Министрады минæвæрттæ æрцыдысты республикæмæ дыууæбонон кусæгон визитимæ.
Уазджытимæ уыдысты республикæйы хицауады сæрдар Джуссойты Константин, Арæзтады министр Елдзарты Константин, капиталон арæзтады управленийы минæвæрттæ æмæ æндæр официалон адæймæгтæ.
Фыццаг уал бабæрæг кодтой Дзауы районы сывæллæтты лагерь. Уым федтой куыстытæ куыд цæуынц, уый. Лагерь арæзт цæуы 150 бынатæн. Куыстытæ райдыдтой ивгъуыд азы июны мæйы. Объект эксплуатацимæ хъуамæ лæвæрд æрцæуа 2023 азы.
Уæрæсейаг делегаци базонгæ ис горæт Цхинвалы цæугæдон Леуахийыл хиды реконструкциимæ.
Елдзары фырт банысан кодта, зæгъгæ, техникæ зæронд кæй у, уый аххосæй куыстытæ цæуынц сындæггай.
«Ног техникæ æркæнын махæн нæ бон нæу, уымæн æмæ йæ габариттæм гæсгæ у егъау æмæ æфцæгыл нæ разилдзæн. Хиды сæйраг хайы арæзтад фæуыдзыстæм ацы аз, фæлæ декоративон хайы фæдыл куыстытæ та ахæсдзыстæм иннæ азы уалдзæгмæ», — загъта министр.
Уæрæсейаг делегацийы сконды Дмитри Вольвачы сæргълæудæй уыдысты Социалон программæтæ æмæ проектты департаменты директоры хæдивæг Антон Мельник, Специалон проекттæ реализаци кæныны департаменты директоры хæдивæг Петр Воронцов, Таможнæйон æмгуыстады управленийы хистæры хæдивæг Сергей Кудряков, ООО «Инвесткапитал»-ы генералон директор Максим Мелихов æмæ æндæртæ.
