1918 азы марты Цхинвалы районы меньшевикты ныхмӕ фӕллойгӕнджыты растад хорзӕрдӕм бандӕвта фӕсивӕды революцион ӕмбаргӕдзинады сырӕзтыл.
Хистӕр фӕлтӕры революционертимӕ арӕх ӕмбӕлдысты фӕсивӕды иуӕй-иу минӕвӕрттӕ. Уыдон тырныдтой революцион куыстмӕ, фӕлӕ рӕстмӕ не ʻмбӕрстой сӕ тохы фӕндаг. Уымӕй дӕр сын сӕ зонд хӕццӕ кодтой меньшевиктӕ ӕмӕ эсерты политикон къордтӕ. Фӕлӕ фӕсивӕд агуырдтой райгуырӕн бӕстӕйы тохы фӕндӕгтӕ, фӕндыдис сӕ хистӕр фӕлтӕры фарсмӕ аккаг хуызы балæууын.
1919 азы Дзауы скъолайы ахуыргӕнинӕгтӕ сарæзтой библиотекæ. Фӕсивӕдӕн сӕ алы хъуыддаг хорзыл нымадта уыцы ахуыргӕнӕндоны педагог Санахъоты Уасил. Ирон интеллигенцийы минæвæрдтæ дӕр ыл стыр цинимæ сӕмбӕлдысты ӕмӕ библиотекӕйӕн лӕвӕрдтой чингуытӕ. Чиныгкӕсджытӕ сӕхи ӕхцайӕ фыстой газеттӕ ӕмӕ журналтӕ.
Библиотекӕ стыр ахъаз фӕцис фӕсивӕды идейон ӕмӕ организацион ӕгъдауӕй сӕнгом кӕныны хъуыддаджы. Уыдон-иу ам уынаффӕ кодтой алы ӕмӕ алыхуызон фарстатыл, ӕвзӕрдис сӕм революцион хъуыдытӕ. Уыцы рӕстӕджы сӕ фарсмæ балӕууыдысты фӕлтӕрд большевиктӕ, Хуссар Ирыстоны партион организаци саразджытæ Санахъоты Владимир, Плиты Арон ӕмӕ Гаглойты Сергей. Адон арӕх ӕмбӕлдысты фӕсивӕдимӕ ӕмӕ сын разамынд кодтой сӕ куыстæн. Сӕ радон сусӕг ӕмбырды фæсивæд иу хатт рахастой фӕндон организаци саразыны тыххӕй, схуыдтой йӕ «Спартак».
Хуссар Ирыстоны фӕсивӕдон организаци «Спартак»-ы аразджытӕ уыдысты Плиты Симон, Гаглойты Данел, Саулохты Симон, Санахъоты Аршак, Хъӕцмӕзты Пируз, Санахъоты Лео, Тотыраты Мырзӕ, Цхуырбаты Ефим ӕмӕ ӕндӕртӕ. Организацийы рӕнхъыты уыд 45 адӕймаджы. 1919 азы кӕрон йӕ чыртӕ фӕзындысты Цхинвалы, Цъунары, Хъорнисы, Ортъеуы, Хъемултайы, Куатетрийы, Часавалы, Рукъы ӕмӕ Едысы. Меньшевикты агентурӕ тынг къуылымпы кодта фӕсивӕды куыст. Уыдон фӕндыд фӕсивӕды организаци ныххурх кӕнын ӕмӕ уый тыххӕй Дзауы комы сарӕзтой сӕхи меньшевикон къорд, кӕцы ныхдуртӕ ӕвӕрдта «Спартак»-ы раз.
«Спартак»-ы уӕнгтӕ Дзауы скъолайы ралӕууыдысты, урокты сын хуыцауы закъӕттӕ кӕй амыдтой, уый ныхмӕ æмæ нал цыдысты уыцы уроктӕм. Ахуыргӕнджытӕй меньшевикон ахаст кӕмӕ уыд, уыдон загъд самадтой, «Спартак»-ы уӕнгтӕм ӕртхъирӕн кодтой ахуыргӕнӕндонӕй сисынӕй, ӕрцахсынӕй. Фӕлӕ сӕм ахуыргӕнӕндоны инспектор Санахъоты Малхазы фырт Иуане та каст хорз цӕстӕй, лӕууыд сӕ архайды фарс ӕмӕ йӕ уымӕ гӕсгӕ меньшевиктӕ йӕ куыстӕй систой. Уыцы ӕвирхъау миты ныхмӕ спартаконтӕ ахуыргӕнинӕгты растын кодтой. Ахуыргӕнинӕгты иумæйаг ӕмбырд равзӕрста къамис 12 адӕймаджы скондӕй ӕмӕ йын бахӕс кодта, Санахъоты Иуанейы йӕ куыстӕй цы аххосӕгтӕм гӕсгӕ ссӕрибар кодтой, уый рабæрæг кæнын.
