Æрæджы Цæгат Ирыстоны паддзахадон университеты, историон факультеты раз байгом сты, ныхас рагæй кæуыл цыд, уыцы курсытæ. Уый у историон-культурон туризмы специалистты цæттæ кæныны хайад. Ног къабаз хуыйны «Истори. Историон-культурон туризм».
Университеты разамонæг Огъуаты Аланы ныхасмæ гæсгæ, республикæйы рагæй кусынц фæлтæрдджын гидтæ, фæлæ хъуаг у историон туризмы специалисттæй. Ома, бынæттæ хорз зонынц, фæлæ сæм историйы зонындзинæдтæ фаг нæй. Уый та æнæмæнг хъæуы. Гид кæм куса, уыцы адæмы истори йæ фондз æнгуылдзау хъуамæ зона, йæ ныхасæй цымыдис æвзæрын кæна туристтæм.
Ныртæккæ мидбæстон туризм адæммæ кадджын кæй у, уый нымайгæйæ, ахæм специалисттæ цæттæ кæныны хъуыддагæн ис уæлдай стырдæр ахадындзинад. Программæйы хæс у канд Ирыстоны нæ, фæлæ Уæрæсейы историон-культурон туризмы специалисттæ цæттæ кæнын.
Республикæйы Сæргълæууæг Сергей Меняйло куыд загъта, афтæмæй стыр æргом аздахын хъæуы нæ историон-культурон бынтæ хъахъхъæнынмæ. Уымæн та хорз ахъаз фæуыдзысты ног, уæлдæрамынд курсытæ.
Ног хайады археологон æмæ этнографион практикæ чи цæуы, уыцы студенттæн амонынц Цæгат Кавказы истори, экскурсииртасынад æмæ æндæр дисциплинæтæ. Англисаг æвзаг æмæ истори ахуыр кæнынæй уæлдай ма стыр æргом здæхт цæуы дунеон ахастдзинæдтæ сахуыр кæнынмæ.
НОГ ПРОЕКТ – НОГ ФÆНДТÆ
Дзæуджыхъæуы кусын райдыдта æхсæнадон проект «Профилактический щит страны». Ацы æхсæнадон проект арæзт æрцыд Федерацийы Советы, Уæрæсейы Æнæниздзинад хъахъхъæнынады министрад «Терапи æмæ низ ма ‘руадзыны медицинæйы национ иртæстыты центр»-ы хъæппæрисæй.
Цæгат Ирыстоны Хицауады Сæрдар Дзанайты Барис дæр архайдта акци байгом кæныны хъуыддаджы. Егъау проектæн йæ нысæнттæ сты, цæмæй фылдæр адæм æркæсой се ʻнæниздзинадмæ, сæ царды уагмæ, уыцы фарстаты сæ зонындзинæдтæ фæуæрæхдæр уой.
Хицауады Сæрдар куыд банысан кодта, афтæмæй медицинон æххуысы хæрзгъæддзинад фæбæрзонддæр кæнынмæ республикæйы разамынад сæ цæст дарынц. Ахæм ахсджиаг проекттæ регионы æнæниздзинады уагæвæрдæн æрхæсдзысты стыр пайда. «Рагæй фæстæмæ дæр Цæгат Ирыстонмæ медицинон æххуыс агурæг цæуынц сыхаг республикæтæй. Уый та ууыл дзурæг у, æмæ хорз специалисттæ хъуаг кæй не стæм. Уырны мæ, ацы проектæн ноджы хуыздæр фæстиуджытæ кæй уыдзæн», – загъта Дзанайты Барис.
Проекты фæлгæтмæ хауынц хъæуты кусæг мобилон комплекстæ. Уыдон сæрмагонд транспортыл зилынц дæрддзæф районты æмæ рынчынты сгарынц. Ис сæм УЗИ, ЭКГ, туджы æлхъывдад барæн, гæнæн дзы ис анализтæ радтæн дæр.
Проект «Профилактический щит страны»-йы арæнты Цæгат Ирыстоны арæзт цæуынц æнæниздзинады скъолатæ алыхуызон тæссаг низтæ раиртасынæн, стыр фæлхасадон центрты байгом сты медицинон пункттæ, алкæмæн дæр йæ бон у йæ туджы æлхъывдад абарын æмæ, куы бахъæуа, уæд тагъд æххуыс райсын.
Нæ уацх.
