Хуссар Ирыстоны фыццаг хатт уагъд æрцыд дунеон турнир тыхон экстримæй «Фыдæлты тых», зæгъгæ, ахæм номимæ. Ерыстæ уагъд æрцыдысты Фæсивæдон политикæ æмæ спорты фæдыл комитет РХИ-йы Хæдбардзинады Акт райсыны боны цытæн цы ерыстæ уагъта, уыдон фæлгæтты. Турниры призон фонд уыд 150 мин сомы. Рахицæн сæ кодта РХИ-йы Президент Гаглойты Алан. Ерысты хайад райстой 8 спортсмены Хуссар Ирыстон æмæ Уæрæсейæ – Пухаты Владимир, Козаты Андрей, Тадтаты Олег, Асаты Арсен, Магомед-Башир Мержоев, Денис Кашпаров æмæ Хъыбызты Марат. Уыдон сæ тыхтæ фæлвæрдтой 5 дисциплинæйы. Нырма уал райдыдтой йæ уæз 320 кг кæмæн уыд, ахæм цалх фæлдахынæй. Цалх 1,5 минутмæ хъуамæ афæлдæхтаиккой 10 хатты. Дарддæр сæ уæхскмæ истой,  йæ уæз 100 килограммы кæмæн уыд, ахæм æрдзон дур. Æртыккаг фæлтæрæн уыд, йæ уæз 100 килограммы кæмæн уыд, ахæм дыууæ баллонимæ, снысангонд рæстæгмæ 20 метры ацæуын. Карз тох цыд цыппæрæм фæлтæрæны дæр. Уым йæ хайадисджытæ хæрдмæ истой спецификон снаряд, хиаразгæ хъæд. Уымæн йæ уæз нырма уыд 100 кг, фæлæ йын иу зылдæй иннæмæ йæ уæзмæ æфтыдтой. Иууыл фæстагмæ йæ уæз уыд 140 кг. Уый систа æрмæстдæр Хъыбызты Марат. Фæстаг фæлтæрæны онг Марат æмæ Денис Кашпаровæн уыд фæйнæ 28 баллы, 27 балл та æрæмбырд кодта Магомедбашир Мержоев. Уымæ гæсгæ уæлахиздзау бæрæг цыд фæстаг фæлтæрæны фæстиуджытæм гæсгæ. Ерысты уагæвæрдмæ гæсгæ уым та спортсментæ хъуамæ аластаиккой згъæрæфтыд (бронированная) машинæ «Тигр». Уымæн йæ уæз уыд 8 тоннæйы æмæ 300 кг бæрц. Уый иууыл дарддæр аласта æмæ турниры уæлахиздзау ссис Денис Кашпаров. Дыккаг бынат бацахста Хъыбызты Марат æмæ æртыккаг та ссис Магомед-Башир Мержоев.

Кæронбæттæны турниры уæлахиздзауы бахъуыд медикты чысыл æххуыс дæр, афтæ тынг йæ хæцъæфтæ ныхъæбæр сты, æмæ иу цасдæр йæхимæ нал цыд.

«Ерыстæ тынг хорз рауадысты. Тынг цымыдисон фæлтæрæнтæ уыдысты. Уæлдай мæ рахицæн кæнын фæнды фæстаг ерысты. Æз мæхæдæг бирæ уæззаудæр машинæтæ ластон, фæлæ мын ныр куыд зын уыд, афтæ никуы. Уымæн ма йæ сæйраг аххосаг уыд уый дæр, æмæ машинæ кæй лæууыд лидзыны секторы, цыран ис фæлмæн цъар. Фæнды мæ иннæ хатт дæр ацы турниры хайад райсын», – банысан кодта Денис Кашпаров.

Ерысты уæлахиздзау æмæ призерты схорзæхджын кодтой Парламенты 8-æм æрсидты депутаттæ Хубежты Руслан æмæ Сиукъаты Алымбег, афтæ ма «РХИ-йы пауэрлифтинг æмæ тыхон экстримы федераци»-йы президент Æлборты Леван. Уыдон ма уæлахиздзауæн æмæ призертæн РХИ-йы Президент Гаглойты Аланы номæй радтой æхцайы премитæ – 70, 50 æмæ 30 мин сомы.

Турнир ауадзынæн ма финансон æххуыс  бакодта политикон парти «Ныхас».

ХУРИТЫ Батрадз 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.