Ахуырады министрады скъолайы агъоммæ, уæлæмхас ахуырад æмæ социалон хъахъхъæнынады хайады хистæры хæдивæг Цхуырбаты Вильма куыд загъта, афтæмæй Коммерцион банк «Æхсæнадæмон хыгъдон банк» материалон æххуыс бакодта нæ республикæйы рауагъдонтæй æххуысхъуаг чи у, уыдонæн. Цæмæй сæхицæн рауагъдонты балмæ балхæной дарæс. Ахæм æххуыс райстой 56 чызджы æмæ лæппуйы. 26 880 сомы алкæмæн дæр радтой банджы кассæйæ æмæ сæхи сфæлыстой бæрæгбонмæ, кæцы ацæудзæн 23 июны Цхинвалы Театралон фæзуаты.
Ацы аз нæ республикæйы ис 500 рауагъдонæй фылдæр. Рауагъдон бал конд уыдзæн цалдæр хайæ. Бæрæгбон хуызæй зноны скъоладзаутæ цытджынæй рацæудзысты сырх гауызыл. Уыдонæн арфæтæ ракæндзæн нæ паддзахады сæргълæууæг, ахуырады министр, Спорт æмæ фæсивæды комитеты сæргълæууæг, сæ ахуыргæнджытæ. Уый фæстæ райдайдзæн концерт. Архайдзысты дзы Хуссар æмæ Цæгат Ирыстон-Аланийы зарæггæнджытæ. Концерты фæстæ рауагъдонтæй алчидæр йе ‘мкъласонтимæ абаддзæн бæрæгбонон фынджы уæлхъус.
