Мыхуыры рацыд сабиты уарзон журнал «Ногдзау»-ы ацы азы радон, дыккаг номыр. 12 апрель Космонавтикæйы бон кæй у, уымæ гæсгæ журнал иууылдæр фыссы ацы темæйы фæдыл. «Ногдзау»-ы фыццаг фарсыл мыхуыр æрцыд Къадзты Иринæйы уац ахæм сæргондимæ «Дун-дуне æмæ Фыдыбæстæ» æмæ дзы дзуры зындгонд физик æмæ «Нæ алфæмбылай дун-дуне»-йы автор Сиукъаты Никъала æмæ Дзæуджыхъæуы космонавтикæйы скъола байгомгæнæг Къомайты Русланы тыххæй. Дарддæр дзы ногираг ахуыргонд Къомайы фырты тыххæй дзырд цæуы йе стыр сгуыхтдзинæдты фæдыл. Рубрикæ «Базон-базонтæ»-йы сæргонды бын нæ чысыл хуртæ сæхи аифхæрсдзысты æмæ «Ахуыр кæнæм мадæлон æвзаг»-ы та базонгæ уыдзысты æрвон буарæдты нæмттимæ ирон, дыгурон æмæ уырыссаг æвзæгтыл. Мыхуыр дзы ис Джыккайты Шамилы «Æрвон таурæгъ» дæр.
2021 азы Гасанты Валери интервью райста Къомайты Русланæй æмæ ацы номыры мыхуыр æрцыд ахæм сæргондимæ «Сывæллæттæн балæвар кæнæм…космос!». Сабитæ æхсызгонæй бакæсдзысты Мамиаты Дианæйы уац «Дун-дунейы тыххæй иронау!». «Известные люди в космосе» – ахæм сæргонды бын та кæсджытæ базонгæ уыдзысты Юри Гагарин, Валентинæ Терешкова, Алексей Леонов, Анатоли Соловьев, Армстронг Нил æмæ Гленн Джоны космосмæ сæ цардвæндаджы тыххæй, сты дзы сæ къамтæ дæр. Дарддæр журналы сты Ирис Ревюйы «Сказочная история о планете Марс», «Сказка космическое чудо» æмæ Зорттаты Георы «Æнкъард стъалы». «Ногдзау»-ы ма цымыдисон æрмæджытимæ базонгæ уыдзысты ахæм рубрикæты бын, куыд «Æмбисæндтæ», «Космосон равдыст», «Цыппар лæппуйы планетарийы ракетæ куыд скусын кæнынмæ хъавыдысты», «Лулæ мæймæ атæхын куыд сфæнд кодта» æмæ æндæртæ.
Нæ чысыл хуртæ сæхи аифхæрсдзысты, «Ногдзау»-ы цы филворд, сканворд æмæ дзырдбыд мыхуыр æрцыдысты, уыдоныл. Журнал аивадон æгъдауæй сфæлгонц кæныныл хорз бакуыстой нывгæнджытæ Цомайты Аллæ, Айларты Владимир æмæ Абайты Аркади.
ХУЫБИАТЫ Никъала
