12 февралӕй 19 февралмæ Хуссар Ирыстоны территорийыл ӕрцыд иу фыдракæнд ӕмӕ раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы.
Фæндагон змæлды æдасдзинады инспекци дыууæ къуырийы дæргъы сбæлвырд кодта 315 фæткхалæн цауы. Уыдонæй 8 шофыры разындысты нозтджынтӕ кӕнӕ та уыдысты наркотикты ӕндӕвдады бын.
12 февралы рынчындонмæ уæззау уавæры бахаудта Знауыры районы Дзагъинайы хъæуы 30-аздзыд цæрæг. Куыд рабæрæг, афтæмæй рынчын спайда кодта наркотикон буарад «метадон»-æй.
13 февралы оперативон-агурæн мадзæлтты фæстиуæгæн милицийы уголовон фæдагуырды кусджытæ æрцахстой нæ горæты 41-аздзыд цæрæджы. Ацы æмбæстаджы цалдæр боны агуырдтой барадхъахъхъæнæг органтæ фыдракæнд саразыны тыххæй – æхсæнгарзæй фехста йæ раздæры бинойнаджы æмæ стӕй адавта йæ дыууæ сывæллоны. Ныр ын йæ хъуыддаг равзардзæн тæрхондон.
14 февралы рынчындонмæ кардæй цæфимæ бахаудта 31-аздзыд горæттаг цæрæг æмæ йын дохтыртæ бакодтой медицинон æххуыс. Оперативон-агурæн мадзæлттæ ауадзыны фæстиуæгæн урæд æрцыд фыдгæнæг – разынд нæ горæты 41-аздзыд цæрæг, кæцы басаст йæ фыдракæндыл.
