5-æм июны официалонæй байгом Цхинвал-Къостайыхъæуы доны хæтæл. Уыцы церемонийы хайад райста нæ республикæйы Президент Гаглойты Алан дæр.
Ацы цаумæ рагæй æнхъæлмæ кастысты Къостайыхъæу æмæ Тъбеты хъæуы цæрджытæ.
Паддзахадон унитарон куыстуат «Водорканал»-ы сæргълæууæг Сиукъаты Иван радзырдта паддзахады сæргълæууæг æмæ иннæ уазджытæн, ацы объекты руаджы кæй аскъуыддзаг уыдзæн Къостайыхъæу æмæ Тъбеты нырмæ цы доны цухдзинады проблемæ уыд, уый.
«Цхинвал-Цъунар æмæ Тъбеты хъæуты цæрджытæ ныр ифтонг уыдзысты донæй. Доны хæтæл æрвылбон дæтдзæн фæйнæ цыппар сахаты райсомæй æмæ изæры 7 сахатæй 11 сахатмæ. Фæлæ куыд зонæм, афтæмæй ацы аз бавналдзыстæм Едыс-Цхинвалы сæйраг магистралы арæзтадмæ. Уый капиталонæй арæзт æрцæудзæн, уый фæстæ Цхинвал-Къостайыхъæуы доны хæтæл дæр кусдзæн æрвыл суткæ. Ныр дæр цæрджытæ доны хъуагдзинад нæ фæхатдзысты. Уымæн æмæ резервуарты цы дон уа, уый графикыл не ‘ндавдзæнис».
Гаглойты Алан лæмбынæг æрдзырдта ахæм вазыгджын объектты эксплуатацимæ лæвæрд куыд æхсызгон вæййы республикæйы къухдариуæгадæн.
«Хъæуы адæмæн дон ифтонгад æхсызгондзинад хæсдзæн. «Водоканал»-ы кусджытæ зæрдæбын куыст бакодтой. Донуадзæн системæ саразын æнцон нæ уыд. Ацы хъæутæ донæй ифтонг цæмæй æрцыдаиккой, уый тыххæй дзæвгар куыстытæ баконд æрцыд.
Ныр ацы æмбырдгæнæн суткæйы дæргъы дæтдзæн 10 кбм дон. Ныртæккæ мах архайæм, цæмæй ахæм донæмбырдгæнæнтæ саразæм æндæр районты дæр. Доны хæтæлтæ арæзт хъуамæ æрцæуой æгас республикæйы. Едыс-Цхинвалы магистралон донуадзæн эксплуатацимæ лæвæрд куы уа, уæд нæ адæм бирæ азты цæмæ бæллыдысты, уый сæ къухы бафтдзæнис. Нырмæ куыд уыд, ома, уалдзæджы æрбалæудимæ доны дебет иу куыд æрхауд, афтæ нал уыдзæн. Къæвдаты рæстæджы-иу дон алыгъуызон бырæттæ ласта. Уыцы проблемæ дæр иуварсгонд æрцæудзæн».
Уый фæстæ Президент йæ фæндаг акодта Паддзахадон унитарон куыстуат «Водоканал»-мæ. Уым æм æнхъæлмæ кастысты куыстуаты кусджытæ æмæ сын Гаглойты Алан официалонæй бузныг загъта сæ цæсгомджын куысты тыххæй.
Уазæгты Марфа
