Галаты Барисы номыл кафт æмæ зарды паддзахадон ансамбль «Симд» ныртæккæ йæхи цæттæ кæны гастролон балцмæ горæт Мæскуымæ. Уый тыххæй нын фехъусын кодтой Республикæ Хуссар Ирыстоны Культурæйы министрады пресс-службæйы.
«11-æм марты нæ легендарон ансамбль «Симд» мæскуыйаг аивадуарзджытæн Чайковскийы номыл концертон залы равдисдзæн цымыдисон концерт. Концерт æвдыст æрцæудзæн Уæрæсейы Федераци æмæ Республикæ Хуссар Ирыстоны Культурæты министрадты бадзырдмæ гæсгæ», – банысан кодтой пресс-службæйы.
Куыд зонæм, афтæмæй Мæскуыйы Чайковскийы номыл концертон залы сценæйыл кæддæриддæр æвдыст æрцæуынц дунейы зындгонд сфæлдыстадон коллективты концерттæ, алыгъуызон изæртæ. Ансамбль «Симд» ацы зындгонд сценæйыл фæстаг хатт ирон культурæимæ уæрæсейаг аивадуарзджыты зонгæ кодта дыууын азы размæ æмæ ныр хъæуы раздахын уыцы традици, цæмæй та ирон кафт æмæ зардæн аргъ кæной Мæскуыйы цæрджытæ.
Ацы ахсджиаг балцы ацæуыны размæ, 6-æм марты, паддзахадон драмон театры сценæйыл равдисдзысты егъау солон концерт.
ЦХУЫРБАТЫ Ларисæ
