Республикæ Хуссар Ирыстоны Хицауады сæрдар Джусойты Константин æмæ арæзтад, архитектурæ æмæ цæрæнуатон-коммуналон хæдзарады министр Зæгъойты Эдуард бабæрæг кодтой Дзауы районы 2020-2022 азты РХИ-йы социалон-экономикон рæзтæн ахъазгæнæг Инвестицион программæйы фæлгæтты арæзтцæуæг объекттæ, сæрмагондæй, Мзиугомы хъæуы сывæллæтты лагерь.
Хъуыддæгты ныры уавæр, проблемон фарстыты тыххæй Хицауады сæргълæууæгæн фехъусын кодта подрядон организаци арæнгонд бæрндзинады æхсæнад «Бадо»-йы генералон директор Уалыты Владислав.
Йæ ныхæстæм гæсгæ, фондз корпусæй æртæ æмбæрзт æрцыдысты, æххæст цæуынц мидæггагон æмæ æддагон куыстытæ, уадзынц коммуникацитæ, арæзт цæуы гом амфитеатр.
Куыд банысанчындæуыд, афтæмæй, куыстытæ цæуынц графикмæ гæсгæ, арæзтадон æрмæджыты цухдзинад нæй. Ныртæккæ арæзтадон фæзуаты кусынц 50 кусæджы æмæ специалон техникæйы 10 иуæджы. «Зындзинæдтæ æййафæм æрмæстдæр арæзтадон æрмæджытæ кæй фæзынаргъдæр сты, афтæ ма фæсарæйнаг æввонггæнджытæй арæзтадон æрмæджытæ æлхæнын фадат санкциты тыххæй кæй нал ис, уымæ гæсгæ», – загъта Уалыйы фырт.
Хъуыддаджы мидис бамбаргæйæ, Джусойты Константин аразджытимæ æрныхас кодта проблемон фарстытæ аскъуыддзаг кæныны фæдыл.
«Объект у цымыдисон, социалон æгъдауæй ахсджиаг, кæцы гом кæны уæлæмхас фадæттæ рæзгæ фæлтæры æнæниз кæнын æмæ сфæлдыстадон рæзтæн. Ахсджиаг у, цæмæй лагерь æмгъуыдыл лæвæрд æрцæуа арæзтады æппæт нормæтæ æххæст кæнгæйæ», – загъта Джусойты Константин.
Банысан кæнын хъæуы, объект арæзт кæй цæуы сейсмикон уаргъ чи къаддæр кæны, ахæм технологитæй пайда кæнгæйæ. Сывæллæтты лагерь арæзт у 150 бынатæн æмæ эксплуатацимæ лæвæрд æрцæудзæн иннæ аз. Объекты заказгæнæг у арæзтад, архитектурæ æмæ цæрæнуатон-коммуналон хæдзарады министрад.
Хицауады сæргълæууæг базонгæ ис Дзауы районы фæндæгты æмæ хидты арæзтадимæ.
Comments are closed, but trackbacks and pingbacks are open.