Цхинвалы районы администрацийы Культурæйы управлени (хистæр Гаглойты Ростик) кæддæриддæр стыр хайбавæрд хæссы нæ национ культурæйы размæцыдмæ районы хъæуты Культурæйы хæдзæртты, клубты æмæ адæмон театры коллективты архайды фæрцы. Аивадон коллективтæ, хæдархайгæ къордтæ сæ ралæудтытæй стыр æхцондзинад хæссынц æрмæст районы нæ, фæлæ республикæйы цæрджытæн дæр. Хицæн сфæлдыстадон коллективты архайдимæ зонгæ сты республикæйæн æддæйæ дæр.
Аивадон коллективты архайды æм-вæзад фæбæрзонддæр кæнын, репертуар сын фæхъæздыгдæр æмæ хуыздæрты ‘хсæн хуыздæртæ рабæрæг кæныны нысанæн алы аз дæр се ‘хсæн уагъд æрцæуы æркаст-конкурс. Ахæм, æркаст-конкурс уагъд æрцыд æрæджы дæр. Уым фæбæрæг сты хуыздæр сфæлдыстадон коллективтæ. Уыдон та 16-æм июны Киноконцертон зал «Чермен»-ы равдыстой гала-концерт.
Концертмæ æрбацыдысты аивадæн табугæнджытæ, РХИ-йы Культурæйы министрады æмæ Цхинвалы районы администрацийы Культурæйы управленийы минæвæрттæ, афтæ ма сывæл-лæтты ныййарджытæ сæ кæстæрты арæхстдзинадмæ бакæсынмæ.
Концерт байгом кодта Тъбеты Культурæйы хæдзары кафджыты хæдархайгæ къорд «Барс» кафт «Симд»-æй. Ансамбль «Барс» у горæт Железноводскы уагъдæрцæуæг хореографийы 5-æм Дунеон конкурс «Танцы плюс»-ы хайадисæг. Уым «Барс» рамбылдта Гран-при æмæ йын радтой I къæпхæны диплом дæр (йæ аивадон къухдариуæггæнæг – Хуссар Ирыстоны сгуыхт артист Санахъоты Инал).
«Барс» сценæмæкæсджыты размæ рахаста ахæм кæфтытæ, куыд «Хонгæ кафт», «Хæххон кафт», «Амазонкæты кафт», «Смуглянка» æмæ «Абхазаг кафт».
Сценæйыл æмдзæвгæтæ аив кæсынæй сæ арæхстдзинад равдыстой æрыгæтты ʻхсæн РЦИ-Аланийы литературон журнал «Мах дуг»-ы дунеон конкурс-æркаст «Базыртæ»-йы уæлахиздзау, Къостайыхъæуы астæуккаг скъолайы 11-æм къласы ахуыргæнинаг Джиоты Миланæ (Плиты Грисы æмдзæвгæ «Мад»). Масштабон телепроект-конкурс «Дзырд»-ы хайадисджытæ Дменисы хъæуæй Уалыты Аслан (æмдзæвгæ «Иу Ирыстон ис зæххыл») æмæ Сидамонты Владик (æмдзæвгæ «Сабыр адæм – нывонд нæ сæртæ»).
Концертмæ æрбацæуджытæ æхцондзинад райстой Къостайыхъæуы Культурæйы хæдзары (йæ директор Мамиты Дзерассæ) хæдархайгæ къордты ралæудтытæй дæр. Чысыл зарæггæнджытæ Хуыбиаты Аслан æмæ Марат азарыдысты зарæг «Хистæры зарæг». Кафджыты къорд (аивадон къухдариуæггæнæг Куыдзеты Янæ) та акафыд «Чызджыты кафт» æмæ «Авайраг кафт».
«Фæндыры зæлтæ» сæххæст кодта Республикæ Хуссар Ирыстоны сгуыхт артист Дудайты Сæрмæт. Сценæйæ хъуыст ирон мелодитæ, гуымсæгыл сæ æххæст кодтой Дудайты æфсымæртæ.
Сценæмæкæсджытæ æхсызгонæй байхъуыстой Дменисы Культурæйы хæдзары (йæ директор Икъаты Ануси) хæдархайгæ къорды чысыл зарæггæнæг Тыджыты Мæдинæйы сæххæстгонд зарæгмæ дæр.
Кæронбæттæны сценæмæ рахызтысты гала-концерты хайадисджытæ иууылдæр æмæ та Тыджыты Мæдинæ азарыд «Бæрæгбонон зарæг».
ДЗЕБЫСАТЫ Гуло