Къамис цалдӕр хатты гӕххӕтт арвыста адӕмон рухсады меньшевикон министрадмӕ, фӕлӕ дзуапп нӕ райста. Уый бӕсты Гуры къамисариат Дзаумӕ, ахуыргӕнинӕгты ӕрсабыр кӕнынмӕ ӕрбарвыста милицийы, фӕлӕ спартаконтӕ фидар фӕлӕууыдысты сӕ ныхмӕ. Меньшевиктӕ фӕнд кодтой къласгай ӕмбырдтӕ ауадзын, фӕлӕ ахуыргӕнинӕгтӕ не сразы сты сӕ фӕндыл ӕмӕ ауагътой иумæйаг ӕмбырд. Уыцы ӕмбырды меньшевиктӕ бафӕдзӕхстой ахуыргӕнинӕгты, зӕгъгӕ, ахуыргӕнджытӕ ӕмӕ хицауады ныхмӕ куы лӕууой, уӕд сæ æрцахсдзысты. Ӕрдомдтой, цӕмӕй сын ахуыргӕнинӕгтӕ схъӕр кодтаиккой фӕткхалджыты, кӕннод, дам, уӕ Метъехы ахӕстоны смидӕг кӕндзыстӕм.
Ӕмбырды ахуыргӕнинӕгтӕ меньшевикты хицауады раз ӕрӕвӕрдтой цалдӕр фарсты: ахуыры нывӕсты ирон ӕвзагӕн цъус сахаттӕ цӕмӕн ис; цы дӕтты ахуыргӕнинӕгтӕн хуыцауы закъон æмæ ма фарстой, зæгъгæ, ахуыргӕнӕндоны инспектор Санахъоты Иуанейы цӕмӕн систой йӕ куыстӕй. Ацы фарстатӕн меньшевиктӕ ницы рӕстмӕ дзуапп лӕвӕрдтой, ӕрмӕст ӕртхъирӕн кодтой спартаконтæм.
Рӕстӕг цыд ӕмӕ уавӕр ноджы фӕкарздӕр. Спартаконтӕ ахызтысты сусӕг куыстмӕ. Разамынад та сын кодта УК(б)П Хуссар Ирыстоны округон комитет. 1919 азы октябры мӕйы сусӕг ӕмбырды арӕзт ӕрцыд «Спартак»-ы сусӕг комитет. Комитетӕн йе сконды уыдысты Плиты Симон (сӕрдар), Санахъоты Лео (нымӕрдар) ӕмӕ Гаглойты Данел.
Фӕсивӕдон организаци зындӕр аразӕн уыд Цхинвалы. Горӕты меньшевиктӕн ӕнцондӕр уыд цахӕмфӕнды организаци ныцъцъист кӕнын, фӕлӕ уымӕ нӕ кӕсгӕйӕ, фӕсивӕд кодтой революцион куыст. Кусӕг фӕсивӕд нæ уыд Цхинвалы æмæ уымӕ гӕсгӕ революцион организаци аразыны инициатортӕ уыдысты ирон гимназийы ахуыргӕнинӕгтӕ. Ахуыргӕнинӕгтӕн ӕххуыс кодта сусӕг партион организаци. Уый сорганизаци кодта чингуытӕуӕйгӕнӕн дукани «Коробка» библиотекӕимӕ. Ирон интеллигенци, уӕлдайдӕр Хъуылаты Сикъо, ӕлхӕдтой литературӕ, ӕмбырд ӕй кодтой цӕрджытӕй, уый фӕстӕ йӕ дукани ӕмӕ библиотекӕйы фӕрцы хӕлиу кодтой адӕмы ʻхсӕн. Ам уӕй кодтой Хетӕгкаты Къостайы чиныг «Ирон фӕндыр», Къубалты Алыксандры «Ӕфхӕрдты Хӕсанӕ» ӕмӕ ӕндӕртӕ.
