Академион концерт
21-æм марты Тедеты Георгийы номыл Цхинвалы фыццæгæм музыкалон скъолайы актон залы уыдис гом академион концерт. Уыцы бон ардæм æрбацыдысты Цхинвалы администрацийы культурæ, фæсивæд æмæ спорты фæдыл управленийы минæвæрттæ сæйраг специалист Цхуырбаты Полинæйы сæргълæудæй, афтæ ма музыкалон скъолаты æмæ ахуыргæнæндоны ахуыргæнджытæ, ахуыргæнинæгтæ, сывæллæтты ныййарджытæ, аивадæн табугæнджытæ. Концерты хайад райстой музыкалон скъолайы фортепиано, хор, скрипкæ, аккордеон, вокалон æххæсткæнынады, домра, ирон фæндыр, духовон (флейта, труба) инструментты хайадты хъомылгæнинæгтæ.
Мадзал уагъта скъолайы ахуыргæнæг, РХИ-йы сгуыхт ахуыргæнæг Котолиты Тамарæ. Уый сценæмæ фæхуыдта иумæйагскъолайон кæстæр хоры хайадисджыты сæ ахуыргæнæг Остъаты Олесяйы сæргълæудæй. Уыдон тынг хорз сæххæст кодтой æртæ зарæджы – «Мады зарæг», «Сочинение о весне», «Хонæм уæ нæ Ирмæ».
Дарддæр сценæйыл сæ арæхстдзинад равдыстой скъолайы иугонд хоры хайадисджытæ РХИ-йы сгуыхт ахуыргæнæг Тасойты Валентинæйы сæргълæудæй. Уыдон дæр тынг зæрдæмæдзæугæ азарыдысты æртæ зарæджы.
Ацы скъолайы иннæ хайадты хъомылгæнинæгты дæсныйады фæрцы залы хъуыстысты Кокойты Аслан, Юрий Щуровский, Æлборты Феликс, Петр Чайковский, Людвиг ван Бетховен, Хаханты Дудар, Илья Резник æмæ æндæр композиторты уацмыстæ.
Музыкалон скъолайы 1-аг æмæ 3-æм кълæсты ахуыргæнинæгтæ Джиоты Арсæмæг æмæ Хъотайты Иринæ (сæ ахуыргæнæг Гасситы Ацæмæз) тынг аив азарыдысты «Дождик обиделся». 1-аг къласы ахуыргæнинаг Битеты Дмитри та азарыд зарæг «Вера». Куыд æрвылхатт, афтæ та ныр дæр Цоциты хотæ – Аннæ æмæ Тамарæ сæ номыртæ виртуозон æгъдауæй ацагътой фортепианойыл. 2-æм къласы ахуырдзау Болататы Алан афтæ азарыд италиаг зарæг «Ямайка» æмæ залы адæм сæ къухæмдзæгъдæй нал лæууыдысты (Аланы педагог, РХИ-йы адæмон ахуыргæнæг Гæджиты Жаннæ). Сæ номыртæ хорз сæххæст кодтой Бабаты Мария (фортепиано), Хъæцмæзты Аннæ (фортепиано), Бибылты Арианнæ (аккордеон), Зассеты Иринæ (фортепиано), Гæззаты Арсам (скрипкæ), Дзукъаты Даянæ (аккордеон), Джиголаты Мария (скрипкæ), Джиголаты София (фортепиано) æмæ æндæртæ. 1-аг æмæ 2-аг кълæсты ахуыргæнинæгтæ Липчанский Федор æмæ Джиоты Тимур фортепианойыл сæххæст кодтой «Танцуй Рок-н-ролл». 2-æм къласы ахуырдзау Сиукъаты Виктория фæндырыл тынг хорз ацагъта Кокойты Асланы «Усгуры мæт». Концерты кæрон 5-æм къласы ахуыргæнинаг Дудникова Эвелинæ тынг хорз азарыд зарæг «Гимн семьи, любви и верности».
Сывæллæтты цæттæдзинады ирдæй разындис сæ ахуыргæнджыты æвæллайгæ куыст, скъолайы директор, РХИ-йы адæмон ахуыргæнæг Тедеты Маринæйы сæргълæудæй.
Æгæрыстæмæй, Ирыстонæн уæззау рæстæджыты дæр музыкалон скъола йæ куыст никуы æрурæдта. Тедеты Маринæ æппæт дæр арæзта æмæ ныр дæр аразы, цæмæй сæ хъомылгæнинæгтæ уагдоны къæсæрæй рахизой цæттæйæ. Бузныджы ныхæстæ зæгъын хъæуы скъолайы коллективæн сæ намысджын куысты тыххæй. Æрвылаз дæр сын ахæм концерттæ свæййынц сæ куыстæй раппæлыны аккаг хатдзæггæнæн мадзæлттæ.
ДЖИОТЫ Екатеринæ
