Ацы мæйы кæрон Цхинвалмæ гастролон балцы иу боны æмгъуыдмæ æрцæудзæн Дзæуджыхъæуы Тæбæхсауты Балойы номыл паддзахадон ирон академион театр. Билеттæ балхæнæн ис Цхинвалы Паддзахадон драмон театры кассæйы. Спектаклмæ билеты аргъ у 500 сомы.
29-æм февралы изæры 18:30 сахатыл цæгатирыстойнаг театр Хетæгкаты Къостайы номыл паддзахадон драмон театры æмбæрзæн байгом кæндзæн æмæ адæмы тæрхонмæ рахæсдзæн, англисаг фыссæг Этель Лилиан Войничы зындгонд уацмысмæ гæсгæ æвæрд спектакль «Овод».
Ацы спектакль сæвæрдта зындгонд æрыгон режиссер Эльдар Трамов. Нывгæнæг-æвæрæг та у Уалыты Ларисæ.
«Овод» бирæ фæлтæртæн у зындгонд куыд революцион-романтикон уацмыс, афтæ. Ам автор æвдисы революцион организаци «Æрыгон Итали»-йы архайд XIX-æм æнусы райдианы. Дунейы бирæ театрты ацы романы бындурыл æвæрд цæуынц спектаклтæ æмæ кæддæриддæр цымыдисон вæййынц сценæмæкæсджытæн.
Уацмысы сæйраг хъайтар у æрыгон студент, иугъæдон æмæ уарзты цæхæры чи бахауд, ахæм лæппу Артур Бертон. Ууыл сайдæй цæуынц йе ‘ввахс адæм æмæ дзы сæхи хибар кæнынц. Цæмæй адæмæй ферох уа, уый тыххæй рæстæгмæ йæхи æмбæхсы Америкæйы, адæмыл та айхъуыст, ома, йæхи амардта. 13 азы фæстæ æрæздæхы йæ райгуырæн бæстæмæ æндæр номимæ. Уый уыдис бынтон æндæр адæймаг – уæлбикъон, джырыз, ницæуыл æмæ никæуыл æууæндæн, æнæфсарм Овод. Ахæм псевдоним райста йæхицæн.
Фæстагмæ лæппуйы ахсынц, уый базондзæн йæ фыд Монтанелли, фæлæ уымæн йæ бон ницы бауыдзæн Оводы аирвæзын кæнынæн. Артур Бертоны фехсдзысты æмæ уæд фырмæстæй амæлы йæ фыд дæр.
Нæ уацх.
