Хъæууон фæллойгæнæг цæмæй йæ дыргъдæттæ æмæ байтыдтытæй хъæздыг тыллæг райса, уый бирæбæрцæй кæнгæ у, донхæры донæй куыд ифтонг цæуа, уымæй. Нæ республикæ дæр хъæздыг у донхæры доны гуырæнтæй. Фæлæ нын цæмæй уый æххæст кæна нæ домæнтæ, уый тыххæй та адæймаджы бахъæуы бæрæг куыст бакæнын. Ацы ахсджиаг фарстмæ та æмбæлон хъусдард здахы паддзахадон куыстуат «Мелиораци». Куыстуаты сæргъ æрæджы слæууыд Годжыцаты Таймураз, фæлæ ныридæгæн бæрæг у, йæ хæстæ æххæст кæнынмæ кæй кæсы бæрндзинады цæстæй. Коллектив ног донхæргæнæн сезонмæ йæхи цæттæ кæны зæрдиагæй. Цæмæй дон æнæкъуылымпыйæ хæццæ кæна хицæн æмæ хицæн хъæууон бынæттæм, уый тыххæй кусджыты бахъуыд бафыдæбон кæнын. Ахсджиаг куыстытæм бавнæлдтой февралы райдианы æмæ сын бантыст дзæвгар. Фыццаг рады куыстытæ райдыдтой Тъирипонайы къанау сыгъдæг кæнынæй æмæ дзы кусджытæ бакуыстой цыппар боны. Бантыст сын къанау 1500 метры бæрц æрбæстон кæнын. Хъаруджын куыст дзы бакодтой бульдозер æмæ экскаваторыл кусджытæ Гуыцмæзты Инал æмæ Кокойты Вадим, стæй КамАЗ-ы шофыртæ Хетæгкаты Нодар æмæ Багаты Батрадз.
Уый фæстæ куыстуаты кусджытæ бавнæлдтой Салтисы къанау сыгъдæг кæнынмæ. Ацы донæй цæуы нæ горæты цадмæ дæр, фæпайда ма кæнынц Гудзабары хъæуы цæрджытæ. Æмбæлон уагмæ йæ æркæныны тыххæй хъуыд лæгдыхæй куыст бакæнын дæр æмæ уыдон та уыдысты Кокойты Арсен, Козаты Сослан æмæ Джиджджойты Димитр. Дарддæр сыгъдæггæнæн куыстытæм бавнæлдтой Тъбеты хъæуы. Ацы бынаты зындæр уыд куыстытæ æххæст кæнын, уымæн æмæ æмбæрзт уыд бетонон къæйдуртæй. Уый тыххæй уал сæ раздæр иста автокран æмæ йæ уый фæстæ сыгъдæг кодтой. Фæлæ уæддæр кусджытæ иууыл тынгдæр бафыдæбон кодтой Къостайыхъæуы ныгуылæнæрдыгæй фарс. Куыд рабæрæг, афтæмæй ацы бынат 2006 азæй фæстæмæ сыгъдæг никуыуал уыд æмæ дзы бакуыстой 3 къуырийы. Ацы бынаты дæр къанау æмбæрзт уыд къæйдуртæй æмæ йæ бæстон ссыгъдæг кæныны тыххæй коллективы бахъуыд 200 къæйдурæй фылдæр сисын æмæ йæ уый фæстæ та сыгъдæг кæнын. Куыстыты уæлхъус уыд сæйраг инженер Джиоты Алыксандр дæр æмæ йæ хъус дардта куыстыты цыдмæ. Се ‘ппæт дæр бакодтой активон куыст, уыцы нымæцы Къæбысты Отар, Хъæцмæзты Леонид, Козаты Сослан, Кокойты Арсен, Тыджыты Раман, Болататы Олег, краныл кусæг Хъазиты Тамаз æмæ æндæртæ. Ныртæккæ та кусджытæ къанау сыгъдæг кæныныл кусынц Къуернеты бынмæ, афтæ ма къанаугæрæтты бæлæстæ æмæ къутæртæ дæр лыг кæнынц. Годжыцаты Таймураз куыд загъта, уымæ гæсгæ къанауы дон хъæутæм ацæудзæн ацы мæйы кæрон æмæ дзы нæ хъæууон цæрджытæ пайда кæнæд зæрдæйы фæндиаг.
ХУЫБИАТЫ Никъала