7-æм сентябры Дзауы кино-концертон залмæ æрбацыд бирæ адæм. Се хсæн уыдысты районы администрацийы кусджытæ, скъолаты ахуыргæнджытæ, скъоладзаутæ æмæ поселочы цæрджытæ. Уыдон фембæлдысты Хуссар Ирыстоны æфсæддон æмæ хæстон архайдтыты ветеранты Советы уæнгтыл.
Фембæлд байгом кодтой Хетæгкаты Къостайы номыл Дзауы астæуккаг скъолайы кæстæр кълæсты ахуыргæнинæгтæ. Уыдон ирон тырысаимæ цы кафт сæххæст кодтой, уый тынг фæцыд сценæмæкæсджыты зæрдæмæ. Хистæркъласонтæ та кастысты æмдзæвгæтæ, зарыдысты хæстон зарджытæ.
Уый фæстæ Хуссар Ирыстоны æфсæддон æмæ хæстон архайдтыты Ветеранты советы сæрдар булкъон Тедеты Валери æмæ йæ хæдивæг фыццаг къæпхæны капитан Цхуырбаты Руслан Хуссар Ирыстоны Президент Гаглойты Аланы барамындмæ гæсгæ «В ознаменование 10-летия победы в Отечественной войне народа Южной Осетии»-йы майданæй схорзæхджын кодтой поселочы цæрæг Тедеты Нодары.
Гуырдзы æмæ Иры хæсты сæ хæстон архайдтыты æмæ тыхст адæмæн се стыр æххуысты тыххæй, Уæрæсейы хъазахъхъæгты сæйраг Советы барамындмæ гæсгæ «За службу на Кавказе»-йы майданæй та хорзæхджын æрцыдис Дзабиты Хетæг.
«Ветеран Вооруженных Сил»-ы майдантæй хорзæхджын æрцыдысты: Тедеты Æхсар, Тедеты Валери æмæ Хæныкъаты Васили.
Дзауы районы администрацийы сæргълæууæг Тыбылты Вандæ æмæ Дзауы æфсæддон къамиссариаты хистæр Санахъоты Юри æфсæддон æмæ хæстон архайдтыты ветеранты организацийы схорзæхджын кодтой грамотайæ.
Уый фæстæ Хуссар Ирыстоны æфсæддон æмæ хæстон архайдтыты Ветеранты советы уæнг Гæбæраты Феликс арфæйы ныхæстæ загъта хорзæхтæ чи райста, æппæт уыдонæн. Уый банысан кодта, зæгъгæ, «ахæм хорзæхтæ райсын кады хъуыддаг у æмæ сæ цæмæй райсай, уый тыххæй та, сæйраджыдæр хъæуы, цы хæстæ æххæст кæныс, уым æнтыстытæ равдисын. Сымахмæ разынд ахæм хорз удыхъæд, хорзæхджын æрцыдыстут æмæ уын æз дæр арфæ кæнын зæрдæбынæй.
Йæ раныхасы Цхуырбаты Руслан та банысан кодта: «Сабитæ æмæ скъоладзаутæ кæм кафынц æмæ зарынц, уыцы бæстæ æмæ адæм сты амондджын. Ахæм æнтыст нæ адæмты къухты тынг зынтæй бафтыд, бирæ зиæнттæ æмæ ныл æнамонддзинæдтæ æрцыд, æмæ куыд хорзæхтæ райсджытæн, афтæ уе ‘ппæтæн дæр мæ зæрдæ зæгъы, цæмæй цы адджын, кадджын æмæ рæсугъд бæстæйы цæрæм, уый макуыуал банкъара ахæм æбуалгъ митæ». Уый фæстæ залы уæвæг адæммæ бахатыд, цæмæй иу уысм æмырæй алæугæйæ ссарой, гуырдзиаг агрессийы хæсты рæстæджы цы ирон хъæбатыр лæппутæ æмæ сабырцардуарзаг адæмтæ фæмард, уыдон рухс нæмттæ.
ГÆЗЗАТЫ Иван