Ирон гимназы ахуыргӕнинӕгтӕ арӕх цыдысты библиотекӕ ӕмӕ дуканимӕ. Уым-иу уыдонимӕ ныхас кодта Хъуылаты Сикъо, ӕмбарын сын кодта цымыдисон фарстытӕ. Иу сусӕг ӕмбырды сын загъта сусӕг къорд саразыны фӕнд. Уыцы къордмӕ бацыдысты Джиоты Иван, Харебаты Ясон, Битеты Алыксандр, Цоциты Илья, Цхуырбаты Гено, Абайты Уахтанг, Хъоцыты Витали ӕмӕ Гасситы Виктор.
Гимназы уагътой журнал «Фӕдисон». Журнал уыд педсоветы орган. Цхинвалы партион ӕмӕ фӕсивӕдон организацитӕ журналӕй пайда кодтой большевикон идейæтӕ парахат кӕныны хъуыддаджы. Фӕсивӕды сусӕг къорд Хъуылаты Сикъойы разамындӕй 1919 азы декабры рауагъта къу-лы газет «Спартак» ӕмӕ прокламаци «Большевик».
1919 азы кӕрон меньшевиктӕ ахсын райдыдтой сусӕг организацийы уӕнгты, фӕлӕ сын уыдон ницы хъӕр кодтой. Меньшевиктӕ цы сусӕг куыстгӕнджыты ӕрцахстой, уыдоны ӕфхӕрдтой. Ныййарджыты комитет ӕмӕ педагогон совет ныллӕууыдысты меньшевикты хицауады фыдмиты ныхмӕ. Ӕмӕ ахст цы фӕсивӕд уыдысты, уыдон цалдӕр боны æххормагдзинад расидтысты ӕмӕ сæ, бар-ӕнӕбары, меньшевиктæ ссӕрибар кодтой, фӕлӕ фæсивæдæн меньшевикты хицауад нӕ радта горӕтӕй искуыдӕм ацӕуыны бар, сӕ фӕдыл зылдис. Уæддæр сусӕг къорд дарддӕр кодта йӕ революцион куыст, фылдӕр кодта йӕ рӕнхъытӕ, сӕхи цӕттӕ кодтой меньшевиктимæ тохтӕм.
Æвзонг адæмы архайд уӕлдай тынгдӕр фӕбӕрӕг 1919 азы фӕззӕг ӕмӕ зымӕджы уӕззау бонты. Уӕд Хуссар Ирыстонмӕ цӕгатӕрдыгӕй ӕртхъирӕн кодтой Деникины къордтӕ, хуссарæрдыгæй та, англисаг оккупанттӕ кӕмӕн ӕххуыс кодтой, меньшевикты уыцы гварди. Революционерты хистӕр фӕлтӕримӕ иумӕ фӕсивӕд дӕр сӕхи цӕттӕ кодтой Гуырдзыстоны ӕппӕтиумæйаг ӕдгӕрзтӕ растадмӕ. Уыцы растад хъуамӕ уыдаид 1919 азы 7 ноябры. Хуссар Ирыстоны фӕллойгӕнджытӕ уӕлдай зындзинӕдтӕ бавзӕрстой, 1919 азы фӕззӕджы меньшевикты булкъон Химшиашвилийы ӕфхӕрӕг ӕфсӕдтӕ куы ӕрбабырстой, уӕд.
Хашур, Меджырсхеу, Ахалцих, Хцис ӕмӕ Атены растадтӕ меньшевиктӕ куы ныддӕрӕн кодтой, уæд уый фӕстӕ та сфӕнд кодтой Хуссар Ирыстонӕй дӕр сӕ маст райсын. Уымӕн ӕмӕ, дам, уыцы растадты амидигӕнӕг Ручъы растад уыд.
Меньшевикты хицауад йе ‘фсадӕн бахӕс кодта: ӕрзилут ӕнӕхъӕн Хуссар Ирыстоныл, сӕ гӕрзтӕ байсут зӕхкусджытӕн, ӕрцахсут «змӕнтджыты». Цы гӕнӕн ма уыд, мӕгуыр сӕ бон, растадонтӕн дӕр ӕмӕ хӕхтӕм фӕлыгъдысты. Сӕйраг штаб арӕзт ӕрцыд Кастауы. Уыцы рӕстӕджы спартаконтӕн бахӕсчындӕуыд ныхмӕлӕууӕджы тыхтӕ базонын. Спартаконтӕ 15-17 аздзыд лӕппутӕ кӕй уыдысты, уымӕ гӕсгӕ сын нӕ уыд, знаджы пулеметтӕ ӕмӕ сармадзантӕ кӕм уыдысты, уыцы бынӕттӕм бацӕуæн. Фӕлӕ уæддæр спартаконтӕ бирӕ зонӕнтӕ хастой знаджы тыххӕй штабмӕ.
