15 сентябры уыд æмбырд Хуссар Ирыстон æмæ Уæрæсейы Федерацийы ‘хсæн Инвестпрогаммæйы объекттæ басгарыны хатдзæгты æмæ социалон-экономикон æмгуыстады фарстаты фæдыл. Хайад дзы райстой Хицауады Сæрдар Джуссойты Константин æмæ Уæрæсейы Федерацийы Экономикон рæзты министры хæдивæг Дмитри Вольвач.
Боны фæткмæ хаст æрцыдысты республикæйы социалон-экономикон рæзты нысæнттæн финансон æххуыс бакæныны фарстатæ, 2023 азы Хуссар Ирыстоны социалон-экономикон рæзтæн ахъазгæнæн инвестпрограммæйы реализаци, 2022-2025 азты РХИ-йы социалон-экономикон рæзты Паддзахадон программæйы фæлгæтты экономикæйы фадгуытæн æххуыс бакæныны фæдыл мадзæлттæ сæххæст кæнын, республикæйы территорийыл инвестпроекттæн кредиттæ радтыны системæйы, афтæ ма мадзæлтты пъланы реализаци, цыран хынцыд цæуы 2023 азы республикæмæ нефты продукттæ ласыны æмæ инвестпрограммæйы фæлгæтты арæзт объектты эксплуатаци сифтонг кæнын.
Дмитри Вольвач банысан кодта, Хуссар Ирыстоны æхсæнхицауадон æмгуыстады фарстаты фæдыл цы командæ кусы, уыдоны профессионалон ахаст.
«Райгонд стæм республикæйы кусæг командæйы профессионалон, компетентон æмæ патриотон ахастæй. Аскъуыддзаг кæнæм вазыгджын фарстатæ, æххæст кæнæм нæ хæстæ, æмæ нын вæййы хорз фæстиуджытæ», – загъта Дмитри Вольвач.
Æмбырды рæстæджы æруынаффæ кодтой къорд фарстатыл. Уыдон баххуыс кæндзысты республикæйы æмбæстæгты фæрныгад, инфраструктурæ, электроифтонгад фæхуыздæр кæныны фæдыл иумæйаг куыст раразмæ кæнынæн, афтæ ма биз-несы рæзты перспективæтæ саразынæн дæр.
«Мах æрмæст нæ Инвестпрограммæ æххæст кæныны фæндагыл нæ цæуæм, фæлæ райдыдтам сæрмагонд инвесторты ‘рдæм не ‘ргом здахын. Уый хуымæтæджы хæс нæу, домы тыхтæ æмæ хъæддыхдзинад. Мах республикæйы æвдисæм Хæдбар паддзахадты æмхæларады стыр инвестицион базары, Евразиаг экономикон цæдисы. Уыдон республикæйы хъуамæ феной фадæттæ, фæзуат, экономикæ инвестицитæн. Уыдзысты – инвестортæ, уыдзысты серьезон сæрмагонд бавæрдтытæ, уыдзæн уыцы инвестицитæ бахъахъхъæныны гаранти æмæ экономикæ рæздзæн бынтон æндæр темптæй», – банысан кодта Вольвач.
Джуссойты Константин банысан кодта, зæгъгæ, Хуссар Ирыстоны Хицауад кусы паддзахадон инвестицион политикæйы рæзты фарстатыл, æмæ баныфсæвæрдта уæрæсейаг фарсимæ ацы фадыджы конструктивон æмархайдæй.
