодта бæстæйы сæргълæууæг.
Студентты цымыдис кодта ахæм фарст дæр, зæгъгæ, нæй гæнæн æмæ нæм республикон æмвæзадыл сырæза волонтерон организаци, цæмæй йæ активисттæ бахъуыды рæстæджы республикæйæн æддейæ базонын кæной Хуссар Ирыстоны ном дæр. Ацы фарсты тыххæй сын Гаглойты Алан радта ахæм дзуапп, зæгъгæ, фарстыл ахъуыды кæнын хъæуы æмæ уæд уый фæстæ саразын хъæуы ахæм организаци. «Уæ хъуыды раст у, æз уемæ разы дæн æмæ ма сырæза, уый тыххæй ницы цæлхдуртæ уынын. Организацион фарстатæ мах исæм нæхимæ», – загъта паддзахады сæргълæууæг.
Студенттæ ма Гаглойты Аланы бафарстой, зæгъгæ, президент цахæм хъуамæ уа æмæ сын радта ахæм дзуапп, зæгъгæ, фыццаг рады хъуамæ уа æгъдауджын, ныфсджын, хæларзæрдæ æмæ нысанмæтырнæг.
Фæсивæдæн сæрмагондæй раарфæ кодта университеты ректор Тедеты Вадим дæр. Уый йæ арфæйы ныхасы банысан кодта, зæгъгæ, ныртæккæ уыдонæн сæ сæйрагдæр хæс кæй у ахуыр кæнын æмæ гъæдджын ахуырад райсын.
Студенттæ бацымыдис кодтой, ректормæ фидæны цавæр пълæнтæ ис æмæ цавæр ногдзинæдтæ æнхъæлмæ кæсы университетон цардмæ. Тедеты Вадим сын загъта: «Рæхджы байгом кæндзыстæм æфсæддон кафедрæ. Уый уыдзæн стыр къахдзæф, уымæн æмæ нæ уæлдæр ахуыргæнæндоны историйы никуы уыд ахæм кафедрæ. Уымæй дарддæр ма фæнд кæнæм университеты цур ирон æвзаджы райрæзты æмæ ирайнаг культурæйы центртæ бакæнын дæр», – загъта Тедеты Вадим. Уый ма цыбыртæй банысан кодта, университеты разамынадæн ивгъуыд аз цы ахсджиаг хъуыддæгтæ саразын бантыст, уыдæттæ. Зæгъæм, ацæугæ азы декабры мæйы ХИПУ æмæ Сирийы стырдæр горæт Алеппойы университетимæ æмгуыстады фæдыл сарæзта бадзырд. «Æввахс рæстæджы та, нæ бæстæйы сæргълæууæджы æххуысы фæрцы, мах, Дамаскы университетимæ бафысдзыстæм сразыдзинад. Афтæ ма фыццаг хатт паддзахадон драмон театры сценæйыл актерон факультеты студенттæ равдисдзысты спектакль», – банысан кодта ректор.
Бæрæгбонон фембæлды кæрон ма Президент Гаглойты Алан ЮОГУ-ТВ-йы коллективæн балæвар кодта ноутбук.
ЦХУЫРБАТЫ Ларисæ