1919 азы декабры Хуссар Ирыстоны партизантӕй Цӕгат Кавказмӕ чи ахызт, уыдонӕн 1920 азы зымӕджы бастдзинад нал уыд Хуссар Ирыстонимӕ. Хуссар Ирыстоны Округон комитет дӕр ницыуал хъуыста Дзӕуджыхъӕуы парторганизацийӕ. Уӕд Округон комитеты бахӕсмӕ гӕсгӕ, спартаконтӕ Хъӕцмӕзты Пируз, Санахъоты Аршак ӕмӕ Саулохты Симон 1920 азы зымӕджы Дзомагъы ӕфцӕгыл ахызтысты Дзӕуджыхъӕумӕ. Меньшевиктӕ, ацы хабар базонгӕйӕ, спартаконты бӕргӕ асырдтой, фӕлӕ сӕ нал аййӕфтой.
Сырх Æфсад 1920 азы Цӕгат Кавказы дӕрӕн кӕнын райдыдта Деникины ӕфсӕдты. Сырх ӕфсад цӕттӕ уыд ӕфцгуыты сӕрты рахизынмӕ ӕмӕ уӕд Гуырдзыстоны меньшевиктӕ сфӕнд кодтой се ‘фсад Хуссар Ирыстоны ӕфцджытӕм бакалын. Фӕлӕ сырх партизантӕ, семӕ 400 ӕвзонг лӕппуйы, афтӕмӕй ӕрлӕууыдысты ӕфцгуытæ хъахъхъӕныныл. Сӕ иу къорд та ахызт Цӕгат Ирыстонмӕ, цӕмӕй хайад райстаид контрреволюци ныддӕрӕн кӕныны тохты. Уыдон Беслæны баиу сты Санахъоты Матейы къордимӕ ӕмӕ сӕ Кавказы крайон комитеты уынаффӕмӕ гӕсгӕ 23 мартъийы арӕзт ӕрцыд бригадӕ.
1920 азы райдианы спартаконты фылдӕр хай уыдысты Дзӕуджыхъӕуы. Уыцы аз, майы райдианы, ӕвзӕрст ӕрцыд «Спартак»-ы комитет Плиты Симон (сӕрдар), Санахъоты Лео (нымӕрдар) ӕмӕ Гаглойты Даниелы скондæй.
Спартаконтӕ активон хайад райстой 1920 азы июны цауты. Сӕйраджыдӕр уыдысты пулеметчиктӕ, ӕмӕ Цхинвал ссӕрибар кӕныныл тохы сӕрсӕттӕн цӕф кодтой меньшевиктæн.
Июны растад цъист куы ӕрцыд, уӕд та Хуссар Ирыстоны фӕллойгӕнджыты ногӕй лидзын бахъуыд Цӕгат Ирыстонмӕ. Спартаконтæ бацыдысты Хуссар Ирыстоны дыккаг бригадӕмӕ, фӕстӕдӕр райстой хайад Кубань ӕмӕ Терчы урсгвардион инӕлӕрт-тӕ Хвостиков, Крижановский ӕмӕ Слащевы контрреволюцион тыхтӕ дӕрӕн кӕны-ны, Ессентук – Кисловодскы районы урс хъазахъӕгты ныддӕрӕн кӕныны. Ацы тохты хъайтарон ӕгъдауӕй фæмард сты Санахъоты Платон, Джыгкайты Георги ӕмӕ ӕндӕр æвзонг лæппутæ.
Кӕд сӕдӕ азæй фылдæр рацыди, уӕддӕр абоны бон ирон адӕм мысынц, сӕ цард нывондӕн чи ӕрхаста райгуырӕн бӕстӕйы сӕрапонд, уыцы ӕнӕмӕлгӕ хъайтарты.
БЕКЪОЙТЫ Майя
Къамы Хуссар Ирыстоны фæскомцæдисы кусджытæ (1923):
Бадынц (галиуæй-рахисæрдæм): Джиоты И. (спартакон), Гаглойты М., Санахъоты В. (компартийы къухдариуæггæнæг), Гæззаты Г., Тедеты Л. Лæууынц: Гасситы В. (спартакон), Тедеты А., Гасситы И., Гæззаты З., Тыбылты С., Карели И.
Газет «Республика»-йæ ист кам.
