Хæдзардзин фæллойгæнæгæн йæ къухты æнтыст уымæн бафты æмæ кусынæн бæзгæ боныгъæдтæй фæпайда кæны æгъдауæй. Уыцы хъуыддаджы раппæлинаг сты Ленингоры районы механизатортæ, кæцытæн æмбæлон разамынд кæны тракторон бригадæйы бригадир Габиты Хвича. Уый ацы куыст кæны дæргъвæтин рæстæджы æмæ йæ бæрныуæвæг механизатортимæ архайынц хъæууонхæдзарадон куыстытæ рæс-тæгыл æмæ æнæсæфтытæй бакæныныл. Уый тыххæй сæ райгонд сты, хуым кæнын æмæ тауыны, стæй тыллæг æфснайыны куыстыты кæмæн бафыдæбон кæнынц, уыцы фермерон æмæ хицæн хæдзарадты сæргълæуджытæ.
Ныртæккæ дæр, кæд зымæджы мæй у, уæддæр хорз боныгъæдтæй пайда кæнынц æмæ уал сын фæстаг дыууæ мæйы бантыст 150 гектары мæр афæлдахын, æдæппæт фæззæгæй фæстæмæ бахуым кодтой 400 гектары. Гдулетæй суанг Абреуы хъæуы онг быдыртæ, хуым та кæнынц механизатортæ Хуриты Сослан, Дриаты Звиад, Хуыбылты Тамаз, Эдик æмæ бригадир Габиты Хвича йæхæдæг. Хуымгæнæн куыстытæ куы ахицæн кæной æмæ уалдзыгон культурæтæ тауыны афон куы æрбалæууа, уæд та уыцы æнæаргъæвгæ куыстытæ бакæндзысты.
ХУЫБИАТЫ Никъала
